Yesu Akubasa ku Yerusalema na Lutanuno
21
1 Gababasile bwigi na Yerusalema, nu kubasa ku Betefage, ku Mwiduko wa Mizeituni, Yesu asingile beigisibwa bage babili, 2 nu ababwide bunee: “Endazi ku mwino guli lwabusio lweinyu, nu kazanga kongo mwamone ku mpunda zaswikwa, nu kyana kyazo: nti mwazisula, nu nti mwamvwila nazo. 3 Ndi muntu amubuzia, nti mwabula buno, Mukota akwiyanina zo: nu kazanga kongo nti azisinge.” 4 Bubuno bunsania bwabezaga buno lizindilile lyatendagwa na mulengania bunee:
5 “Bulazi mukinga wa Sayuni bunee: ‘Mukota wobe akuvwa kuguli, abota nu akwenda gantata ga mpunda.’” a
6 Nu beigisibwa bendile, nu bakitile anga bwababulaga Yesu, 7 nu bavule na mpunda, nu kyana kyazo, nu babikile nsulu zabo gantata gakyo; nu Yesu eikede gantata gakyo. 8 Bantu beingi ba musanganano banzile nsulu zabo mu nzila; nu bango basesile ntabi nkeke za miti, nu bazanzile mu nzila. 9 Nu musanganano wendaga lwabusio lwage, nu babo bamuyangaga, balalukile bubibu bunee: “Luganuno ku mwana wa Davidi; mbogimbogi ku wozo ukuvwa mu izina lya Mukota; luganuno ku Kalaga uli mwigulu nunse.” b 10 Nu gabasile Yesu ku Yerusalema, bantu bansania ba mu mwino bangamine, babuzanizie bunee: “Wono eli nazi?” 11 Bantu ba musanganano batendile bunee: “Wono eli mulengania, Yesu, wa ku Nazareti ku Galilaya.”
Yesu Akutikya Bakunzia mu Numba za Kalaga
12 Yesu eingide mu numba za kukumbamina Kalaga, nu alingile kwimbya babo bansania bakunzagia nu babo bakunzaga mu numba zezo, nu eidukizie meza ma bagalukya ba feza, nu bisumbi bya bakunzia ba nkulimba; 13 nu ababwide bunee: “Bwasanzilwe bunee: ‘Bakamana numba zane buno numba za misanganano:’ tondo beinyuwe mwazigalukya anga kiziki kya banyagi!” c
14 Byuku nu bitunga bamuvwilide ku numba nnene za kukumbamina, nu abonezie. 15 Tondo gamonine basankoga banene nu basozi ba mulembe ku bubo bwakitile Yesu bwa kwangamia, nu bana balalukile lingo mu zezo numba nnene za kukumbamina bunee: “Luganuno ku Mwana wa Davidi;” bongilwe. 16 Nu bamubuzizie bunee: “Ndi ntukungwa ku bubo bukutenda babo bana?” Yesu ababwide bunee: “Ee, ndi tamwasomine buno, ‘Mu tunua twa bana bato nu tunua twa beki bamoma, u mukuzindilila lutanuno.’” d 17 Nu abasigile, nu endile ku Betania, nu eikede kuko.
Yesu Aswilila Muti wa Biguma
(Mk 11:12-14, 20-24)
18 Gabezaga Yesu es'asubya ku mwino nindunindu, akule na nzala. 19 Nu amonine ku muti wa mutini mu ntungo mwa nzila, endile kugo nu ntamonine kampa kugo, tugu nsamba; nu abwide muti bunee: “Ntukakolama biguma lingo tanga kutukila kano kaluma aaba nu ku nkiko zitanakuzinda.” Nu kazanga kongo wozo muti womine. 20 Nu gamonine beigisibwa bage ku bubo, bangamine nu batendile bunee: “Buni bwasasia kuoma muti wa mutini kano kazanga?” 21 Nu Yesu abakwide bunee: “Lebelebe nkumubula bunee: ‘Ndi mwaba na bukatizio buteli na kangonongono, mukakita ta bubuno bwakitwa wono muti wa mutini tugu; tondo mukabula mwiduko bunee: “Tuka kuko, nu wiyise mu kitatenge,” nu nti bubo bwabe. 22 Nu binsania, bimukasegaga mu masego, ndi mwakatizia, nti mukakaswabyo.’”
