Yesu nu Mukikulu wa ku Samaria
4
1 Mukota amenyine buno baFarisayo bongule buno Yesu akuluta bantu nu akututika beigisibwa beingi kutinga Yoana, 2 tondo Yesu wenyene ntatutikile muntu wampa, umpanga beigisibwa bage u babatutikile. 3 Ububo atukile ku Yudea nu asubizie lingo ku Galilaya. 4 Nu bwabezaga bwatunganana buno atinge ku Samaria. 5 Abasile mu mwino umozi wa ku Samaria, wamanagwa Sikari, guli bwigi n'isoa lyakasanaga Yakobo ku mwana wage Yosefu. 6 Nu kuko, kwabezaga Kanuabalongo ka Yakobo. Nu kubuno Yesu abezaga es'akutwa na lugendo, eikede mu ntungo mwa kanuabalongo. Zabezaga zise zakuka bwigi na nkungu mutuba.
7 Mukikulu umozi wa ku Samaria abasile kutaga mazi, Yesu amubwide bunee: “Nkase mazi ma kunua.” 8 Kubuno beigisibwa bage babezaga benda kukunza idia ku mwino. 9 Wozo mukikulu wa ku Samaria amubuzizie bunee: “Kubuni uwe muYuda ukunsega mazi nu nne nili mukikulu muSamaria? Kubuno baYuda tabagomia na baSamaria.” 10 Yesu amwakwide bunee: “Songo wizi lukaso lwa Kalaga nu nazi wozo ukukubula bunee: ‘Nkase mazi ma kunua!’ Songo unamusegile mazi ma kunua, nu We anakukasile mazi ma kalamo.” 11 Mukikulu amubwide bunee: “Mukota, ntuli na kya kutaga nakyo, nu kanuabalongo keli kazindu nunse. Umpanga kuni kuunamona mamo mazi ma kalamo? 12 Ndi uwe uli mukulu munene kutinga tateiswe Yakobo watukasile kakano kanuabalongo nu wenyene anune gako, gamozi na bana bage nu nyama zage?” 13 Yesu amwakwide bunee: “Muntu unsania wanua ku mazi mamano anaba na mpusia lingo. 14 Tondo wozo ukunua ku mazi mankumukasa, ntakakua na mpusia lingo, kubuno mazi mankumukasa makaba mweli anga kanuabalongo kakukulungukaga ka mazi ma kalamo, nu mamukase kalamo katanakuzinda.” 15 Mukikulu amubwide bunee: “Mukota, nkase ku mamo mazi, buno nsikue na mpusia lingo nu nsivwe lingo gano kutaga mazi.”
16 Yesu amutendile bunee: “Enda umane iba wobe, nu uvwe lingo gano.” 17 Mukikulu amubwide bunee: “Nsili na wamulume.” Yesu amwakwide bunee: “Watenda busoga buwatenda bunee: ‘Nne nsili na wamulume;’ 18 kubuno wabezaga na bamulume batano, nu wamulume wozo u uli nage kano kaluma, nteli iba wobe. Ku kikyo kitondo watenda buligo.” 19 Mukikulu amubwide bunee: “Mukota, namona buno uli mulengania. 20 Batateiswe bakumbaminaga Kalaga gantata ga wono mwiduko, tondo inyuwe mukutenda buno kiziki kyatunganana ku kukumbamina Kalaga kili ku Yerusalema.” 21 Yesu amwakwide bunee: “Mukikulu, nkatizie buno nkungu zavwe zimutakakumbamina Tatane ga mwiduko wono aba ku Yerusalema. 22 Inyuwe baSamaria tamwizi nunse wozo u mukukumbamina. Iswe baYuda twizi wozo u tukukumbamina, kubuno lonio lukutuka ku baYuda. 23 Tondo nkungu zikuvwa, nu zakuka kano kaluma, buno bakumbamizi ba lebelebe bakumbamine Tatane mu Muuza nu mu bulili, kubuno Tatane akulonda bakumbamizi ba lukita luluno. 24 Kalaga eli muuza, nu babo bakumukumbamina batunganana kumukumbamina mu muuza nu mu bulili.”
25 Mukikulu amubwide bunee: “Nizi buno Masiya akuvwa, wozo wamanwe buno, Kristo. Gaavwe, akatwisulila bitondo binsania.” 26 Yesu amwakwide bunee: “Nne u We, ukukutenda.”
