Musumo wa Mulangi wa Mikoko
10
1 Nu atendile lingo bunee: “Lebelebe nkumubula buno, wozo uteingila ku lwibi lwa mukumba wa mikoko, tondo ndi abakama ku go buno eingile, nti eli mwibi nu munyagi. 2 Tondo wozo wingila ku lwibi, nti eli mulangi wa mikoko. 3 Mulangi wa lwibi lwa mukumba wa mikoko amwigulila lwibi, nu mikoko zikungwa ku iyuki lyage; akumana mikoko mu meina mazo nu nti azibasia kumbuga. 4 Nkungu ziigulila mikoko zage kumbuga, nti atinga lwabusio lwazo nu mikoko nti zamuyanga, kubuno mikoko zizi iyuki lyage. 5 Tazinayanga mugeni, tondo nti zikumutina, kubuno tazizi iyuki lya bageni.” 6 Yesu abeisile musumo wono, tondo tabamenyine bubo bwatendaga.
Yesu Eli Mulangi Musoga
7 Yesu ababwide lingo bunee: “Lebelebe nkumubula buno, nne nili lwibi lwa mukumba wa mikoko.” 8 Bansania bavule lwabusio lwane beli beibi nu banyagi, tondo mikoko tazabongwilide. 9 Nne nili lwibi; ndi muntu umozi eingilila kundi, nti onibwe. Eingile nu abase, nu amone idia. 10 Mwibi akuvwaga tugu kwiba nu kwita nu kubigia, tondo nne navule buno mikoko zibe na kalamo nu zibe nako nunse.
11 “Nne, nili mulangi musoga.” Mulangi musoga akukasana kalamo kage ku kabamba ka mikoko zage. 12 Tondo muntu wa mulimo uteli mulangi lebelebe nu uteli mwiya mikoko, ndi amona ku ngozi zikuvwa, nti azisiga nu ngozi nti zakata mikoko nu kuzibalangania. 13 Ububo, muntu wa mulimo anatina kubuno akukitila bikulo tugu nu ntakwikutia ku kabamba ka mikoko. 14 Nne nili mulangi musoga. Nizi mikoko zane, nu mikoko zane zinizi, 15 anga bunizi Tatane, nu nne nizi Tatane; nu nkukasana kalamo kane ku kabamba ka mikoko zane. 16 Nili n'ingo mikoko ziteli za mukumba wono; zezo nu zo, natunganana kuzitola; zikungwa ku iyuki lyane, nu zabe kibombo kimozi nu mulangi umozi.
17 Tatane antunda kubuno nkukasana kalamo kane buno nikatole lingo. 18 Takuli muntu wampa unatikya kalamo kane, tondo nkukakasana ku lutundo lwane nnenyene. Nili na bwangato bwa kukakasana, nu nili na bwangato bwa kukatola lingo. Bubo u bwankakizizie Tatane.”
19 Nu kwabede lingo malekanuko munkatini mwa baYuda ku kabamba ka bubo bwatendaga. 20 Beingi ba kubeli babwide bunee: “Eli na musumbu; eli musile. Kubuni kumukumungwilila?” 21 Bango batendile bunee: “Mamano tameli moki ma muntu uli na musumbu. Ndi musumbu anavwama kuzibula meiso ma byuku?”
BaYuda Basombile Yesu
22 Mu nkungu za mpego Kisagulo kya Kukasana kyabezaga ku Yerusalema, 23 Yesu atabangile mu numba za kukumbamina, mu kabelabela ka Solomono. 24 BaYuda bamutimbile nu bamubuzizie bunee: “Busi bukizi buwatwikilizie mutima? Ndi uli Kristo, nti watenda bwasibwasi.” 25 Yesu abakwide bunee: “Namutendile bubo, tondo tamukunkatizia. Milimo zinkukita ku izina lya Tatane zikundongekela. 26 Tondo tamukukatizia kubuno tamuli ba ku mikoko zane. 27 Mikoko zane zikungwaga ku iyuki lyane. Nne, nizizi, nu zikunyangaga. 28 Nkuzikasa kalamo katanakuzinda nu tazikakua lingo, nu takuli muntu wampa ukazitikya mu maboko mane. 29 Tatane wankasilezo atinga bansania magala, nu takuli muntu wampa unazinyaga mu kuboko kwa Tatane. 30 Tatane nu nne, tuli umozi.”
31 BaYuda basongezye lingo makozi buno bamulibulemo. 32 Yesu akwide bunee: “Namulolesizie milimo mingi misoga zinakitile lwabusio lweinyu kutuka ku Tatane. Mulimo mukizi ku zeno u mukundibulila makozi?” 33 BaYuda bamwakwide bunee: “Tatukukulibula makozi ku kabamba ka mulimo musoga, tondo kubuno ukubenga Kalaga nu kubuno uwe uli muntu tugu, tondo ukwibula buno uli Kalaga.” 34 Yesu abakwide bunee: “Ndi tabwasanzilwe mu mulembe weinyu bunee: ‘Natendile buno, muli tulaga’? a 35 Twizi buno bubo bukutenda Masanzo ma Kalaga tabunatikibwa, nu Kalaga amanine babo basingilagwa idagi lyage buno tulaga. 36 Nu nne, Kalaga ansombwede nu ansingile mu kisi. Kubuni kumukuvwama kutenda buno nkulinga Kalaga kubuno natendile buno nili Mwana wa Kalaga? 37 Ndi nsikukita milimo za Tatane, kasi tamunkatizie. 38 Tondo ndi nkuzikita, aba ndi tamukunkatizia, kasi mukatizie zezo milimo, buno mumenyinine buno Tatane eli mundi, nu nne munda mwa Tatane.”
39 Balondile lingo kumukata, tondo abasogonyokile mu maboko mabo.