Bakubuzia Yesu Bukota Bwage
23 Geingide Yesu mu numba za kukumbamina, basankoga banene nu bakulu ba bantu bamuvwilide gaabezaga es'alinga kwigisia, nu bamubuzizie bunee: “Ku bwangato bukizi buukukitila bubuno? Nu nazi wakukasile bwangato bubuno?” 24 Nu abakwide bunee: “Nu Nne nkumubuzia bumozi, ndi mwanakulabo, nti namubule nu Nne bwangato bunkukitila bubo. 25 Lututiko lwa Yoana, lwatukile kuni, mwigulu aba ku bantu?” Babuzanizie bwabobwabo, “Ndi twatenda Yesu buno, ‘bwatukile kwigulu;’ nti akututenda bunee: ‘kubuni tamwamukatizizie?’ 26 Tondo ndi tukutenda buno, ‘ku bantu;’ nti tukukua musanganano boba; kubuno bantu bansania bakukatizia Yoana buno, eli mulengania.” 27 Nu bakwide Yesu bunee: “Tatwizi.” Nu ababwide bunee: “Nu Nne lingo nsikumubula ku bwangato bunkukitila ku bubuno.”
28 “Tondo buni bumukukengela? Muntu umozi abezaga na bana bage babili; avule ku mutangi, abwide bunee: ‘Mwana wane, enda ukite mulimo mu isoa lya biguma.’ 29 Amwakwide bunee: ‘Nsikuziga;’ tondo kumbusa eibezizie nu endile. 30 Isibo endede wozo ungo wa babili nu amutendile bubo lingo. Nu we amwakwide bunee: ‘Nkwenda, Tatane:’ tondo ntendile. 31 Ku babo babili, mwana mukizi wakitile bwatendile isibo?” Bamwakwide bunee: “Wozo mutangi.” Yesu ababwide bunee: “Lebelebe nkumubula bunee: ‘Baligia ba kodi nu bakikulu bitazi bakulinga kwingila mu bukota bwa Kalaga kumuli. 32 Yoana avule kweinyu mu bwisanana bwa Kalaga, nu tamwamukatizizie; tondo baligia ba kodi nu bakikulu bitazi bamukatizizie: nu gamwamonine kubo, tamwibezizie buno mumukatizie.’
Musumo wa Nyene Isoa Asegaga Bantu Bage Biguma Byage
33 Ungwililazi ku ungo musumo: Kwabezaga muntu nyene numba, ayikile mizabibu mu isoa lyage, alikulumanizie na mukolo, nu ombile kansango ka kukambutula biguma, nu obakile numba zasakama, nu alisigile ku bakiti, nu endile mu kingo kisi. 34 Nu gabede nkungu za kutubula biguma zise zakuka asingile bakiti bage ku babo balimaga isoa lyage kutola biguma byage.
35 Tondo balimi bakatile bakiti bage, nu balibwide umozi, beitile ungo, balibwide ungo makozi. 36 Nu asingile lingo bango bakobe bage kutinga batangi ku bwingi; balimi babakitide anga bubakitile babo bango. 37 Ububo abasingide mwana wage, atendile bunee: ‘Embe bananza mwana wane.’
38 Tondo balimi gabamonine ku mwana, batendenne bunee: ‘Wozo eli mupieni; vwazi tumwitazi, nu iswe twabe bapieni bage.’ 39 Nu bamukatile, nu bamutikizye mu isoa, nu bamwitile.
40 Gakavwa nyene isoa akakita babo balimi buni?” 41 Nu bo bamwakwide bunee: “Akeita babo balimi babi; nu akakasana isoa lyage ku bango balimi bakamukasaga biguma ndi byela.” 42 Yesu ababwide bunee: “Ndi inyuwe tamwasomine mu masanzo bunee:
‘Ikozi lyasombilwe na bobaki,
U lyabede ikozi inene lya kapindapinda;
Bubo u bwatukile ku Mukota,
Nu bo bukutuganiagania?’ e
43 Kubuno nkumubula buno, Bukota bwa Kalaga bukatukibwa kumuli, nu bukakaswa kingo kilongo kikakolamaga biguma. 44 Nu we wagoa g'ikozi lilyo nti abeleka; tondo unsania wakolokelwa nalyo, nti lyamubungula.”