Yesu Onezie Muntu Wabutilwe Kyuku
9
1 Gabezaga Yesu es'atinga, amonine ku muntu wabutilwe kyuku. 2 Beigisibwa bage bamubuzizie bunee: “Rabbi, nazi wakitile bwagi, ndi wono muntu, aba ndi babuti bage, ukinsa abutilwe kyuku?” 3 Yesu akwide bunee: “Ta kubuno we, aba babuti bakitile bwagi, tondo buno milimo za Kalaga zimonekeko mweli. 4 Bwatunganana nikite milimo za wozo wansingile kungwa musi ukiligo, kubuno ndi busi bwida, nti muntu ntanavwama kukita mulimo. 5 Nkungu zinili mu kisi, nne nili kyengi kya kisi.” 6 Gaasilile kutenda bubo, aswide matazi gansi, nu aswede bisogo na munwe, nu abibongezie ku meiso ma kyuku, 7 nu amutendile bunee: “Enda woge ku meiso ga Kanuabalongo ka Siloamu.” (Bwisulilwa bw'izina lilyo buli Musingwa.) Ububo kyuku endile kuko nu ogile ku meiso nu asubizie es'amona busoga. 8 Banyage nu babo bamumonagako wakalazi eli kyuku nu mutuluki, batendile bunee: “Ndi ta wozo muntu u wikalagile gansi nu kusegasega bantu?” 9 Bamozi batendile bunee: “U wozo.” Bango batendile bunee: “Kilo, ta wozo, tondo amususania.” Tondo we wenyene atendile bunee: “Nne u we.” 10 Bamubwide bunee: “Buni bwazibukile meiso mobe?” 11 Abakwide bunee: “Muntu ukumanwa Yesu aswede bisogo na munwe wage nu ambongezie byo ku meiso, nu ambwide bunee: ‘Enda woge ku Kanuabalongo ka Siloamu.’ Ububo nendile koga, nu namonine.” 12 Bamubuzizie lingo bunee: “Kuni kuli wozo muntu?” Akwide bunee: “Nsizi.”
BaFarisayo Babuzizie Kyuku Buni Bwesamona
13 Nu bendile na wozo wabezaga kyuku ku baFarisayo. 14 Busi bwaswede Yesu bisogo nu kumuzibula meiso bwabezaga Busi bwa Kumunwa, u Sabato. 15 BaFarisayo nu bo bamubuzizie lingo bunee: “Buni buwavwamine kumona?” Nu abakwide bunee: “We ambongezie bisogo ku meiso, nu nogile, nu kano kaluma nisenamona.” 16 BaFarisayo bamozi batendile bunee: “Muntu wono ntatukile ku Kalaga, kubuno ntakwanza mulembe wa Busi bwa Sabato.” Nu bango batendile bunee: “Ndi mwagi anavwama kukita migeleko zeno?” Nu kwabede malekanuko munkatini mwabo.
17 BaFarisayo babuzizie lingo wozo wabezaga kyuku bunee: “Uwe, buni buukukengela na wozo wakuzibwide meiso?” Abakwide bunee: “Eli mulengania.” 18 BaYuda tabakatizizie buno wozo abezaga kyuku nu meiso mage mazibukile lwabusio tabemana babuti bage. 19 Bababuzizie bunee: “Wono u mukutenda buno abutilwe kyuku ndi eli mwana weinyu? Buni bwesamona kano kaluma?” 20 Babuti bage bakwide bunee: “Twizi buno eli mwana weitu, nu twizi buno abutilwe kyuku. 21 Tondo tatwizi buni bwesamona kano kaluma, aba tatwizi nazi wamuzibwide meiso. Mubuziazi wenyene, es'alengania, eitendele wenyene.” 22 Babuti bage batendile bubo, kubuno bakuaga baYuda boba, kubuno baYuda babezaga bakala lwango buno ndi muntu eitabizia buno Yesu eli Kristo, nti atukibwa mu numba za misanganano. 23 Ku kabamba kako babuti bage babwide bunee: “Esalengania, mubuziazi.”
24 BaFarisayo bamanine wozo wabezaga kyuku limbizi lya mabili nu bamubwide bunee: “Kasa Kalaga lutanuno; iswe twizi buno wozo muntu eli mwagi.” 25 Akwide bunee: “Ndi eli mwagi, nne nsizi, tondo nizi tugu kitondo kimozi, buno nabezagile kyuku nu kano kaluma nise namona.” 26 Bamubuzizie bunee: “Buni bwakukitile? Buni bwakuzibwide meiso?” 27 Abakwide bunee: “Nasilile kumutendabo kalazi, nu tamwannungwilide. Kubuni kumukutunda kungwa kubo lingo? Ndi mukutunda nu inyuwe kuba beigisibwa bage?” 28 Bamulingile nu babwide bunee: “Uwe uli mwigisibwa wage, tondo iswe tuli beigisibwa ba Musa. 29 Twizi buno Kalaga atendile ku Musa, tondo wono tatwizi kuni kwatukide.” 30 Wozo muntu abakwide bunee: “Kikyo kili kya kwangamia, buno tamwizi kuni kwatukide; tondo we anzibwide meiso. 31 Twizi buno Kalaga ntakungwilila bagi, tondo ndi muntu akwanza Kalaga nu akukita buli kusombola kwage, Kalaga nti amungwilila. 32 Kutukila kulinga kwa kisi, tatungule buno muntu azibula meiso ma muntu wabutilwe kyuku. 33 Songo muntu wono ntatukile ku Kalaga, songo ntanavwama kukita kampa.” 34 Bamwakwide bunee: “Wabutilwe nunse mu bwagi, nu uwe ukutwigisia!” Nu bamubasizie kumbuga kwa numba za misanganano.
Kukatizia kwa Kyuku
35 Gongule Yesu buno bamubasizie kumbuga, amusangile nu amubuzizie bunee: “Ndi wakatizia Mwana wa Bantu?” 36 Akwide bunee: “Mukota, ntende nazi wozo, buno nimukatizie?” 37 Yesu amubwide bunee: “Wamumonineko kalazi, nu We u wozo u ukutenda nage kano kaluma.” 38 Atendile bunee: “Mukota, nakatizia,” nu akomine mazu lwabusio lwa Yesu.
39 Yesu abwide bunee: “Navule mu kisi kikino kukisungia buno babo beli byuku bamone, nu babo bakumona babe byuku.” 40 BaFarisayo babezaga gamozi nage gabasilile kungwa ku bitondo bibino, bamubuzizie bunee: “Nu iswe, ndi tuli byuku?” 41 Yesu abakwide bunee: “Songo mwabezaga byuku, songo tamunabede na bwagi, tondo kano kaluma mukutenda buno, tukumona; nu kasi mukili na bwagi.”