Yesu Onezie Kitunga
5
1 Kumbusa kwa bubo, kwabezaga kisagulo kya baYuda ku Yerusalema, nu Yesu endile kuko. 2 Nu mu Yerusalema, bwigi na Lwibi lwa Mikoko, mwabezaga kiziba kya mazi kyamanagwa mu kiEbrania buno, “Betesaida,” nu kyabezaga na nusu itano, 3 nu mu zezo nusu mwabezaga mwiyombeka basambi beingi: byuku, bitunga, nu boma biganza. Balindilaga kukulunguka kwa mazi, 4 kubuno mwanzelo umozi wa Mukota agelaga mambizi mamozi nu kwingila mu kiziba nu kukulungula mazi. Nu wozo musambi walinga kwidekela mu mazi mamo kusila kwa kukulunguka kwa mazi, nti lusambo lwage lwona. 5 Kuko kwabezaga muntu umozi wabezaga musambi kutukila myaka makumi masatu nu kinana. 6 Yesu amumonineko eiyombeka nu gaamenyine buno eli musambi kutukila bindi byingi, amubuzizie bunee: “Ndi ukutunda konibwa?” 7 Musambi amwakwide bunee: “Tatane, nsili na muntu wa kunisa mu kiziba nkungu zikukulunguka mazi. Nu mu nkungu zinkwenda mumo, nti ungo muntu antanga.” 8 Yesu amubwide bunee: “Emanuka, tola kikala kyobe nu wende.” 9 Kazanga kongo muntu wozo onine; atolile kikala kyage nu alingile kwenda. Busi bubo bwabezaga Busi bwa Kumunwa, u Sabato. 10 Ububo baYuda batendile wozo muntu wonezibwe bunee: “Lelo buli busi bwa Sabato, ntuli na bwangato kweka kikala kyobe!” 11 Abakwide bunee: “Wozo wanonezie antendile bunee: ‘Tola kikala kyobe nu wende.’” 12 Bamubuzizie bunee: “Nazi wozo wakutendile bunee: ‘Tola kikala kyobe nu wende’?” 13 Tondo wozo muntu wonezibwe ntamenyine buno eli nazi, kubuno Yesu eidombwede kutuka mu wozo musanganano wabezaga ku kikyo kiziki.
14 Yesu amusangile mu numba za kukumbamina, nu amubwide bunee: “Lola, wasila kona, ntukite bwagi lingo, unavwa kubasa ku kitondo kibibu nunse kutinga.” 15 Wozo muntu endile nu asambalide baYuda buno Yesu u wamonezie. 16 Ku kabamba kako, baYuda bayangile Yesu buno bamusungie, kubuno akitile kitondo kikyo mu Busi bwa Kumunwa, u Sabato. 17 Tondo Yesu abakwide bunee: “Tatane akukitaga mulimo bindi binsania, aaba nu kano kaluma, nu nne tondo, nkukita mulimo.”
18 Ku kabamba kako, baYuda bitide kulonda bubanamwita, ta umpanga ku kabamba ka kwita milembe za Busi bwa Kumunwa, tondo lingo ku kabamba ka buno atendile buno Kalaga eli Isi nu eigelamizie wenyene na Kalaga.
Bwangato bwa Mwana wa Kalaga
19 Umpanga Yesu abakwide bunee: “Lebelebe, nkumutenda buno, Mwana ntanakita kampa We wenyene, tondo akukita tugu bubo bwakumona Isi akukita. Kubuno binsania bikukita Isi, u bibyo nubyo bikukita Mwana nu We. 20 Kubuno Isi akutunda Mwana nu akumulolesia binsania byakukita wenyene nu amulolesie milimo minene kutinga zeno buno mwangame nazo. 21 Kubuno anga bukuyukagia Isi bantu kutuka ku bakuzi nu kubakasa kalamo, u bubo Mwana nu We akukasana kalamo ku babo baakutunda. 22 Nu Isi ntakusungia muntu wampa, tondo akasenne kusungia kunsania ku Mwana wage, 23 buno bantu bansania banze Mwana anga bubakwanza Isi. Wozo utakwanza Mwana, nti ntakwanza Isi wamusingile.
