Mukikulu Kitazi
8
1 Yesu ku Mwiduko wa Mizeituni. 2 Tondo mu nindunindu nunse, endile lingo mu numba za kukumbamina. Bantu bansania bamuvwilide nu eikede gansi nu abeigizizie. 3 Nu basanzi ba milembe nu baFarisayo bavule kweli na mukikulu umozi u bakatile gaakitaga butazi. Bamubikile lwabusio lwa bansania. 4 Nu babwide Yesu bunee: “Musozi, wono mukikulu akatilwe nkungu zabezaga akukita butazi. 5 Mu milembe zeitu, Musa atukakizizie buno, mukikulu wa lukita luluno eitwe na makozi. Nu uwe, buni buukutenda?” 6 Batendile bubo buno bamulindike, buno bamone nzila za kumusongela, tondo Yesu akumbaminne nu kusanza gansi na munwe. 7 Tondo gabitide kumubuzia, Yesu emanukile nu abatendile bunee: “Wozo uteli na bwagi munkatini mweinyu abe mutangi kumulibula ikozi.” 8 Akumbaminne lingo nu kusanza gansi na munwe. 9 Gabongule ku moki mamano, basongedwe na kalenganio kabo, nu batukile umozi umozi, kulinga tanga na bakulu banene, aaba nu kubasa ku muzinda. Nu Yesu asigede wenyene tugu, gamozi na wozo mukikulu wabezaga wemana gago munkatini mwabo. 10 Nu Yesu akumbamukile, nu amubuzizie bunee: “Kuni kuli bakusongelaga?” 11 Amwakwide bunee: “Mukota, takuli muntu wampa.” Yesu amubwide bunee: “Aba nu nne nsikukusungia: enda, nu ntukite bwagi lingo.” Yesu Eli Kyengi kya Kisi
12 Yesu ababwide lingo bunee: “Nne nili kyengi kya kisi. Wozo wanyanga ntatabange lingo mu kapilo, tondo abe na kyengi kya kalamo.” 13 Ububo baFarisayo bamubwide lingo bunee: “Uwe ukwidongekela uwenyene. Bulongeki bwobe tabuli bwa bulili.” 14 Yesu abakwide bunee: “Aba ndi nkwidongekela nnenyene, nti bunkutenda buli bulili, kubuno nizi kuko kunatukile nu kuko kunkwenda, tondo inyuwe tamwizi kuko kunatukile nu kuko kunkwenda. 15 Inyuwe mukusungia ku lukita lwa mubili, tondo nne nsikusungia muntu wampa. 16 Tondo aba ndi nne nkusungia, nti lusungio lwane luli lwa bulili, kubuno nsili nnenyene ku kusungia, tondo Tatane wansingile eli gamozi na nne. 17 Mu milembe zeinyu mwasanzilwe buno, bulongeki bwa bantu babili buli bwa bulili. 18 Nne nkwidongekela nnenyene, nu Tatane wansingile akundongekela nu We.” 19 Bamubuzizie bunee: “Kuni kuli So?” Yesu akwide bunee: “Tamunizi, aba nu tamwizi Tatane. Songo mwammenyine, songo munamenyine Tatane nu We.”
20 Yesu atendile moki mamo gaabeigisizie mu numba za kukumbamina, mu busio mwabezaga sanduku za mitebe. Takwabezaga muntu wampa wamukatileko kubuno nkungu zage zabezaga tazikuka.
Tamwende Kuko Kunkwenda
21 Yesu ababwide lingo bunee: “Nende nu mwandonde, tondo mwakue mu bwagi bweinyu. Tamunavwama kuvwa kuko kunkwenda.” 22 BaYuda batendile bunee: “Ndi eiyite wenyene? Kubuno atenda buno, tamunavwama kuvwa kuko kunkwenda.” 23 Yesu abakwide bunee: “Muli ba gansi, tondo nne nili wa mwigulu. Muli ba mu kisi kikino, tondo nne nsili wa kisi kikino. 24 Ku kabamba kako namubwide buno mwakue mu bwagi bweinyu. Kubuno ndi tamwakatizia buno nne u We, nti mwakue mu bwagi bweinyu.” 25 Bamubuzizie bunee: “Uli nazi?” Yesu abakwide bunee: “Anga bubo bunamutendile kutukila mu kulinga. 26 Nili na byingi bya kumutenda nu bya kumusungia kubyo. Tondo wozo wansingile eli bulili, nu bubo bunungule kweli u bubo bunkusambala ku kisi.”
27 Tabamenyine buno atendaga musagu w'Isi. 28 Yesu abatendile bunee: “Nkungu zimwasakike Mwana wa Bantu, mwamenyinine buno, nne u We, nu nsikukita kampa nnenyene, tondo anga bwanigisizie Tatane, bubo u bunkutenda. 29 Nu We wansingile eli gamozi na nne: Tatane ntansigile nnenyene; kubuno nkungu insania nkukitaga bukumutananizagia.” 30 Gatendile Yesu bubo bantu beingi bamukatizizie.
