Bakukala Lwango lwa Kwita Yesu
26
1 Nu gasilile Yesu kutenda bubo, abwide beigisibwa bage bunee: 2 “Mwizi buno kusila kwa bindi bibili, kwabe Kisagulo ky'Isuluko, nu Mwana wa Muntu agabulwe buno atakwe ku musalaba.” 3 Mu nkungu zezo basankoga banene nu bakulu ba bantu bakundamenne mu lukumbo lwa sankoga munene, wamanagwa Kayafa; 4 bakalile lwango buno bakate Yesu mu lumbisombiso, nu bamwite. 5 Tondo batendile bunee: “Ta mu kisagulo buno mu musanganano munavwa kuba kazege.”
Maria wa ku Betania Akubongia Yesu Bulago ku Itoe
6 Nu gabezaga Yesu mu Betania, mu numba za Simoni, mwiya bibali, 7 mukikulu umozi amuvwilide na bulago mu kabongelo ka alabasta nu bukunza bwabo bwabezaga bubibu nunse, nu amukubulide mo gantata g'itoe lyage, gaabezaga akulia. 8 Tondo gamonine beigisibwa ku bubo, bongilwe nu batendile bunee: “Kubuni kukuzimizia bikulo bigezye gago? 9 Gabanakunzizie bulago bubuno banamonine bikulo byingi binakasilwe bazambi.” 10 Tondo gamenyine Yesu makengelo mabo, abakwide bunee: “Kubuni kumukuzangiazangia wono mukikulu? Kubuno ankitide mulimo musoga. 11 Kubuno mukubezaga na bazambi bindi binsania, tondo tamuli na Nne bindi binsania. 12 Mu kubongia bulago ku mubili wane, ankitide bubo ku kulongeka kuyikwa kwane. 13 Lebelebe, nkumubula buno: kunsania kukasambalagwa wono Musagu Musoga mu kisi kinsania, bubuno bukasambalagwa lingo kuba kakengelezio ku bwakitile mukikulu wono.”
Yuda Iskariota Akutunda Kugabula Yesu
14 Kubuno umozi wa ku babo beigisibwa ikumi nu babili, izina lyage Yuda Iskariota, endile ku basankoga banene, 15 nu abatendile bunee: “Mwankase kikizi, ndi namugabulilagwe?” Nu bamuganzide binkulumba makumi masatu bya feza nu bamukasilebyo. 16 Kutukila ku nkungu zezo, alondile bwanabagabulilawe.
Yesu akulongeka Kisagulo ky'Isuluko na beigisibwa bage
17 Ku busi butangi bwa tumpampa tutagaga beigisibwa bavwilide Yesu, bamubuzizie bunee: “Kuni kuukutunda tulongeke kiziki kya kutulia Kisagulo ky'Isuluko?” 18 Nu atendile bunee: “Endazi ku mwino ku muntu kisiembe, nu mubulazi bunee: ‘Musozi atenda bunee: “Nkungu zane zise bwigi, nakite Kisagulo ky'Isuluko mu numba zobe gamozi na beigisibwa bane.”’” 19 Nu beigisibwa bakitile anga bwabakakizizie Yesu; nu balongekile Kisagulo ky'Isuluko.
Kuzinda kwa Kisagulo ky'Isuluko
20 Gabwabede buse mwigolo, Yesu eikede gamozi na beigisibwa bage ikumi nu babili nu aliaga nabo; 21 nu gababezaga bese balia, ababwide bunee: “Lebelebe nkumubula buno: Umozi wa kumuli u wangabule.” 22 Babede na kabebe nunse, nu nawe nawe nawamubuzizie bunee: “Mukota, ndi nne?” 23 Nu abakwide bunee: “Wozo u nakatile nage ga lupepe, u wozo wangabule. 24 Mwana wa Muntu akwenda, anga bwasanzidwe; tondo kabebe ku muntu wozo ukugabula Mwana wa Muntu! Bunabede busoga songo muntu wono ntabutilwe!” 25 Nu Yuda wamugabwide amubuzizie bunee: “Rabbi, a ndi nne?” Yesu amwakwide bunee: “Ee, anga buukutenda.”
