Yesu nu Nikodemo
3
1 Kwabezaga, munkatini mwa baFarisayo, muntu umozi munene, umozi wamanagwa Nikodemo, nu abezaga mwangati wa baYuda. 2 Avule ku Yesu mu kindi nu amutendile bunee: “Rabbi, twizi buno uli musozi watukile ku Kalaga, kubuno takuli muntu wampa unavwama kukita miganogano zeno anga buukuzikita ndi Kalaga nteli gamozi nage.” 3 Yesu amwakwide bunee: “Lebelebe, ndi muntu ntabutwa limbizi lya mabili, nti ntanavwama kumona ku bukota bwa Kalaga.” 4 Nikodemo amubuzizie bunee: “Buni bunabutwa lingo muntu nu we eseli mukungu? Ndi anavwama kusubya limbizi lya mabili munda za nina nu kubutwa lingo?” 5 Yesu amwakwide bunee: “Lebelebe nkukubula bunee: ‘Ndi muntu ntabutwa ku mazi nu ku Muuza, ntanavwama kwingila mu bukota bwa Kalaga.’ 6 Kyabutwa ku mubili nti kili mubili, nu kyabutwa ku Muuza nti kya Muuza. 7 Ntwangame kubuno nakubula bunee: ‘Mwatunganana kubutwa lingo limbizi lya mabili. 8 Lumpumpu lukupupa kulukutunda, nu nti ukungwa kazege galukutinga, tondo ntwizi kuni kulukutuka nu kuni kulukwenda. Bubo u buli muntu unsania wabutwa ku Muuza.’” 9 Nikodemo amubuzizie lingo bunee: “Buni bunaba bubo?” 10 Yesu amwakwide bunee: “Uli musozi munene wa Israeli nu ntwizi bitondo bibino?” 11 Lebelebe nkukubula bunee: “Tukutenda bubo butwizi nu tukulongekela bubo butwamonineko, nu inyuwe tamwitabizia bulongeki bweitu. 12 Ndi tamwankatizia ganamutendile bitondo bya mu kisi, buni bumwakatizie ndi nkumutenda bitondo bya mwigulu? 13 Takuli aba muntu umozi wabakamine mwigulu, umpanga wozo Mwana wa Muntu watukile mwigulu. 14 Nu anga bwasakikile Musa nzoka g'iyango mu kalula, ububo Mwana wa Bantu atunganana kusakikwa, 15 buno muntu unsania wamukatizia abe na kalamo katanakuzinda. 16 Kubuno Kalaga itide nunse kutunda ba ga kisi, akasenne Mwana wage wa ngomo, buno muntu unsania wamukatizia, ntazimine, tondo abe na kalamo katanakuzinda. 17 Kubuno Kalaga ntasingile Mwana wage buno asungie kisi, tondo kisi kyonibwe mweli.
18 Wozo wakatizia Mwana ntanasungibwa, tondo wozo utamukatizia, asila kusungibwa, kubuno ntakatizia izina lya Mwana wa ngomo wa Kalaga. 19 Lolazi, luluno u lusungio: Kyengi kyavule ku kisi, tondo bantu batundile kapilo kutinga kyengi, kubuno bakukitaga bubi. 20 Muntu unsania ukukita bubi akusomba kyengi nu ntakubasa kuli kyengi, kubuno eli na boba buno misako zage mibi zinavwa kumonekako bwasibwasi. 21 Tondo wozo ukukitaga misako za bulili akuvwa ku kyengi, buno misako zage zimonekeko bwasibwasi buno zili misoga kuli Kalaga.”
Yesu nu Yoana Mututiki
22 Kumbusa kwa bubo, Yesu gamozi na beigisibwa bage bendile ku kisi kya Yudea. Eikede nabo kuko nkungu nkeke, nu atutikile. 23 Yoana nu we, atutikaga ku Ainoni, bwigi na Salimu, kubuno kuko kwabezaga mazi mengi. Bantu bavwaga kweli, nu abatutikile. 24 Kubuno Yoana abezaga ntebikwa mu kikando.
25 Beigisibwa bamozi ba Yoana balingile myango na muYuda umozi ku kabamba ka meigisia ma kwengibwa. 26 Bendile ku Yoana nu bamutendile bunee: “Musozi, wozo muntu wabezaga gamozi nobe ku lisilya lya Yordani, nu we u walongekelaga, lola, we es'atutikaga, nu bansania bakwenda kweli!” 27 Yoana akwide bunee: “Muntu ntanamona kampa keteli kaakasilwe kutuka mwigulu. 28 Inyuwe mubenyene muli balongeki bane buno natendile bunee: ‘Nne nsili Kristo, tondo nasingilwe lwabusio lwage.’ 29 Wozo uli na mwakali, nti u musongi; tondo kilemba kya musongi akwemana bwigi nage nu kumungwilila, eli na mbogimbogi nnene ku kabamba k'iyuki lya musongi. Bubo buli mbogimbogi zane, nu kano kaluma zazindilila. 30 Lukumu lwage lwatunganana kuba lunene, nu lwane nti lwasigulila.”
Wozo Watukile Kwigulu
31 Wozo watuka kwigulu eli gantata ga binsania, wozo uli wa ga kisi, eli wa kisi, nu akutenda anga uli wa kisi. Wozo ukutuka kwigulu eli gantata ga binsania, 32 nu akulongekela bwamonineko nu bwonguleko, tondo takuli muntu wampa ukwitabizia bulongeki bwage. 33 Wozo witabizia bulongeki bwage nti abikwa kamenyikilo buno Kalaga eli bulili. 34 Kubuno wozo wasingilwe na Kalaga akutenda bitondo bya Kalaga; Kalaga akumukasa nunse Muuza wage. 35 Isi akutunda Mwana wage, nu abikile binsania mu maboko mage. 36 Wozo wakatizia Mwana eli na kalamo katanakuzinda, tondo wozo utakatizia Mwana, ntabe na kalamo kako, tondo bongoa bwa Kalaga buli gantata gage.