Mibuto za Yesu Tazamukatizizie
7
1 Kumbusa kwa bubo, Yesu atabangile mu Galilaya. Ntazigaga kutabanga mu Yudea, kubuno baYuda balondaga kumwita. 2 Nu kisagulo kya baYuda, kikyo kya nusu, kyabezaga kise bwigi. 3 Mibuto za Yesu zamubwide bunee: “Tuka gano nu enda ku Yudea, buno beigisibwa bobe bamone ku milimo ziukukitaga, 4 muntu ntakubisa bwakukita, ndi akutunda kumenywa. Ndi ukukita milimo zeno, nti widolesie ku kisi.” 5 Kubuno aba mibuto zage tabamukatizagia. 6 Yesu ababwide bunee: “Nkungu zane tazikuka, tondo nkungu insania zili nsoga kumuli. 7 Kisi takinamusomba, tondo kyansomba, kubuno nkutenda buno milimo zibakukita zili mibi. 8 Endazi ku kisagulo, tondo nne nsikwenda ku kisagulo kikino, kubuno nkungu zane tazikuka.” 9 Gaasilile kubatenda bubo, asigede ku Galilaya. Yesu ku Kisagulo kya Nusu
10 Gendile mibuto zage ku kisagulo, Yesu nu We endileko, tondo ta bwasibwasi ku bantu, tugu ku lumbisombiso. 11 BaYuda bamulondile ku kisagulo nu babwide bunee: “Kuni kweli?” 12 Nu munkatini mwa musanganano, kwabezaga manungunungu meingi kweli. Bamozi batendile bunee: “Eli muntu musoga,” nu bango batendile bunee: “Kilo, akwengelela bantu.” 13 Tondo takwabezaga muntu wampa watendaga bwasibwasi bitondo byage, kubuno bakuaga baYuda boba.
14 Gatingile bindi bimozi bya kisagulo, Yesu eingide mu numba za kukumbamina nu eigisizie. 15 BaYuda bangamine nu babwide bunee: “Nu buni bukumenya muntu wono masanzo nu nteigisizibwe?” 16 Yesu abakwide bunee: “Meigisia mankwigisia tameli mane, tondo makutuka ku wozo wansingile. 17 Ndi muntu akutunda kukita kusombola kwa Kalaga, nti anamenya buno ndi meigisia mamo makutuka ku Kalaga aba ndi nkumatenda nnenyene tugu. 18 Wozo muntu ukutenda ku bwangato bwage wenyene, nti akulonda lutanuno lwage wenyene, tondo wozo ukulonda lutanuno lwa wozo wamusingile, wozo nti eli wisanana nu mweli tamuli bwengelezi. 19 Ndi Musa ntamukasile milembe? Nu takuli muntu wampa kumuli wanzile mulembe. Kubuni kumukulonda kunita?” 20 Musanganano wamutendile bunee: “Uli na musumbu! Nazi ukulonda kukwita?” 21 Yesu abakwide bunee: “Nakitile mulimo umozi musoga nu inyuwe bansania mwangamine nago. 22 Kubuno Musa amukakizizie kumonesia bana bamulume (Ta kubuno Musa u walingile kitondo kikyo, tondo kyatukile ku basonguluinyuwe) nu mwitabizia kumonesia bamozi ku busi bwa Sabato. 23 Ndi mwamonesia mwana Busi bwa Kumunwa, u Sabato, buno munavwa kukagula milembe za Musa, kubuni muli na bongoa kundi kubuno nonezie muntu ku Busi bwa Kumunwa? 24 Tamusungie lusungio lwa bwengelezi, tondo sungiazi muntu ku bwisanana.”
Ndi Yesu eli Kristo?
25 Bantu bamozi ba ku Yerusalema babwide bunee: “Ndi muntu wono ta wozo u bakulonda kwita? 26 Lolazi bwakutenda bwasibwasi nu tabakumutenda kampa! Ndi bakota beitu beizi lebelebe buno wono eli Kristo? 27 Tondo wono, twizi kwatukile, nu gakavwa Kristo, takuli muntu wampa ukamenya buno eli wa kuni.”
