Yesu Akusinga Beigisibwa Makumi Mutubakamo nu Babili
10
1 Kusila kwa bubo, Mukota asombwede bango beigisibwa makumi mutubakamo nu babili, abasingile babili babili lwabusio lwage ku mwino na mwino nu ku kiziki na kiziki, kwatundage kwenda wenyene. 2 Nu ababwide bunee: “Matubulo meli meingi, tondo bakiti ba mulimo beli bakeke. Umpanga segazi ku Mukota wa matubulo buno asinge bakiti ba mulimo mu matubulo mage. 3 Endazi! Namusinga anga bana ba mikoko munkatini mwa mboa za lubanda. 4 Tamweke bikulo aba nsago, aba bisalapata, nu tamusambizie muntu wampa mu nzila. 5 Nu numba zimwingilage muzo, tendazi tanga buno, Bubobelelo bube mu zeno numba! 6 Nu ndi muli muntu wa bubobelelo, nti bubobelelo bwabe kweli tondo ndi tabuli bubo, nti bubobelelo bweinyu bwasubye kumuli. 7 Ikalazi mu numba zezo mukulia nu mukunua kinsania kibamukasa, kubuno mukiti wa mulimo atananina kuligwa lukalilo lwage. Tamukumuke ku numba na numba. 8 Mu mwino unsania u mwingilage mugo nu kusekelwamo, liazi idia libamukase. 9 Oniazi basambi beli mumo, nu babulazi buno, bukota bwa Kalaga buli bwigi na inyuwe. 10 Tondo mwino unsania u mwingilage mugo, nu ndi tabamusekela, endazi mu nzila zago nu tendazi buno, 11 aba mukungu wa mwino weinyu guli ku magulu meitu, twamutitulilago: tondo, menyazi kikino kitondo busoga buno, bukota bwa Kalaga buli bwigi. 12 Nkumubula bunee: ‘Mu busi bubo lusungio lwa Sodoma lukaba lukeke kutinga lulo lwa wozo mwino.’” Miino Zikusomba Kukatizia Kalaga
13 “Kabebe kuguli Korazini: kabebe kuguli Betesaida! Kubuno songo miganogano zakitilwe munkatini mweinyu zinakitilwe mu mwino wa Tiro nu wa Sidoni, songo bantu beiyanizie wakalazi, kuvwala nsulu z'ikunino nu kwikala mu lwito. 14 Tondo ku busi bwa lusungio, lusungio lwa Tiro nu Sidoni lukaba lukeke kutinga lweinyu. 15 Nu uwe, Kapernaumu, ndi wakengela ukabakamibwa aaba kwigulu? Kilo, ukagezibwa gansi aaba nu ku kiziki kya bakuzi.”
16 Yesu abwide lingo beigisibwa bage bunee: “Wozo ukumungwilila, nti akunnungwilila, nu wozo wamusomba, nti ansomba, tondo wozo wansomba nti asomba wozo wansingile.”
Kusubya kwa Babo Beigisibwa Makumi Mutubakamo nu Babili
17 Babo beigisibwa makumi mutubakamo nu babili basubizie lingo na mbogimbogi, nu batendile bunee: “Mukota, aba basumbu nu bo bakutwanza gatukubakakizia mu izina lyobe.” 18 Yesu abakwide bunee: “Namonine ku Satana akukoloka anga mukenzi kutuka kwigulu: 19 Lolazi, namukasile bwangato bwa kunyanta gantata ga nzoka nu nkutu, nu magala ma kukinda mwiti, nu takuli aba kampa kakavwama kumubabazia nunse. 20 Tondo tamubogeboge buno basumbu bakumwanza; tondo bogazibogazi kubuno meina meinyu masanzwa mwigulu.”
Yesu Akubogaboga
21 Mu zezo nkungu, Yesu eiyede na mbogimbogi ku magala ma Muuza Wasililila, nu abwide bunee: “Nakuganuna, Tatane, Mukota wa Mwigulu nu wa Kisi, kubuno wabisile bitondo bibino ku beiya menge, nu kubeli na bumenyinino, nu wabilolesizie ku bana bakeke, ee, Tatane, nakuganuna kubuno bubo u bwakutananizizie.
