Kukua kwa Lazaro
11
1 Kwabezaga muntu umozi musambi wamanagwa Lazaro, muntu wa ku Betania, mwino walamaga mu Maria nu mubuto wage Marta. 2 Maria u wozo wabongagia Mukota bulago ku magulu nu kubunyonyona na nzwili zage, nu mubitu wage Lazaro wabezaga musambi. 3 Babo babitu bage basingile mugenzi kutenda Yesu bunee: “Mukota, wozo u ukutundaga akusamba.” 4 Gongule Yesu ku bubo, abwide bunee: “Lulo lusambo luli na Lazaro talwamwite, tondo luli kulolesia lutanuno lwa Kalaga, buno Mwana wa Kalaga aganunwe mulo.” 5 Yesu atundaga Marta nu muto wage Maria nu Lazaro. 6 Gongule ku musagu wa lusambo lwa Lazaro atingizie bingo bindi bibili kuko ku kiziki kwabezaga. 7 Kusila, abwide beigisibwa bage bunee: “Tusubyazi ku Yudea.” 8 Beigisibwa bamwakwide bunee: “Rabbi, baYuda balondagile kukwita na makozi mu bindi bibino, nu ukutunda kusubya ko!” 9 Yesu abakwide bunee: “Ndi takuli nkungu ikumi nu ibili mu musi? Ndi muntu akutabanga mu musi, nti ntanakua ku ikitano kubuno akumona ku kyengi kya kino kisi. 10 Tondo ndi muntu umozi akutabanga mu kindi, nti akua ku ikitano, kubuno mweli takuli kyengi.” 11 Kusila kwa bubo, ababwide bunee: “Kilemba kyeitu Lazaro eiyombekile, tondo nkwenda kumuyukya.” 12 Beigisibwa bamubwide bunee: “Mukota, ndi eiyombekile, nti one.” 13 Yesu atendaga kitondo kya lukuo lwa Lazaro, tondo beigisibwa bakengede buno akutenda kitondo kya kwiyombeka ku tulo. 14 Ububo Yesu abakwide bwasibwasi bunee: “Lazaro akule, 15 nu ku kabamba keinyu, nabogaboga bunsyabezaga kuko, buno mukatizie. Tondo, twendazi kweli.” 16 Toma (wamanagwa Iyasa) abwide bango beigisibwa banyage bunee: “Twendazi nu iswe buno tukue gamozi nage.”
Yesu u Iyukilo nu Kalamo
17 Gabasile Yesu, asangile Lazaro eseli mu nsinda ku bindi binazi. 18 Nu Betania abezaga bwigi na Yerusalema, lugendo lwa bilometre bisatu. 19 BaYuda beingi bavule ku Marta nu Maria buno bababobelezie ku kabamba ka mubitu wabo.
20 Gongule Marta buno Yesu es'avwa, endile amukulumania, tondo Maria asigede eikala mu zezo numba. 21 Marta abwide Yesu bunee: “Mukota, songo wabezaga gano, songo mubitu wane ntanakule, 22 tondo aaba nu kano kaluma nizi buno na kinsania kiwasega ku Kalaga, nti Kalaga akukase kyo.” 23 Yesu amubwide bunee: “Mubitu wobe ayuke.” 24 Marta akwide bunee: “Nizi buno ayuke ku iyukilo lya busi buzinda.”
25 Yesu amubwide bunee: “Nne nili iyukilo nu kalamo. Wozo wankatizia, aba ndi akua, nti alame, 26 nu na unsania ukulama nu kunkatizia, ntakakua nunse. Ndi wakatizia bubo?” 27 Marta amubwide bunee: “Ee, Mukota, nakatizia buno uli Kristo, Mwana wa Kalaga, wozo wavwa mu kisi.”
Yesu Alilile
28 Gasilile Marta kutenda bubo, eiyendede. Kusila endile kumana mubuto wage Maria, nu amubwide ku lumbisombiso bunee: “Musozi eli gano nu akukumana.” 29 Gongule Maria ku bubo, emanukile lubilo, nu endile kuli Yesu. 30 Kubuno Yesu abezaga nteingila mu mwino, tondo abezaga eikili ku kiziki kyamusangaga ku Marta. 31 BaYuda babezaga na Maria mu numba kumubobelezia, gabamonine ku Maria emanuka nu kwenda lubilo, bamuyangile kubuno bakengede buno akwenda kulila ku nsinda.
