Yesu Alisizie Bantu Tununu Tutano
6
1 Kusila kwa bubo, Yesu asokile lisilya lya kitatenge kya Galilaya, kyamanagwa lingo buno Tiberia. 2 Nu musanganano munene wa bantu wamuyangile kubuno bamonaga ku miganogano zaakitile ku konia basambi. 3 Yesu abakamine gantata ga mwiduko nu eikede gago na beigisibwa bage. 4 Nu kisagulo kya baYuda ky'Isuluko kyabezaga kiseli bwigi. 5 Yesu alambwide meiso, amonine ku bantu beingi bakuvwa kweli, nu abwide Filipo bunee: “Kuni kutukunza tumpampa twa kulisia babano bantu bansania?” 6 Atendaga bubo tugu ku kugeleka Filipo, kubuno wenyene abezaga eizi bwakite. 7 Filipo amwakwide bunee: “Aba ndi tunakunza tumpampa twa bukunza bwa bindi nkama ibili bya feza, tatunakuka ndi twakasa muntu na muntu nkindi nkeke.” 8 Ungo umozi wa ku beigisibwa bage, u Andrea, muto wa Simoni Petro, amutendile bunee: 9 “Gano geli musikila uli na tumpampa tutano tukeke nu byena bibili, tondo bibyo, ndi byakuka ku bantu beingi anga babano?” 10 Yesu atendile bunee: “Mwikazie babo bantu gansi.” Mu kiziki kikyo mwabezaga bisugu byingi. Nu bamulume beikede gansi. Maganzo ma bamulume mabezaga bwigi na tununu tutano. 11 Yesu atolile tumpampa nu asegile Kalaga, nu abeganizie ku bansania babezaga beikala gago. Akitile bubo ku byena, anga bubatundaga. 12 Gabeikutile, Yesu abwide beigisibwa bunee: “Kunzazi mbobu insania zasigala buno takuzimine kampa.” 13 Ububo bazikunzile nu beizazizie nzi ikumi nu ibili na mbobu za tuto tumpampa tutano zasigede ku babo baliaga. 14 Gamonine bantu ku mugeleko wakitile Yesu, batendile bunee: “Lebelebe muntu wono eli mulengania, wono ukuvwa mu kisi.” 15 Gamenyine Yesu buno bese bavwa kumutola na magala buno bamubike mukota, atukile nu endile lingo ga nkangamo za mwiduko wenyene.
Yesu Atabangile Gantata ga Mazi
16 Gabede busi buseli mwigolo, beigisibwa bage bagelile ku mutili aaba nu kwika ku kitatenge. 17 Beingide mu bwato, nu basokile lisilya lya kitatenge kwenda ku Kapernaumu. Nu kwabezaga kuseli kapilo, nu Yesu abezaga ntebasanga. 18 Kwabezaga bimpumi binene mu kitatenge, kubuno kwapupaga lumpumpu lukali nunse. 19 Gabalugile bwato kwenda bwigi na kilometres bitano aba mutuba, bamonine ku Yesu akutabanga gantata ga mazi, nu abasile bwigi na bwato, nu bakule boba nunse. 20 Tondo Yesu ababwide bunee: “Nne u wono; tamukue boba.” 21 Beitabizizie na mbogimbogi kumweka mu bwato, nu kazanga kongo, bwato bwabasile ku kiziki kibendaga kukyo.
Bantu Balondile Yesu
22 Gakede busi, musanganano wa bantu basigede ku lisilya lya kitatenge, bamenyine buno kuko kwabezaga bwato bumozi tugu, nu bamenyine buno Yesu nteingide mu bubo bwato gamozi na beigisibwa bage, tondo beigisibwa bage bendile bobenyene tugu. 23 Mango maato matukaga ku Tiberia mabasile bwigi na kiziki kibaliaga ku tumpampa, gasilile Mukota kusega Kalaga. 24 Gamonine bantu ba musanganano buno Yesu nu beigisibwa bage tabeli gago, beingide mu maato kwenda ku Kapernaumu kumulonda.
25 Gabasangile Yesu ku lisilya lya kitatenge, bamubuzizie bunee: “Musozi, nkungu nkizi ziwabasile gano?” 26 Yesu abakwide bunee: “Lebelebe nkumubula bunee: ‘Mukundonda ta kubuno mwamonine ku miganogano, tondo kubuno mwalide tumpampa nu mwikutile. 27 Tamukite mulimo ku kabamba k'idia lyakubiga, tondo ku kabamba ka lilyo likwizizia nu likulusia kalamo katanakuzinda. Lilyo lyamukase Mwana wa Bantu, kubuno We u wabikilwe kamenyikilo n'Isi, u Kalaga.’” 28 Bamubuzizie bunee: “Buni butunakita buno tukite milimo za Kalaga?” 29 Yesu abakwide bunee: “Wono u mulimo wa Kalaga, mukatizie wozo wasingilwe nage.” 30 Bamubwide bunee: “Mugeleko mukizi u unakita buno tukukatizie? Wakite mulimo mukizi? 31 Batateiswe baliaga mana mu kalula anga bukutenda masanzo bunee: ‘Abakasile kampampa katukaga mwigulu.’” 32 Yesu ababwide bunee: “Lebelebe, nkumubula bunee: ‘Ta Musa u wamukasile kampampa kutuka mwigulu, tondo Tatane akumukasa kampampa ka bulili kakutuka mwigulu. 33 Kubuno kampampa ka Kalaga u wozo ukugela kutuka mwigulu nu kukasa kalamo ku bantu.’” 34 Bamubwide bunee: “Mukota, tukasage kampampa bindi binsania.” 35 Yesu ababwide bunee: “Nne nili kampampa ka kalamo. Wozo wavwa kundi ntakakua na nzala, nu wozo wankatizia ntakakua na mpusia lingo. 36 Namutendile: Mwammonineko, nu tamwakatizizie. 37 Babo bansania bankasile Tatane bavwe kundi, nu wozo wavwa kundi nsikamwisa kumbuga nunse. 38 Kubuno natukile mwigulu buno nsikite kusombola kwane, tondo kusombola kwa wozo wansingile. 39 Nu kukuno u kusombola kwa wozo wansingile, buno nsizimizie umozi ku babo bankasile, tondo nimuyukye ku busi buzinda. 40 Nu bubuno u kusombola kwa Tatane, buno: Na muntu unsania wamona ku Mwana nu kumukatizia, eli na kalamo katanakuzinda, nu nne namuyukye kutuka ku bakuzi ku busi buzinda.”
