Lwimbo lw'isoa lya mizabibu
5
1 Kano kaluma nkwimbila mutundwa wane lwimbo ku isoa lyage lya mizabibu: Mutundwa wane eli n'isoa lya mizabibu, ku mwiduko wa munago. 2 Abikile mukolo nu atikizye makozi mansania, ayikile mu lyo mizabibu misoga nunse. Obakile numba munkatini mw'isoa. Ombile kansango ka kukambutula mizabibu nu bakatile mazi ma biguma, nu gaalondile biguma bisoga amonine zakolamine mizabibu mbi za lubanda. 3 “Inyuwe bakwikalaga ku Yerusalema nu bantu ba Yuda nkumubuzia kwatula ganisamba n'isoa lyane lya mizabibu. 4 Ninakitila isoa lyane lya mizabibu kikizi lingo kinsyakitile? Ganatundile kukola mizabibu nsoga, kubuni zakolamine tugu mizabibu mbi za lubanda? 5 Su, vwazi nkumubula buni bunakite ku isoa lyane lya mizabibu: nkatikya mukolo walyo nu likalibwa nu nkatikya bitutu bya lyo nu likanyantwa. 6 Nkalibigia, talikakondelwa ntabi, aba talikalimwa, likasa migunga nu mikele, nu nkakakizia bimpa buno mbula taziloke kulyo.” 7 Kubuno isoa lya mizabibu lya Yehowa, Mwiya Mayombo, u beinyuwe numba za Israeli, nu bantu ba Yuda, beli mizabibu misoga nunse za Yehowa, nu alondile nsungio zisanana tondo amonine bwiti tugu, atundile kumona ku kwisanana tondo ungule tugu idilo.
8 Kabebe ku babo bakobaka numba kutukila ku zingo, nu kutalika isoa ku mango masoa buno takube kiziki ku beikale bobenyene. 9 Ku matuzi mane nungule ku Yehowa, Mwiya Mayombo, gaambwide bunee: “Numba ningi zikabigibwa, aba mu numba nnene nu nsoga tamukeikala bantu. 10 Kubuno isoa lya nkamba makumi mabili nu itano lya mizabibu likakolama biguma byakuka ku malega makumi masatu ma maku, nu nzi mutuba za mbuto zikakolama kyindi kya luzi tugu.”
11 Kabebe ku babo bakukelela lukesikesi kwenda mu biziki bya maku, nu babo bakwikala kulindila kindi kinsania buno maku mabange anga keiya munda mwabo. 12 Nu nzenze, nu kindanda, nu ngoma, nu tupyelele, nu maku bili munkatini mwa misanganano zabo, tondo tabakumona milimo za Yehowa tabakukengela makitilo ma maboko mage. 13 Ku kabamba kako bantu bane bendile ku bukobe, kubuno tabeli na bumenyinino nu bantu banene babo bakakua na nzala nu bantu babo bakakua na mpusia.
14 Ububo nsinda zili bwasi nu nzala zazo tazili na kuzinda; zasula kanua kuteli na kusila; bantu banene nu bakeke beingi, gamozi na bakukita kazege nu babo bakubogaboga bakagela mu kiziki kya bakuzi Hadese. 15 Muntu uteli na magala akakumbwa gansi; nu muntu munene akabotibwa, nu meiso ma muntu uli na lwikotio makasigulizibwa. 16 Tondo Yehowa, Mwiya Mayombo akaganunwa mu nsungio nu Kalaga Wasililila akeidolesia mu bwisanana bwage. 17 Nkungu zezo byana bya mikoko bikalia anga mu biziki byabyo nu byana bya mpene bikalia munkatini mwa numba zabigibwa za bagumi.
18 Kabebe ku babo bakubuluta bwagi na mizigi za buza nu bakubuluta mibi na mizigi anga kikoba. 19 Ku babo bakubula bunee: “Kalaga akite lubilo, asasie kukita mulimo lubilo buno tugumone ko, nu lwango lwa Wasililila wa Israeli luvwe tulumoneko.”
20 Kabebe ku babo bakumana busoga buno buli bubi, nu bakumana bubi buno buli busoga, nu bakugalukya kyengi kuba kapilo, nu kapilo kuba kyengi, nu bakubika bili nse kuba lubaba, nu bya lubaba kuba nse!
21 Kabebe ku babo bakwikotizia menge nu bakwikengela buno beli na bumenyinino bobenyene!
22 Kabebe ku babo beli mapuka ku kunua maku, nu beli na magala kusambika maku! 23 Nu ku babo bakubingia mubi buno eisanana ku kabamba ka kukaswa bikulo, nu bakubigia wisanana ku kwisanana kwage.
24 Anga bukugisagia ngulumina za keiya bisugu byoma, nu bisugu byakama kwomboka mu keiya, u bubo bwabole mizi zabo, nu maluba mabo malenge anga mukungu, kubuno basombile makakizio ma Yehowa, Mwiya Mayombo, nu babengile iyuki lya Wasililila wa Israeli. 25 Ku bubo bongoa bwa Yehowa bwabede bunene ku bantu bage, nu alambizie kuboko kwage kubeli, nu abalibwide, nu miduko zatengiletengile, nu bitumba byabo byabede nsese mu nzila, ku kabamba ka bibyo binsania, bongoa bwage tabwagalukile, nu kuboko kwage kwalambibwa kutuli aaba nu kano kaluma.
26 Nu We asakika ibendela ku bilongo bya bulazi, nu akabamana ku ndenge za kisi, nu bakavwa lubilo nunse. 27 Munkatini mwabo tamukaba umozi ukakutwa aba kwikuka. Takuli ukazenzela aba kwiyombeka, aba mikoma zabo tazikasogonsa nu mizigi za bisalapata byabo tazikakalika. 28 Misungu zabo zili mikali nu bunta bwa misungu zabo bwakumbwa, byondo bya farasi zabo bikaba anga makozi mabibu, ngondangonda zabo zikutimba anga kisoa. 29 Kubila kwazo anga bimbwe bakuzuga anga byana bya bimbwe. Ee bakuzuga nu kukata anga bubakutunda nu kwenda mu kiziki kya bubobelelo, aba takuli wa kutikya. 30 Nu bo bakazuga kubeli mu busi bubo anga mubilo wa kitatenge; nu ndi muntu alola ku kisi, kapilo nu kabebe, nu nti amona kyengi kikaba kapilo mu lutundutundu.