24 Lebelebe nkumubula buno, wozo ukungwa ku idagi lyane nu kukatizia wozo wansingile, eli na kalamo katanakuzinda. Ntakasungibwa lingo, tondo asila kutuka ku lukuo nu kwingila mu kalamo. 25 Lebelebe nkumubula bunee: ‘Nkungu zavwa, nu ziseligo kano kaluma, zungwe bakuzi ku iyuki lya Mwana wa Kalaga, nu babo bongwe kulyo nti balame. 26 Kubuno anga buli Tatane na kalamo mweli wenyene, u bubo bwakasile nu We Mwana kuba na kalamo mweli wenyene. 27 Nu amukasile bwangato bwa kusungia bantu, kubuno eli Mwana wa Bantu. 28 Tamwangame ku kikino kitondo, kubuno nkungu zikavwa, nkungu zezo bakuzi bansania beli mu nsinda bongwe ku iyuki lyage, 29 nu bayuke kutuka mu nsinda zabo. Babo bakitile busoga, ku iyukilo lya kalamo, tondo babo bakitile bubi, ku iyukilo lya lusungio.’
Migeleko za Yesu Zikulolesia Bwangato Bwage
30 Nne nsinavwama kukita kitondo kyampa nnenyene: tondo anga bunkungwa, u bubo bunkusungia; nu lusungio lwane lwisanana, kubuno nsikulonda kusombola kwane nnenyene, tondo kusombola kwa wozo wansingile. 31 Ndi nne u ukwidongekela, kasi nti bulongeki bwane tabuli bwa bulili. 32 Tondo kuli ungo ukundongekela, nu nizi buno bulongeki bwage bwakundongekela buli bwa bulili. 33 Inyuwe mwasingile migenzi kuli Yoana, nu alongekede buli bulili. 34 Kundi, nsikulongekelwa na muntu wampa, tondo nkutenda bubuno buno mwonibwe. 35 Yoana abezaga anga kasuku kabangibwa nu kakusana, nu inyuwe mwatundaga kubogaboga mu kyengi kyage nkungu nkeke. 36 Tondo nne nili na bulongeki bumozi bwatinga bubo bwa Yoana, kubuno milimo zankasile Tatane nizizindilizie, u zezo zinkukita, nu zo zikundongekela buno Tatane ansingile. 37 Nu Tatane wansingile, andongekede wenyene. Tamungwaga ku iyuki lyage aba tamwamonine ku malanga mage. 38 Tamukulanga idagi lyage mu mitima zeinyu, kubuno tamukukatizia wozo wasingilwe nage. 39 Mukulonda mu Masanzo kubuno mukukengela buno mumo munamona kalamo katanakuzinda, nu mamo u makuntendela. 40 Nu tamukuziga kuvwa kundi buno mube na kalamo!
41 Nsikukaswa lutanuno ku bantu. 42 Tondo nimwizi buno lutundo lwa Kalaga taluli mu muli. 43 Navule ku izina lya Tatane, tondo tamwansekede. Tondo ndi ungo avwa ku izina lyage wenyene, nti mwamusekele! 44 Buni bumunakatizia inyuwe bakukasana lutanuno bweinyubweinyu, nu tamukulonda lutanuno lukutuka ku Kalaga wenyene? 45 Tondo tamukengele buno nne nkamusongela ku Tatane. Wozo ukumusongela u Musa, u mukulemaninaga. 46 Songo mwakatizizie Musa, songo mwankatizizie nu nne, kubuno asanzile bitondo byane. 47 Tondo ndi tamwakatizia masanzo mage, buni bumunakatizia moki mane?”