32 Gabasile Maria ku kiziki kyabezaga Yesu nu gaamumonineko, agwede gansi ku magulu ma Yesu, nu amubwide bunee: “Mukota, songo wabezaga gano, songo mubitu wane ntanakule.” 33 Nu Yesu, gaamonine ku Maria akulila nu baYuda bavwaga gamozi nage bakulila nu bo, abede na kabebe nunse nu kulila mu mutima wage. 34 Ababuzizie bunee: “Kuni kumwamuyikile?” Bamwakwide bunee: “Mukota, vwa, umone.” 35 Yesu alilile. 36 BaYuda batendile bunee: “Lolazi bwabezaga amutunda!” 37 Tondo bango munkatini mwabo batendile bunee: “Ndi muntu wono azibwide meiso ma kyuku, ndi ntanavwama kubula muntu wono buno ntakue?”
Lazaro Ayukibwa Kutuka ku Bakuzi
38 Yesu endile ku nsinda, nu abede lingo na kabebe nunse. Nsinda zabezaga zabazwa mu lwanda lw'ikozi nu ikozi lyabezaga lyatalikwa gantata. 39 Yesu atendile bunee: “Tikyazi ikozi.” Marta, mubitu wa wozo mukuzi, amutendile bunee: “Mukota, es'uga bubi, kubuno eseli bindi binazi mu nsinda.” 40 Yesu amubuzizie bunee: “Ndi nsyakutendile buno ndi wakatizia, nti wamone ku lutanuno lwa Kalaga?” 41 Ububo batikizye ikozi, nu Yesu agalamine mwigulu nu abwide bunee: “Tatane, nabogaboga buno wanungule.
42 Nizi ukunnungwaga bindi binsania, tondo nkutenda bubuno ku kabamba ka bantu bantimba kuno, buno bakatizie buno uwe u wansingile.” 43 Gaasilile kutenda bubo, alalukile n'iyuki inene bunee: “Lazaro, basa kumbuga!” 44 Nu wozo wabezaga mukuzi atukile, agondwa maboko nu magulu na nsulu, nu kitambala ku meiso. Yesu abakakizizie bunee: “Mukandulazi, nu musigazi eiyendele.”
Lwango lwa Kwita Yesu
45 Beingi ku baYuda bavule ku Maria, nu bamonine ku bwakitile Yesu, bamukatizizie, 46 tondo bamozi ba mubeli bendile ku baFarisayo nu babasambalide bubo bwakitaga Yesu. 47 Nu baFarisayo nu basankoga banene bakundamanizie bakazi ba nango, nu babuzanizie bunee: “Buni butwakite? Kubuno muntu wono akukita miganogano mingi. 48 Ndi twamusigilila kukita bubo, nti bantu bansania bamukatizie, nu bakota ba baRoma nti bavwe kusambula numba zeitu za kukumbamina nu kilongo kyeitu kinsania!” 49 Umozi wa mubeli wamanagwa Kayafa, wozo wabezaga sankoga munene mu wozo mwaka, ababwide bunee: “Tamukusongolola kampa, 50 aba ndi tamwizi buno, bwatananina muntu umozi kukwila bantu, nu kilongo kinsania takyazika?” 51 Ntatendile kitondo kikino ku makengelo mage wenyene, tondo kubuno abezaga sankoga munene mu mwaka wozo, alenganizie buno Yesu akwile baYuda, 52 nu ntalenganizie tugu ku kilongo kikyo, tondo lingo buno akundamanie bana ba Kalaga babalanganizibwe kuba mubili umozi. 53 Kutukila busi bubo, bangati ba baYuda bakalile lwango lwa kwita Yesu. 54 Ku kabamba kako Yesu ntatabangile bwasibwasi munkatini mwa baYuda, tondo endile ku ungo mwino wabezaga bwigi na kalula wamanagwa Efuraimu, nu eikede kuko gamozi na beigisibwa bage.
55 Kisagulo ky'Isuluko kya baYuda kyabezaga bwigi, nu bantu beingi batukile kwabo nu bendile ku Yerusalema lwabusio lwa Kisagulo ky'Isuluko buno bengezibwe. 56 Balondaga Yesu, nu mu nkungu za kukundamana mu numba za kukumbamina, babuzanizie bwabobwabo bunee: “Buni bumukukengela? Ndi avwe ku kisagulo, aba kilo?” 57 Basankoga banene nu baFarisayo bakakizizie buno ndi muntu amenya kiziki kili ku Yesu, nti abasambalila buno bamukate.