Yesu Ogezie Beigisibwa Bage ku Magulu
13
1 Busi bumozi lwabusio lwa kulinga kwa Kisagulo ky'Isuluko, Yesu amenyine buno nkungu zage za kutuka mu kisi kikino nu kwenda ku Isi zakuka, atundaga nunse bantu bage babezaga mu kisi, nu abatundile aaba nu kwika kuzinda. 2 Mu nkungu za kulia mwigolo, nu Satana abezaga es'abika mu mutima wa Yuda Iskariota, mwana wa Simoni, makengelo ma kugabula Yesu. 3 Yesu, wamenyaga buno Isi amukasile binsania mu maboko mage, buno atukile kwa Kalaga wenyene nu buno asubye lingo ku Kalaga, 4 emanukile kutuka ku meza nu eikungwide nsulu zage za gantata nu atolile kibe kya nsulu nu eikandilekyo mu kibunda. 5 Kumbusa abikile mazi ga lupepe, nu alingile kogia beigisibwa ku magulu nu kubanyonyona na zeno nsulu zaabezaga nazo mu kibunda. 6 Abasile ku Simoni Petro, wozo wamubuzizie bunee: “Mukota, ndi uwe ukulonda kunnogia ku magulu?” 7 Yesu amwakwide bunee: “Ntwizi bubo bunkukita kano kaluma, tondo ukabusongolola kumbusa.” 8 Petro amubwide bunee: “Kilo, ntwanogie nunse ku magulu.” Yesu amwakwide bunee: “Ndi nsyakogia, nti ntuli na mugomio gamozi na nne.” 9 Simoni Petro amubwide bunee: “Mukota, ntunogie ku magulu tugu, tondo nnogie ku maboko nu ku itoe.” 10 Yesu amubwide bunee: “Wozo wogile mubili unsania ntaneiyanina koga, umpanga ku magulu, nu mubili unsania wenga. Nu inyuwe mwenga, tondo ta bansania.” 11 Yesu abezaga eizi kalazi nazi wamugabule. Ukinsa atendile buno, inyuwe bansania tamwenga.
12 Gaasilile kubogia ku magulu, nu kuvwala nsulu zage, Yesu asubizie kwikala ku meza. Ababuzizie bunee: “Ndi mwizi bwisulilwa bwa bubuno bunamukitila? 13 Mukummana bunee: ‘Mukota nu Musozi,’ nu mukutenda busoga, kubuno nili bubo. 14 Ububo nne, Mukota nu Musozi weinyu ndi namwogia ku magulu, ububo nu inyuwe mwatunganana kogania ku magulu bweinyubweinyu. 15 Kubuno namulolesia kalolesio kamozi buno nu inyuwe mukitilane anga bunamukitide. 16 Lebelebe nkumubula buno: Mukiti nteli munene kutinga mukota wage, aba musingwa nteli munene kutinga wozo wamusingile. 17 Ndi mwizi bubo, nti muli na mbogimbogi nunse, umpanga ndi mwabukita.
18 Nsikutenda bubuno ku kabamba ka beinyuwe bansania. Nizi babo banasombwede, tondo bwatunganana buno Masanzo mazindilile nu makutenda bunee: ‘Wozo u nkulia gamozi nage, u wangabule.’ a 19 Nu kutukila kano kaluma, nkumusambalila bubo buno, lwabusio lwa kikyo kitondo takibasa, munkatizie buno nne u We. 20 Lebelebe nkumubula bunee: ‘Muntu witabizia wozo u nasinga, nti anitabizia nu nne, nu muntu wanitabizia, nti eitabizia wozo wansingile.’”
Yesu Akusambala Buno Yuda Amugabule
21 Kumbusa kwa kutenda bubo, Yesu abede na kabebe kanene mu mutima wage, nu abatendile bunee: “Lebelebe nkumubula bunee: ‘Umozi wa kumuli angabule.’” 22 Beigisibwa balolenne bwabobwabo nu beibuzizie bunee: “Nazi waakutenda?” 23 Umozi wa ku beigisibwa bage, wozo watundagwa na Yesu, abezaga eikala bwigi na Yesu. 24 Simoni Petro amukitide kalolesio ku kuboko nu amutendile bunee: “Mubuzie nazi wakutendako? ” 25 Nu wozo mwigisibwa etamine ku bukuba bwa Yesu, nu amubwide bunee: “Mukota, nazi u wozo?” 26 Yesu amwakwide bunee: “Wozo u natobelage nage kyandindi mu lupepe,” akitobile, nu akikasenne ku Yuda Iskariota, mwana wa Simoni. 27 Gatolile Yuda kikyo kyindi kya kampampa, Satana eingide mweli. Yesu amutendile bunee: “Bubo buukukita, kitabo lubilo!”
28 (Tondo ku babo babezaga ku meza takuli muntu umozi wasongolwede bubo bwatendaga kweli. 29 Kubuno anga bubo bwalangaga Yuda bikulo, bamozi bakengelaga buno Yesu amutendaga buno ende kukunza bibakwiyanina ku kisagulo, aba ende kukasana bimozi ku bazambi.) 30 Yuda akatile kyindi kya kampampa nu asasizie kubasa. Nu busi bwabezaga buse bwida.
Ikakizio Ito
31 Gatukile Yuda, Yesu atendile bunee: “Kano kaluma Mwana wa Bantu atanunwa, nu Kalaga atanunwe mweli. 32 Ndi Kalaga atanuzibwe mweli, nti Kalaga nu We atanune Mwana, nu amutanune yiliyili. 33 Bana bane bakeke, nili gamozi n'inyuwe tugu ku nkungu nkeke. Mwandonde, tondo anga bunatendile ku baYuda bunee: ‘Tamunavwama kuvwa kuko kunkwenda, u bubo bunkumutenda kano kaluma.’ 34 Nkumukakizia ikakizio ito: ‘Tundanazi bweinyubweinyu anga bubo bunamutundile; u bubo nu inyuwe, mutundane.’ 35 Ku kitondo kikino, bantu bansania bamenye buno muli beigisibwa bane, ndi muli na lutundo bweinyubweinyu.”
Yesu Alenganizie Kutuna kwa Petro
36 Simoni Petro amubuzizie bunee: “Mukota, kuni kuukwenda?” Yesu amwakwide bunee: “Ntunavwama kunyanga kuko kunkwenda kano kaluma, tondo wanyange kumbusa.” 37 Petro amubuzizie bunee: “Mukota, kubuni kunsinavwama kukuyanga kano kaluma? Nakasane kalamo kane ku kabamba kobe.” 38 Yesu amwakwide bunee: “Wakasane kalamo kobe ku kabamba kane? Lebelebe nkukubula bunee: ‘Lwabusio lwa kubika kwa mulume wa nkoko, wantune mambizi masatu buno ntunizi.’”