Isonga ku Mwino wa Kana
2
1 Kumbusa kwa bindi bisatu, kwabede isonga mu mwino wa Kana, ku Galilaya. Nina wa Yesu abezaga kuko, 2 nu Yesu nu beigisibwa bage bamaninwe nu bo kuko ku kisagulo. 3 Gasilile mazi ma biguma, nina wa Yesu amubwide bunee: “Tabeli lingo na mazi ma biguma.” 4 Tondo Yesu amwakwide bunee: “Mukikulu, kikizi kili gatusamba, Nne nu uwe? Nkungu zane tazikuka.” 5 Nina wa Yesu abwide bakiti ba numba bunee: “Mukite kinsania kyamutende.” 6 Gago gabezaga malega mutuba ma makozi mabikagwa ku mazi ma koga anga lukita lwa milembe za baYuda. Nalyo nalyo na lyakukaga bwigi na litres makumi kinana, aba litres lukama lumozi nu makumi mabili. 7 Yesu ababwide bunee: “Mwizazie malega mamano na mazi.” Bameizazizie bundo, 8 nu abatendile bunee: “Mutage kano kaluma mazi makeke ku mamo, nu mwekemo kuli mukota wa kisagulo.” Bamwekede mo. 9 Nu Mukota wa musanganano asondile ku mazi magalukizibwe mazi ma biguma. Ntamenyine kuni kumatukile, tondo babo bakiti batagaga mazi babumenyine; 10 amanine musongi, nu amubwide bunee: “Muntu unsania akukasana tanga mazi ma biguma masoga, kusila nti bakasana mamo meteli masoga ndi basila kwikuta mamo masoga. Tondo uwe walangile mamo masoga nunse aaba nu kano kaluma.”
11 Bubo bwabede mu Kana wa Galilaya, Yesu akitile mugeleko mutangi. Alolesizie lutanuno lwage nu beigisibwa bage bamukatizizie.
12 Kusila kwa bubo, akumbile ku mwino wa Kapernaumu gamozi na nina nu mibuto zage nu beigisibwa bage, nu basigede kuko bindi bikeke.
Yesu mu Numba za Kukumbamina
13 Gabede nkungu za Kisagulo ky'Isuluko kya baYuda ziseli bwigi, Yesu abakamine ku Yerusalema. 14 Asangile bantu beikala mu numba za kukumbamina bakukunzia ngombe, mikoko nu nkulimba, nu bantu ba kugalukya bikulo. 15 Nu akitile kasusula ka mizigi, nu eimbizie bansania mu numba za kukumbamina, nu mikoko nu ngombe, nu abalanganizie binkulumba bya babo bagalukagia bikulo, nu atulungwide meza mabo. 16 Nu atendile ku bakunzia ba nkulimba bunee: “Tikyazi zeno gano! Tamukite numba za Tatane kuba anga numba za kukunziziamo!” 17 Beigisibwa bage bakengede idagi lyasanzilwe bunee: “Lugi lwa numba zobe lukundia.” a
18 BaYuda bamubuzizie bunee: “Mugeleko mukizi u ukutulolesia buno uli na bwangato bwa kukita bubo?” 19 Yesu abakwide bunee: “Gusiazi zeno numba za kukumbamina, nu mu bindi bisatu nti nazobake lingo.” 20 BaYuda bamubuzizie lingo bunee: “Bobakile numba zeno za kukumbamina mu myaka makumi manazi nu mutuba, nu uwe, u wazobake lingo mu bindi bisatu?”
21 Tondo numba za kukumbamina zatendaga Yesu zabezaga mubili wage. 22 Kumbusa kwa kuyuka kwa Yesu kutuka ku bakuzi, beigisibwa bage bakengede buno atendile bubo, nu bakatizizie Masanzo nu idagi lyatendile Yesu.
Yesu Amenyine Binsania Bili mu Bantu
23 Mu nkungu zabezaga Yesu mu Yerusalema, ku Kisagulo ky'Isuluko, beingi bamukatizizie ku kumona ku miganogano zaakitaga. 24 Tondo Yesu ntabeitabizagia, kubuno abezaga ebeizi bobansania, 25 nu nteiyaninaga muntu umozi kumutenda misagu za bantu, kubuno wenyene abezaga eizi buli munda mwa mutima wa muntu na muntu.