Yesu Eli Nzila za Kubasa kw'Isi
14
1 Yesu abatendile bunee: “Mitima zeinyu tazizangezange. Katiziazi Kalaga, nu nkatiziazi nu nne. 2 Kuli biziki byingi mu numba za Tatane; songo ta buligo, songo ninamutendile, nenda kumulongekela biziki. 3 Umpanga, ndi nenda kumulongekela biziki, kasi nasubye lingo nu namutole buno kuko kunili, mube nu inyuwe ko. 4 Nu kuko kunkwenda, mwizi nzila zako.” 5 Toma amubuzizie bunee: “Mukota, tatwizi kuko kuukwenda. Buni butunamenya nzila zako?” 6 Yesu amwakwide bunee: “Nne nili nzila, bulili nu kalamo. Takuli muntu umozi unabasa ku Tatane ndi ntabasila mundi. 7 Songo mwammenyine, songo munamenyine Tatane nu We. Nu kutukila kano kaluma, mwamumenya nu mwamumonako.” 8 Filipo amubwide bunee: “Mukota, tulolesie So, nu bubo nti bwakuka kutuli.” 9 Yesu amubwide bunee: “Filipo, nne nizizia nili gamozi n'inyuwe bindi byingi, nu uwe ntunizi! Wozo wammonako, nti amona ku Tatane. Kubuni kuukutenda buno nimulolesie Tatane? 10 Ndi ntukukatizia buno nili mu Tatane, nu Tatane eli mundi? Bitondo binsania binkumutenda tabikutuka kundi nnenyene; Tatane uli mundi akukita milimo zage insania. 11 Nkatiziazi, nne nili mu Tatane nu Tatane eli mundi. Ndi tabubo, kasi katiziazi ku kabamba ka milimo zeno tugu. 12 Lebelebe nkumubula buno, wozo wankatizia, akite nu we milimo anga bunkuzikita, nu akakita milimo minene kutinga zeno, kubuno nkwenda kuli Tatane. 13 Nu binsania bimwasegage mu izina lyane, nabikite buno Tatane aganunwe mu Mwana wage. 14 Ndi mwasega kinsania mu izina lyane, nti nakikite.
Idagano lya Kusingwa kwa Muuza Wasililila
15 Ndi mwantunda, nti mwanze makakizio mane. 16 Nu nne nasege ku Tatane, nu amukase ungo Mukasia, buno abe gamozi n'inyuwe bindi binsania. 17 U wozo Muuza wa bulili, wozo utanasekelwa na kisi, kubuno takikumumonako, tondo inyuwe mumwizi, kubuno akwikalaga gamozi n'inyuwe nu eli mumuli.
18 Nsyamusige bwa nkubi, navwe lingo kumuli. 19 Ku engo nkungu nkeke kisi takyammoneko lingo, tondo inyuwe mwammoneko. Kubuno nne nkulama, nu inyuwe lingo mwalame. 20 Ku busi bubo mukamenya buno nne nili mu Tatane, nu inyuwe muli mundi, nu nne nili mumuli.
21 Wozo witabizia makakizio mane nu kumanza, u wozo wantunda. Wozo wantunda, atundwe na Tatane, nu nne lingo namutunde nu nidolesie kweli.” 22 Yuda (Ta Yuda Iskariota) amubuzizie bunee: “Mukota, buni buuneidolesia kutuli nu ta ku kisi?” 23 Yesu amwakwide bunee: “Ndi muntu umozi antunda, nti anze idagi lyane nu Tatane amutunde, nu iswe twavwe kweli nu twalame gamozi nage. 24 Wozo utantunda, ntakwanza moki mane. Nu idagi limukungwa kulyo talikutuka kundi, tondo likutuka ku Tatane wansingile.
25 Namutendile bubo nkungu zinikalaga gamozi n'inyuwe. 26 Tondo wozo Mukasia, u Muuza Wasililila, ukasinga Tatane mu izina lyane, u wozo ukamwigisia binsania nu akamukengelezia binsania binamusambalide.
27 Namusigila bubobelelo, namukasa bubobelelo bwane. Nne nsikukasana anga bukukasanaga kisi. Mitima zeinyu tazizangezange nu tazibe na boba. 28 Mungule bunatendile bunee: ‘Nkwenda, tondo nasubye lingo kumuli.’ Songo mwantundile, songo munabogilebogile kubuno nkwenda ku Tatane, kubuno Tatane eli munene kuntinga. 29 Kano kaluma, namutenda bitondo bibyo lwabusio tabibasa, buno gabyabase mukatizie. 30 Nsyatendane lingo n'inyuwe bingo bitondo byingi, kubuno mukota wa kisi kikino akuvwa. Nteli na bwangato bwampa kundi. 31 Tondo bwatunganana kisi kimenye buno nkutunda Tatane. Ububo nkukita binsania anga bwankakizizie Tatane. Emanukazi, tutukazi gano.”