Musumo wa Kisagulo kya Mwana wa Mukota
22
1 Yesu abeisile lingo musumo, atendile bunee: 2 “Bukota bwa meigulu bwalingimana na mukota umozi wakitile idia lya kisagulo ky'isonga lya mwana wage, 3 nu asingile bakiti bage kumana baalagenne nabo ku kisagulo: nu basombile kuvwa. 4 Asingile lingo bango bakiti; ababwide bunee: ‘Bulazi bantu banalaganaga nabo buno, idia lyagwede, ngombe zane nu byana byane bya ngombe byanona byasesilwe, binsania bise kayikayika: vwazi ku kisagulo.’ 5 Tondo babengile bwatendaga, beiyendede umozi ku isoa lyage, nu ungo kukunzia byage; 6 nu bango bakatile bakiti ba mukota, babakitile bubi, nu babeitile. 7 Mukota abongedwe; nu asingile bakoloboyo bage, buno babeite babo beiti, nu bagisie mwino wabo. 8 Bubo, abwide bakiti bage bunee: ‘Idia lya kisagulo lyagwede, tondo bantu banalaganaga nabo tabatunganenne. 9 Endazi ku makano ma nzila nnene, mumane bamwamonageko ku kisagulo.’ 10 Nu bakiti bage bendile mu nzila, nu bakundamanizie bantu bansania babamonineko, babi nu basoga; mu numba za kisagulo mwabezaga mwiyala na bageni. 11 Geingide mukota ku kulola bageni, amonine ku wamulume uteli na nsulu zaswaga ku kisagulo: 12 nu Mukota amubuzizie bunee: ‘Kilemba kyane, buni buwingide, nu ntuli na nsulu nsoga ku kisagulo?’ Wozo muntu eikede kibibi. 13 Nu Mukota abwide bakiti bage bunee: ‘Mukandazi ku maboko nu ku magulu nu nti mwamwisa mu kapilo kumbuga u kukaba kulila nu kubuga meinyo.’ 14 Kubuno bantu beingi bakumanwa tondo bakeke u bakusombolwa.” Yesu Akubula Bantu ba Herode Kitondo kya Kuliga Kodi
15 Ububo baFarisayo bendile kukala lwango lwabo buni bubanamukandika bitondo. 16 Basingile beigisibwa babo gamozi na bayangi ba Herode ku Yesu; bamubwide bunee: “Musozi, twizi buno uli bulili nu ukwigisia bantu meigisia ma Kalaga mu bulili, nu ntukukutya muntu wampa: kubuno ntukulolaga ku kilungi kya bantu. 17 Buni buukukengela? Tubule tugu. Ndi bwakulungana ku mulembe kuliga Kaisari kodi, aba kutaliga?” 18 Tondo Yesu amenyine makengelo mabo mabi, nu ababwide bunee: “Inyuwe bengelezi kubuni kumukundindika? 19 Ndolesiazi kinkulumba kya feza za mukota. Nu bavule na feza za mukota.” a 20 Nu ababuzizie bunee: “Kikino kisusania nu mamano masanzo bili bya nazi?” 21 Bamwakwide bunee: “Bya Kaisari.” Nu ababwide bunee: “Kasazi Kaisari bili bya Kaisari; nu kasazi Kalaga bili bya Kalaga.”
22 Nu gabongule ku bubo, bangamine, nu bamusigile.
Yesu Akubula baSadukayo Kuyuka kwa Bantu ku Bakuzi
23 Mu busi bubo baSadukayo, babo bakutendaga buno, takuli iyukilo, bavule ku Yesu nu bamubuzizie bunee: 24 “Musozi, Musa atendile bunee: ‘Ndi wamulume akua nu ntasiga bana nti muto wage eiyana mukazi, nti abutila iselenzi bana.’ 25 Mutuli mwabezaga mibuto mutubakamo ba nda emozi; nu mutangi asongile mukikulu nu akule, nu ntabutile mwana, nu asigide muto wage mukikulu wage; 26 nu wa babili abezaga nu we bubo, nu wa basatu lingo, aaba nu kubasa ku wa mutubakamo. 27 Nu gakule babo bansania, mukikulu nu we akule. 28 Mu iyukilo nti akaba mukikulu wa nazi mu babo mutubakamo? Kubuno na we na wamusongile.”
29 Tondo Yesu abakwide bunee: “Mukwibaga, kubuno tamukumenyininaga masanzo, aba magala ma Kalaga. 30 Kubuno mu iyukilo takukasonganwa, tondo babe anga banzelo ba mwigulu. 31 Kubuno kuyuka kwa bakuzi ku lukuo, ndi tamwasomine bwamubulaga Kalaga bunee: 32 ‘Nne nili Kalaga wa Abrahamu, nu Kalaga wa Isaka, nu Kalaga wa Yakobo?’ Kalaga nteli Kalaga wa bakuzi, tondo wa balami.” 33 Nu gongule musanganano ku bubo bangamine na meigisia mage.
Yesu Akubula baFarisayo Kitondo kya Mulembe wa Kalaga
34 Tondo gongule baFarisayo buno baSadukayo tabamenyine bungo bubakula Yesu, bakundamenne. 35 Nu umozi wa kubeli abezaga ngatu za mulembe abuzizie Yesu buno amulindike. 36 “Musozi ikakizio ikizi lyatinga mango makakizio mansania ma mulembe?” 37 Yesu amwakwide bunee: “Tunda Mukota Kalaga wobe mu mutima wobe unsania, nu mu kalamo kobe kansania, nu mu makengelo mobe mansania. 38 Kubuno kukuno u kukakizia kutangi nu kunene. 39 Nu kwa mabili kuli bunee: ‘Tunda munyobe anga buwitunda uwenyene.’ 40 Kubuno mu mamano makakizio mabili u muli mulembe unsania, nu bulengania.”
Yesu Akubuzia baFarisayo Bubakukengela ku Kristo
41 Gabezaga baFarisayo bakundamana, Yesu ababuzizie bunee: 42 “Buni bumukukengela ku Kristo? Eli Mwana wa nazi?” Bamwakwide bunee: “Eli Mwana wa Davidi.” 43 Yesu ababwide bunee: “Kubuni Davidi wenyene, gaatendaga mu magala ma Muuza Wasililila, amumanine ‘Mukota,’ kubuno atendile bunee:
44 ‘Mukota atendile ku Mukota wane bunee:
“Ikala ku kuboko kwane kwa seidume, aaba nu
nabike beiti bobe kunsi kwa magulu mobe.”’ b
45 Ndi Davidi amumanaga bunee: ‘Mukota,’ buni bweli Mwana wage?”
46 Nu takuli wamwakwide, aba kutukila busi bubo takuli wamubuzizie ingo mbuzio.