27 Nkungu zezo, beigisibwa ba Yesu basubizie nu bangamine buno Yesu akutenda na mukikulu. Tondo takuli muntu umozi wabwide bunee: “Kikizi kyukulonda aba buni buukutenda nage?”
28 Wozo mukikulu asigile idega lyage nu asubizie ku mwino kusambalila bantu bunee: 29 “Vwazi, mumone ku muntu wantenda bitondo binsania binakitile. Ndi wono ntanaba Kristo?” 30 Batukile ku mwino nu bendile kuli Yesu.
31 Nkungu zezo, beigisibwa ba Yesu bamubuzizie bunee: “Musozi, lia idia tanga.” 32 Tondo abakwide bunee: “Nne nili n'idia lya kulia limuteizi.” 33 Beigisibwa babuzanizie bwabobwabo bunee: “Ndi muntu umozi amuvwilide n'idia?”
34 Yesu ababwide bunee: “Idia lyane lili kukita buli kusombola kwa wozo wansingile nu kuzindilizia mulimo wage. 35 Ndi inyuwe tamukutenda bunee: ‘Kwasigala myezi inazi kwika ku nkungu za kutubula?’ Tondo nkumubula buno: Galaminazi nu lolazi ku masoa mese mela kano kaluma, nu meli kayikayika kutubulwa. 36 Mutubuzi akukaswa mutali nu akukundamania matubulo ku kalamo katanakuzinda buno muyiki nu mutubuzi babogeboge gamozi. 37 Kubuno musumo wono uligo bunee: ‘Muntu umozi akuyika, nu ungo nti akutubula.’ 38 Nne namusingile kutubula ku isoa limutalimine kulyo. Bango balimine gago, nu beinyuwe mwakata mutali wa mulimo wabo.”
39 BaSamaria beingi ba mu mwino wozo bakatizizie Yesu kubuno mukikulu wozo abatendile bunee: “Ambwide bunsania bunakitile.” 40 Ububo baSamaria gabavwilide Yesu, bamubuzizie buno asigale gamozi nabo, nu We eikede kuko bindi bibili. 41 Nu bango beingi bakatizizie ku kabamba ka kusambala kwage. 42 Nu batendile wozo mukikulu bunee: “Ta ku kabamba ka kusambala kwobe, ukinsa twakatizia kano kaluma; kubuno iswe tubenyene twiyungwila, nu twizi nunse buno We eli lebelebe Monia wa kisi.”
Yesu Onezie Mwana wa Muntu Munene
43 Gaatingizizie bindi bibili gago, Yesu atukile kuko nu endile ku Galilaya. 44 Kubuno Yesu wenyene atendile bunee: “Mulengania ntanakaswa lwanzo mu kisi kya kwabo.” 45 Gaabasile ku Galilaya, bantu ba ku Galilaya bamusekede busoga, kubuno bamonine ku binsania byakitile ku Yerusalema, mu nkungu za Kisagulo ky'Isuluko.
46 Ububo Yesu asubizie lingo ku mwino wa Kana ku Galilaya, kuko kwagalukizye mazi kuba mazi ma biguma. Nu ku Kapernaumu, kwabezaga mutonge umozi munene wa bukota, mwana wage abezaga musambi. 47 Gongule wozo mutonge munene buno Yesu atukile ku Yudea nu abasile ku Galilaya, avule kweli nu amusegile nunse kukumba ku Kapernaumu nu konia mwana wage, kubuno abezaga eseli bwigi na kukua. 48 Yesu amubwide bunee: “Tamunakatizia ndi tamukumona ku tulolesio nu ku miganogano.” 49 Wozo mutonge munene wa bukota amwakwide bunee: “Mukota, kumba lwabusio lwa mwana wane ntekua.” 50 Yesu amutendile bunee: “Enda kwobe, mwana wobe alama.” Muntu wozo akatizizie bwamutendile Yesu nu endile. 51 Gaabezaga eseli mu nzila, akulumenne na bakiti bage, nu bamutendile bunee: “Mwana wobe alama.” 52 Ababuzizie nkungu nkizi zalingile kungwa busoga? Nu bamwakwide bunee: “Walubi mu nkungu za mutubakamo muzuzo wasilile.” 53 Isi amenyine buno u nkungu zezo zamubwide Yesu bunee: “Mwana wobe alama.” Nu we nu kikanga kyage kinsania bakatizizie Yesu.
54 Wabezaga mugeleko wa mabili wakitile Yesu, gaatukile ku Yudea kwenda ku Galilaya.