Bulili Bwakandule Bantu
31 Yesu abwide babo baYuda bamukatizizie bunee: “Ndi mwanza nunse meigisia mane, nti mwabe beigisibwa bane, 32 nu mwamenye bulili, nu bo bulili nti bwamukandule.” 33 Bamwakwide bunee: “Tuli ba kibuti kya Abrahamu nu tatwabezaga bakobe ba muntu wampa. Kubuni kuunatenda buno tukaba bakandulwa?” 34 Yesu ababwide bunee: “Lebelebe nkumubula buno, muntu unsania ukukitaga bwagi, nti eli mukobe wa bwagi. 35 Mukobe ntakwikalaga mu numba bindi binsania, tondo mwana akwikalaga mumo bindi binsania. 36 Umpanga, ndi Mwana amukandula, nti mwabe bakandulwa nunse. 37 Nizi buno muli ba kibuti kya Abrahamu, tondo mukulonda kunita kubuno idagi lyane talili na kiziki mumuli. 38 Nkutenda bubo bwandolesizie Tatane, tondo inyuwe mukukita bubo bumungule ku soinyuwe.”
39 Bamwakwide bunee: “Tateiswe eli Abrahamu.” Yesu abatendile bunee: “Ndi muli bana ba Abrahamu, kitazi misako za Abrahamu. 40 Tondo kano kaluma mukutunda kunita, nne muntu ukumubula bulili bunungule ku Kalaga. Abrahamu ntakitile bubo. 41 Mukukita milimo za soinyuwe.” Bamubwide bunee: “Iswe tatuli bana babutilwe mu butazi. Tuli na Tateiswe umozi, u Kalaga wenyene.” 42 Yesu ababwide bunee: “Songo Kalaga abezaga buno eli Soinyuwe, songo munantundile, kubuno natukile ku Kalaga. Nsyavule ku kusombola kwane nnenyene, tondo We u wansingile. 43 Kubuni tamukusongolola bunkutenda? Kubuno tamukuvwama kungwilila idagi lyane. 44 Satana u soinyuwe nu mukutunda kukita ntundo za soinyuwe. Satana abezaga mwiti kutukila mu kulinga nu ntabezaga emana mu bulili, kubuno mweli tamuli bulili. Nkungu zakutenda buza, akutenda bitondo bikutuka mweli wenyene kubuno eli muza nu eli isi wa buza. 45 Nu nne, ku kabamba ka buno nkutenda bulili, tamukunkatizia! 46 Nazi wa kumuli unavwama kunkokomeka buno nili mwagi? Ndi nkutenda bulili, kubuni tamukunkatizia? 47 Wozo uli wa Kalaga akungwilila malagi ma Kalaga. Tondo inyuwe tamukunnungwilila, kubuno tamuli ba Kalaga.”
Yesu nu Abrahamu
48 BaYuda bamwakwide bunee: “Ndi butukutenda tabuligo buno uli muSamaria nu muguli muli musumbu?” 49 Yesu akwide bunee: “Nsili na musumbu, tondo nkwanza Tatane, nu inyuwe tamukunanza. 50 Nu nne nsikulonda lutanuno lwane. Kuli umozi ukululonda nu ukusungia. 51 Lebelebe nkumubula buno, ndi muntu umozi anza idagi lyane, nti ntakakua nunse.” 52 BaYuda bamubwide bunee: “Kano kaluma twizi lebelebe buno muguli muli musumbu. Abrahamu akule, balengania nu bo bakule. Nu uwe ukutenda buno, ndi muntu umozi alanga idagi lyane, ntakakua nunse. 53 Ndi uwe uli munene kutinga tateiswe Abrahamu wakule? Balengania nu bo bakule. Ukwikengela buno uli nazi?” 54 Yesu akwide bunee: “Ndi niganuna nnenyene, nti luganuno lwane luli buliabulia. Wozo ukunganuna eli Tatane, wozo u mukutenda buno eli Kalaga weinyu. 55 Nu inyuwe tamumwizi, tondo nne nimwizi. Songo nkutenda buno nsimwizi, songo ninabede muza anga inyuwe. Tondo nimwizi nu nkwanza idagi lyage. 56 Soinyuwe Abrahamu abogilebogile kukengela buno amone ku busi bwane, abumonineko nu abede na mbogimbogi.” 57 BaYuda bamubwide bunee: “Uwe ntuba na myaka makumi matano, nu ukutenda buno wamonine ku Abrahamu?” 58 Yesu abakwide bubo: “Lebelebe nkumubula buno, lwabusio lwa Abrahamu ntebutwa, nne nti nili.” 59 Basongezye makozi buno bamulibulemo, tondo Yesu eibisile nu atukile mu numba za kukumbamina, nu atingile munkatini mwabo nu endile.