22 Nakasilwe binsania na Tatane, nu takuli muntu wampa wizi Mwana, tugu Isi, nu takuli muntu wizi Isi umpanga Mwana, nu ku wozo muntu walolesibwa Isi na Mwana.”
23 Nu agalukile ku beigisibwa bage. Nu ababwide ku lumbisombiso bunee: “Mbogimbogi ku meiso mamo makumona ku bubo bumukumona kubo! 24 Kubuno nkumubula buno, Balengania beingi nu bakota batundaga kumona ku bubo bumukumona kubo, tondo tababumonineko, nu kungwilila ku bibyo bimukungwa kubyo tondo tababyunguleko.”
Musumo wa MuSamaria Musoga
25 Musozi umozi wa milembe emanukile buno ageleke Yesu nu amubwide bunee: “Musozi, natunganana kukita buni buno nimone kalamo katanakuzinda?” 26 Yesu amwakwide bunee: “Buni bwasanzilwe mu mulembe? Ukusoma kikizi mugo?” 27 Wozo muntu amwakwide bunee: “Tunda Mukota Kalaga wobe na mutima wobe unsania, nu na bumenyinino bwobe binsania nu na magala mobe mansania, nu makengelo mobe mansania. Nu tunda munyobe anga buwitunda uwenyene.” a 28 Yesu amwakwide bunee: “Wakula busoga. Kita bubuno nu nti wamone kalamo.”
29 Tondo we atundaga kwibingia wenyene, abuzizie Yesu bunee: “Nu nazi wozo munane?” 30 Yesu akwide bunee: “Muntu umozi akumbaga kutuka ku Yerusalema nu kwenda ku Yeriko; mu nzila, akatilwe na banyagi; bamutikizye nsulu zage; bamulibwide, nu beiyendede, nu bamusigile ku kibililo bwigi na kukua. 31 Kwabasile sankoga umozi wa kumbaga kwenda mu zezo nzila; gaamonine ku wozo muntu, atingile ku lungo lulenge lwa nzila. 32 Nu muLawi, gaabasile nu we gago, amumonineko, tondo atingile ku lungo lulenge lwa nzila. 33 Tondo muSamaria umozi wendaga mu zezo nzila, abasile gago gaabezaga nu gaamumonineko abede na kyombo kweli. 34 Asigelede bwigi nage, asikile byulu byage na makiti nu maku, abikandile kusila amubakamizie gantata ga mpunda zage, amwekile ku numba za bageni, nu amukungile. 35 Gakede busi, atikizye ku bikulo byage binkulumba bibili bya feza nu abwide mulangi wa numba bunee: “Kunga muntu wono, nu bikulo binsania biwazimizie bya gantata, nakusubiziebyo ganasubye.” b 36 Yesu amubuzizie bunee: “Ku babano basatu, ukukengela nazi wabezaga kilemba kya wozo wakatilwe na banyagi?” 37 Musozi wa milembe akwide bunee: “Wozo wamukwilide kyombo.” Nu Yesu amubwide bunee: “Enda, nu uwe ukite bubo.”
Yesu ku Numba za Marta nu Maria
38 Nu gabezaga Yesu na beigisibwa bage mu nzila, eingide mu mwino umozi nu mumo mukikulu umozi wamanagwa Marta amusekede mu numba zage. 39 Nu we abezaga na muto wage wamanagwa Maria. Wono eikede gansi ku magulu ma Mukota nu kungwilila bwatendaga. 40 Tondo Marta abezaga akandwa na milimo mingi za bulongeki bwa mu numba. Avule ku Yesu nu abuzizie bunee: “Mukota, ndi buli busoga bubo bwansigile muto wane nnenyene geteli kunkasia? Mubule buno ankasie.” 41 Mukota amwakwide bunee: “Marta, Marta ukuzangazanga nu ukwikutia ku bitondo byingi. 42 Tondo kimozi tugu u kikwiyaninwa; nu Maria asombwede kikyo kisoga nunse, nu takikatukibwa kweli.”