41 BaYuda babede na manungunungu ku Yesu kubuno atendile bunee: “Nne nili kampampa katukile mwigulu.” 42 Batendile bunee: “Ndi ta wono u Yesu, Mwana wa Yosefu, nu twizi isi nu nina? Kubuni akutenda kano kaluma buno atukile mwigulu?” 43 Yesu abakwide bunee: “Tamube na manungunungu gamusamba. 44 Takuli muntu wampa unavwama kuvwa kundi ndi ntalutwa na Tatane wansingile, nu Nne namuyukye kutuka ku bakuzi ku busi buzinda. 45 Bwasanzilwe mu mikanda za balengania bunee: ‘Bantu bansania bakeigisibwa na Kalaga.’ Muntu unsania ukungwa Tatane nu ukukata meigisia mage, nti avwa kundi. 46 Bubo tabuli kutenda buno kuli muntu wamonine ku Tatane; umpanga wozo watukile ku Kalaga, We u wamonine ku Tatane.
47 Lebelebe nkumubula buno, wozo wankatizia, eli na kalamo katanakuzinda. 48 Nne nili kampampa ka kalamo. 49 Basoinyuwe balide mana mu kalula, nu bakule. 50 Tondo Wono u kampampa katukile mwigulu buno wozo walia kuko ntakue. 51 Nili kampampa ka kalamo katukile mwigulu. Ndi muntu alia ku kampampa kakano, akalamaga kalamo katanakuzinda, nu kampampa kanakasane u mubili wane u nkukasana buno kisi kibe na kalamo.”
52 BaYuda bakananizanizie nunse bwabobwabo nu batendile bunee: “Buni bunavwama muntu wono kutukasa mubili wage buno tugulie?” 53 Yesu ababwide bunee: “Ndi tamwalia ku mubili wa Mwana wa Bantu nu kunua mikila zage, mumuli nti tamuli kalamo. 54 Unsania ukulia mubili wane nu kunua mikila zane, eli na kalamo katanakuzinda nu Nne nkamuyukya kutuka ku bakuzi ku busi buzinda. 55 Kubuno mubili wane guli lebelebe idia lya bulili, nu mikila zane zili nunse za kunua. 56 Wozo walia mubili wane nu kunua mikila zane, akulama mundi, nu nne nkulama mweli. 57 Anga bubo bwansingile Tatane uli mulami, nu nne nkulama ku Tatane, ububo wozo wandia, akalamaga mundi. 58 Wono u kampampa katukile mwigulu. Takeli anga kako kaliaga basoinyuwe. Balide mana nu bakule. Tondo wozo walia ku kampampa kakano, alamage kalamo katanakuzinda.” 59 Yesu atendile bitondo bibino nkungu zigisagia mu numba za misanganano ku Kapernaumu.
Meigisia ma Kalamo Katanakuzinda
60 Gongule beigisibwa bage bamozi ku bubo, batendile bunee: “Meigisia mamo meli mabibu kwitabizia. Nazi unamongwilila?” 61 Yesu amenyaga wenyene buno beigisibwa bage bakwizuzuma ku meigisia mamano, nu ababwide bunee: “Ndi meigisia mamano makumwinia mitima? 62 Buni bwabe ndi mwamone Mwana wa Bantu enda kuko kwatukile? 63 Muuza u ukukasanaga kalamo, tondo mubili tagukukita bwampa: moki manamutendaga meli muuza nu meli kalamo. 64 Tondo munkatini mweinyu, kuli bamozi batakatizizie.” (Kubuno kutukila mu kulinga, Yesu abezaga eizi babo batakatizia nu wozo ukamugabula). 65 Atendile lingo bunee: “Ku kabamba kako namutendile buno, takuli muntu umozi unavwama kuvwa kundi ndi Kalaga ntamukasa bwangato.”
66 Kutukila bubo busi, beingi ku beigisibwa bage bamusigile, nu tabamuyangile lingo. 67 Yesu abwide beigisibwa ikumi nu babili bunee: “Nu inyuwe, ndi tamukutunda kwenda?” 68 Simoni Petro amwakwide bunee: “Mukota, twende ku nazi? Uwe uli na meigisia ma kalamo katanakuzinda. 69 Kano kaluma twakatizia nu twizi buno uwe uli Kristo Wasililila watukile ku Kalaga.” 70 Yesu ababuzizie bunee: “Ndi nsyamusombwede inyuwe ikumi nu babili? Nu umozi wa kumuli eli musumbu!” 71 Atendile bubo ku Yuda mwana wa Simoni Iskariota, kubuno we abezaga umozi wa ku babo ikumi nu babili nu we u wamugabule.