Kakengelezio ka Mubili Wa Yesu nu Mikila Zage
26 Nu gababede bese balia, Yesu akatile kampampa, nu asegile nu akabungwide nu akakasile ku beigisibwa bage nu atendile bunee: “Tolazi, nu liazi; kakano keli mubili wane.” 27 Nu atolile kituma, nu asegile, nu abakasile kyo,
abatendile bunee: “Inyuwe bansania, nuazi, 28 kubuno kikino kili mikila zane z'idagano, zakubuke ku kabamba ka beingi, ku isigililo lya misako za bwagi. 29 Tondo nkumubula buno: Nsikanua lingo ku biguma bibino bya mizabibu, aaba nu ku busi bunkanua lingo gamozi n'inyuwe mu Bukota bwa Tatane.” 30 Nu gabasilile kwimba lwimbo, babasile kumbuga nu bendile ku Mwiduko wa Mizeituni.
Yesu Akubula Petro nu Bango Bwamutune Petro
31 Yesu ababwide bunee: “Inyuwe bansania mwine mitima ku kabamba kane mu kindi kikino; kubuno bwasanzilwe bunee: ‘Nkalibula mulangi, nu kibombo kya mikoko kikabalangana,’ 32 tondo ganayuke kutuka ku bakuzi nalinge kumutanga kwenda ku Galilaya.” 33 Petro amwakwide bunee: “Ndi bansania beina mitima nobe, tondo nne nsine mutima nobe nunse.” 34 Yesu amubwide bunee: “Lebelebe nkukubula bunee: ‘Kindi kikino lwabusio mulume wa nkoko ntebika, wantune mambizi masatu.’” 35 Petro amubwide bunee: “Aba ndi ninakua gamozi nobe, tondo nsyakutune nunse.” Nu beigisibwa bansania batendile lingo bubo.
Yesu Eli na Kabebe mu Getesemane
36 Nu Yesu endile gamozi nabo mu isoa lyamanagwa Getesemane, nu abwide beigisibwa bage bunee: “Ikalazi gano, mu nkungu zinenda kusega kuko.” 37 Nu endile na Petro nu bana babili ba Zebedayo, nu alingile kuba na kabebe nu akonkedoe. 38 Nu ababwide bunee: “Mutima wane guli na kabebe kanene aaba nu ku lukuo; sigalazi gano, kesiazi ntende gamozi na Nne.” 39 Nu gaabede es'alinga kwenda, agwede bukukama, nu asegile bunee: “Tatane, ndi bunakulungana, buno kituma kikino kimbembuke; tondo ta anga bunkutunda, umpanga buukutunda.”
40 Yesu avule ku beigisibwa nu abasangile beli ku tulo, nu atendile Petro bunee: “Ndi tamunavwama kukesia ntende gamozi na Nne nkungu emozi? 41 Kesiazi ntende nu segazi, buno munavwa kwingila mu malindiko; mutima ukutunda bubo, tondo mubili watamba.”
42 Endile lingo, nu asegile, atendile bunee: “Tatane, ndi tabunakulungana buno kituma kikino kimbembuke nu nsyakinua, kasi kusombola kwobe kukitwe.”
43 Yesu avule lingo abasangile lingo beli ku tulo, kubuno bazenzelaga. 44 Yesu abasigile lingo, nu endile kusega limbizi lya masatu, atendile bubo lingo. 45 Nu avule ku beigisibwa bage, nu ababwide bunee: “Iyombekazi lino, nu umunwazi: kubuno nkungu zise bwigi, nu Mwana wa Muntu akasanwe mu maboko ma bagi. 46 Zanzukazi, twendazi; wozo ukungabula ese bwigi.”
Kukatwa kwa Yesu
47 Nu gabezaga Yesu eki atenda bubo, Yuda, umozi wa ku babo ikumi nu babili, avule na musanganano munene wa bantu babezaga na myene nu nkoma, watukaga ku basankoga banene nu bakulu ba bantu. 48 Nu wozo mugabuzi wamugabulaga, abakasile kakengelezio bunee: “Wozo u namumage, nti u we, nu nti mwamukata.” 49 Nu nkungu zezo, abasile ku Yesu, nu amusekede bunee: “Samba, Rabbi!” Nu amumumine. 50 Nu Yesu amubwide bunee: “Mwida wane, kita buwavwilaga tugu.” Nu bavule nu bakatile Yesu na maboko. 51 Nu ungo wabezaga na Yesu alambizie kuboko, nu abasizie mwene wage mu musagi, nu abangile mukiti wa sankoga munene, nu amusesile kutuzi. 52 Yesu amubwide bunee: “Ingizia mwene wobe mu musagi; kubuno bansania bakwitana na mwene bakeitwa na mwene. 53 Ndi ukukengela buno nsinavwama kusega ku Tatane buno ansingile bibombo ikumi nu bibili bya banzelo? 54 Umpanga buni bunazindilila masanzo, kubuno ububo, bwatunganana kuba?”