28 Yesu eigisagia mu numba za kukumbamina, nu alalukile bunee: “Munizi nu mwizi kuni kunatukile. Nsyavule ku kabamba kane, tondo Wozo wansingile eli wisanana, nu tamumwizi. 29 Tondo nne nimwizi kubuno natukile kwage nu We ansingile.” 30 Balondile kumukata, tondo takwabezaga muntu wampa wabikile kuboko kwage gantata gage, kubuno nkungu zage zabezaga tazikuka. 31 Mu musanganano wozo, bantu beingi bamukatizizie. Batendile bunee: “Gakavwa Kristo, ndi akakita miganogano mingi kutinga zakita wono?”
Balangi ba Numba za Kukumbamina Basingilwe Kukata Yesu
32 BaFarisayo bongule bukwizuzuma musanganano ku kabamba ka Yesu; basankoga banene nu baFarisayo, basingile balangi ba numba za kukumbamina kukata Yesu. 33 Yesu abwide bunee: “Nne nikili gamozi n'inyuwe nkungu nkeke, kusila nti nenda ku Wozo wansingile. 34 Mwandonde, nu tamwammoneko, nu kuko kunabe tamunavwama kwenda ko.” 35 BaYuda babuzanizie bwabobwabo bunee: “Kuni kwende buno tatukamumonako? Ndi ende ku baYuda babalangenne ku miino za baGriki nu ku beigisia? 36 Bwisulilwa bukizi bwa kitondo kikino kyatendile bunee: ‘Mwandonde nu tamwammoneko, nu kuko kunabe tamunavwama kwendako?’”
Nuuzi za Mazi ma Kalamo
37 Busi buzinda bwa kisagulo, bwabezaga busi bunene bwakyo. Busi bubo, Yesu emanine nu alalukile bunee: “Ndi muntu eli na mpusia, nti avwa kundi nu anue. 38 Wozo wankatizia, munda mwage mukagela nuuzi za mazi makulusia kalamo, anga bukutenda Masanzo.” 39 (Yesu atendile bitondo bibino ku kabamba ka Muuza Wasililila abezaga ntevwa kubuno Yesu abezaga nteganunwa.)
Musanganano Widekanukizie ku Kabamba ka Yesu
40 Bantu bamozi ba musanganano, gabasilile kungwa ku bitondo bibino, batendile bunee: “Lebelebe wono eli Mulengania.” 41 Bango batendile bunee: “Wono eli Kristo.” Nu bango batendile bunee: “Ndi ku Galilaya u kwatunganana kutuka Kristo? 42 Ndi masanzo tamakutenda buno Kristo akatuka mu kikanga kya Davidi, nu ku Betelehemu, mwino wikalaga mu Davidi?” 43 Ububo musanganano widekanukizie ku kabamba kage. 44 Bamozi kubeli batundile kumukata, tondo takuli muntu umozi wamukatileko.
Kutakatizia kwa Bakota ba BaYuda
45 Balangi ba numba za kukumbamina basubizie ku basankoga banene: nu ku baFarisayo, nu bo bababuzizie bunee: “Kubuni tamwavwa nage?” 46 Balangi babakwide bunee: “Takuli muntu wampa unatenda anga bukutenda wozo muntu.” 47 BaFarisayo bababuzizie lingo bunee: “Ndi nu inyuwe amwengelede? 48 Ndi kuli umozi wa ku bakota ba baFarisayo wamukatizizie? 49 Tondo bantu babo ba musanganano beteizi milembe za Musa baswililwe!” 50 Nikodemo, wozo walingile kuvwa ku Yesu mu kindi, abezaga umozi wa ku babo baFarisayo, nu ababwide bunee: 51 “Ndi milembe zeitu zikusungia muntu geteli kungwa ku bwakutenda nu kusongolola bwakitile?” 52 Bamwakwide bunee: “Ndi uli nu uwe wa ku Galilaya? Iyigisie masanzo nu wamone buno takuli mulengania umozi watukile ku Galilaya.” 53 Nu na muntu na muntu endile ku numba zage.