Yesu Eli Muzabibu wa Lebelebe
15
1 Nu atendile lingo bunee: “Nne nili kimima kya lebelebe, nu Tatane eli mulimi. 2 Na lutabi lunsania luli mundi nu talukukolama biguma, nti alutikya; nu na lutabi lunsania lukukolama biguma, nti alukondela buno lukolame bingo biguma byingi nunse. 3 Meigisia manamukasile mamwengezie kalazi. 4 Mwikale mundi, anga bunili mumuli. Lutabi talunakolama biguma lolwenyene, ndi talwikoma ku kimima. U bubo nu inyuwe lingo, tamunakolama biguma ndi tamwikala mundi. 5 Nne nili kimima, nu inyuwe muli ntabi. Wozo wikala mundi, anga bunili mweli, akolame biguma byingi, kubuno ndi nsiligo, tamunavwama kukita kampa. 6 Ndi muntu nteikala mundi, nti eiswe kumbuga anga lutabi, nu nti lwoma; kusila nti bazikunza nu nti bazisa mu keiya nu nti zagia. 7 Ndi mwikala mundi nu ndi malagi mane meikala mumuli, nti mwasege kinsania kimukutunda, nu nti mwakaswekyo. 8 Ndi mwakolama biguma byingi nu kuba beigisibwa bane ba lebelebe, nti Tatane atanunwe. 9 Nkumutunda anga bukuntunda Tatane. Mwikale mu lutundo lwane. 10 Ndi mwanza makakizio mane, nti mwikale mu lutundo lwane, anga bunanzile makakizio ma Tatane nu kwikala mu lutundo lwage.
11 Namutendile bubo buno mbogimbogi zane zibe mumuli, nu buno mbogimbogi zeinyu zizindilile. 12 Lilino u ikakizio lyane buno, tundanazi bweinyubweinyu anga bunamutundile. 13 Takuli lutundo lunene kutinga luluno: muntu kukasana kalamo kage ku kabamba ka bilemba byage. 14 Muli bilemba byane ndi mukukita bunamukakizia. 15 Nsikumumana buno muli bakiti, kubuno mukiti ntakumenya bukukita mukota wage. Nkumumana buno bilemba byane, kubuno namulolesizie binsania binungule ku Tatane. 16 Ta beinyuwe u bansombwede, tondo nne u namusombwede nu namubikile buno mwende nu kukolama biguma, nu biguma bizizie, nu kinsania kimwasegage mu izina lyane, Tatane amukase kyo. 17 Bubuno u bunkumukakizia bunee: ‘Mutundane bweinyubweinyu.’
Kisi Kyasombile Yesu nu Bantu Bage
18 Ndi kisi kyamusomba, menyazi buno kyansombile lwabusio lweinyu. 19 Songo muli ba kisi, songo kisi kinamutundile anga bukyatunda beiyakyo. Tondo kubuno namusombwede munkatini mwa kisi, nu tamuli lingo ba kisi; ku kabamba kako kisi kyamusomba. 20 Kengelazi bubo bunamutendile bunee: ‘Takuli mukiti wampa uli munene kutinga mukota wage.’ Ndi bansungizie, kasi nti bamusungie nu inyuwe. Ndi banzile malagi mane, nti banze meinyu nu inyuwe. 21 Tondo bubo bunsania bamukitile ku kabamba k'izina lyane, kubuno tabeizi wozo wansingile. 22 Songo nsyavule, nu songo nsyabatendile kampa, songo tabeli na katati ka bwagi. Tondo kano kaluma tabeli na bubanasigililwa bwagi bwabo. 23 Wozo wansomba, asomba tondo Tatane. 24 Songo nsyakitile milimo zitakitile ungo muntu munkatini mwabo, songo tababede na katati ka bwagi. Tondo kano kaluma bamonine kuzo nu batusombile nne nu Tatane. 25 Tondo lilyo idagi lyasanzilwe mu mulembe wabo lizindilile, u buno, bansombile geteli kabamba. a