55 Mu nkungu zezo Yesu abuzizie musanganano bunee: “Buni bumwavwa na myene nu nkoma kunkata anga bakukata munyagi? Nikalaga busi na busi mu numba za kukumbamina nigisagia bantu, nu tamwankatile. 56 Tondo bunsania bwabede buno masanzo ma balengania mazindilile.” Nu beigisibwa bage bansania bamusigile, nu batinine.
Bakuvwa na Yesu ku Kayafa nu ku Lusu Lunene
57 Nu babo bakatile Yesu bendile nage ku numba za Kayafa sankoga munene, u kwabezaga kiziki kya kukundamanina basozi ba mulembe nu bakulu. 58 Tondo Petro amuyangile bulazibulazi aaba nu ku lusu lwa sankoga munene, nu eingide, nu eikede gamozi na bakiti kulindila buni bwabe.
59 Basankoga banene nu bakazi ba nango bansania balondaga bubanakandika Yesu, buno bamwite; 60 nu bakandiki beingi bavule, tondo tabwakulungenne. Tondo bango babili bavule, 61 nu batendile bunee: “Muntu wono atendile buno anavwama kwendula numba nnene za kukumbamina Kalaga, nu kuzobaka lingo mu bindi bisatu.”
62 Nu sankoga munene emanukile, nu amutendile bunee: “Uwe ndi ntukungwa tugu ku bitondo bibakukusongela?” 63 Tondo Yesu eikede kibibi. Nu sankoga munene amukakizizie bunee: “Nkukulumbizia ku Kalaga uli mulami, tubule buno ndi uwe u Kristo, Mwana wa Kalaga.” 64 Yesu amwakwide bunee: “Bubo buwatenda; tondo nkukubula buno, mu nkungu zezo mukamona Mwana wa Bantu eikala ku kuboko kwa seidume kwa Mwiya Magala, nu akuvwa ga bimpa by'igulu.” 65 Nu sankoga munene eiyatide nsulu zage, atendile bunee: “Alinga Kalaga, kubuni lingo kutukulindila bango balongeki? Mungwa bwalinga Kalaga: 66 buni bumukukengela?”
Bamwakwide bunee: “Atunganana kukua.”
67 Nu bamuswilide matazi ku meiso; nu bamulibwide makuku, nu bango bamulibwide ngizi, 68 batendile bunee: “Ndi uwe u Kristo, lengania nu tubule nazi wakulibula!”
Petro Akutuna Yesu
69 Umpanga Petro abezaga eikala kumbuga mu lukumbo, nu mukiti mukinga amuvwilide, amubwide bunee: “Uwe nu uwe wabezaga gamozi na Yesu wa Galilaya.” 70 Tondo abutunine ku bansania bunee: “Nsizi buukutenda.” 71 Nu geendile ku kabelabela ka numba, ungo mukikulu amumonineko, nu abwide babo babezaga nage bunee: “Muntu wono abezaga gamozi na Yesu wa Nazareti.” 72 Nu atunine lingo, nu alumbide bunee: “Nsizi muntu wozo.” 73 Nu gatingile nkungu nkeke, babezaga bemana bwigi bavule, babwide Petro bunee: “Lebelebe uwe uli umozi wa ku babo, kubuno kutenda kwobe u kwakumenyesia.” 74 Nu alingile kwiswilila nu kulumbila bunee: “Nsizi muntu wozo!” Nu nkungu zezo mulume wa nkoko abikile. 75 Nu Petro akengede idagi lyamubulaga Yesu bunee: “Gabe mulume wa nkoko ntebika, wantune mambizi masatu.” Nu atukile, nu alilile nunse na kabebe.