Yesu Akutonda Beigisibwa Bage Bitondo Bikavwa
16
1 Nu atendile lingo bunee: “Namutendile bubo buno munavwa kugoa mu bwagi. 2 Bakamutikya mu numba za misanganano, nu nkungu zikavwa, nkungu zezo na muntu unsania ukamwita akakengela buno akukitila Kalaga mu lulo lukita. 3 Bakakita bubo kubuno tabamenyine Tatane aba nne. 4 Tondo nkumusambalila kitondo kikino buno gakakuka nkungu za kukita bubo, nti mukakengela buno namubwide bubo. Mulimo wa Muuza Wasililila
Nsyamusambalide bubo mu kulinga kubuno nabezaga gamozi n'inyuwe. 5 Kano kaluma nkusubya kuli wozo wansingile, nu takuli ukumbuzia bunee: ‘Kuni kuukwenda?’ 6 Tondo kubuno nkumubula bubo, mitima zeinyu ziyala na kabebe kano kaluma. 7 Tondo nkumubula bulili: buli mutali kumuli buno nende, kubuno ndi nsyenda, nti Mukasia ntanavwa kumuli. Tondo ndi nenda, nti namusinge kumuli, 8 nu We gaakavwa, akakokomeka bantu ba kino kisi bitondo bya bwagi nu bya kwisanana nu bya lusungio: 9 ku bwagi, kubuno tabakunkatizia; 10 ku kwisanana, kubuno nkwenda kuli Tatane nu buno tamwammoneko lingo, 11 nu ku lusungio, kubuno mukota wa kisi kikino asungibwa kalazi.
12 Nikili na bingo byingi byakumusambalila, tondo tamunavwama kubisongolola kano kaluma. 13 Tondo gavwe Muuza wa bulili, akamusondelezia mu bulili bunsania. Kubuno ntatende bitondo ku bwangato bwage wenyene, tondo atende bunsania bwongule kubo nu amusambalile bitondo binsania bikavwa. 14 We antanuzie, kubuno atole ku bibyo byane nu kumusambalilabyo. 15 Binsania bili na Tatane bili byane. Ububo natendile buno, We akatola ku bibyo byane nu kumusambalilabyo.
Kabebe Kakagaluka Kuba Mbogimbogi
16 Kusila kwa nkungu nkeke, tamwammoneko lingo; nu kumbusa kwa engo nkungu nkeke, mwammoneko kubuno nkwenda ku Tatane.” 17 Beigisibwa bage bamozi babuzanizie bwabobwabo bunee: “Bwisulilwa bukizi bwa bubo bwatutenda bunee: ‘Kusila kwa nkungu nkeke tamwammoneko lingo;’ nu ‘kumbusa kwa engo nkungu nkeke, mwammoneko lingo.’ Nu lingo ‘nkwenda ku Tatane’? ” 18 Batendile bunee: “Bwisulilwa bukizi bwa bubo bwakutenda bunee: ‘Nkungu nkeke’? Tatukumenya bwakutenda.” 19 Gamenyine Yesu buno batundaga kumubuzia, abatendile bunee: “Mukubuzania bweinyubweinyu ku bubo bunatendile bunee: ‘Kusila kwa nkungu nkeke tamwammoneko lingo, nu kumbusa kwa nkungu nkeke mwammoneko lingo.’
20 Lebelebe nkumubula buno, mwabe na kabebe nu mwalile, tondo kisi kyabogeboge. Mwabe na kabebe, tondo kabebe keinyu kagaluke kuba mbogimbogi. 21 Gakubutaga mukikulu mwana, nti eli na lubaba lukali, kubuno nkungu zage zakuka. Tondo nkungu zasila kubuta mwana, nti ntakukengela lulo lubaba lwage lingo, ku kabamba ka mbogimbogi za kubutwa kwa muntu mu kisi. 22 Umpanga nu inyuwe, kano kaluma muli na kabebe, tondo namumoneko lingo nu mitima zeinyu zabogeboge, nu takuli muntu wampa wamutikye mbogimbogi zeinyu.
23 Mu busi bubo, tamwambuzie ku kampa. Lebelebe nkumubula buno, Tatane amukase kinsania kimwasege mu izina lyane. 24 Aaba nu kano kaluma tamwasegile kampa mu izina lyane. Musege nu nti mwakaswe buno mbogimbogi zeinyu zizindilile.
Yesu Eli Mukindi wa Kisi
25 Namutendile bubuno ku misumo, tondo nkungu zikuvwa nu zezo nkungu zavwe, nsyamutende ku misumo, tondo namusambalile bwasibwasi bitondo bya Tatane. 26 Mu busi bubo, mwasege mu izina lyane, nu nsikumubula buno: Namusegele ku Tatane, 27 kubuno Tatane wenyene amutunda, kubuno mwantundile nu mwakatizizie buno natukile ku Tatane. 28 Natukile ku Tatane nu navule mu kisi, nu kano kaluma nkutuka ku kisi nu nkusubya ku Tatane.”
29 Beigisibwa bage bamutendile bunee: “Kano kaluma ukutenda bwasibwasi nu ntukutenda kampa ku misumo. 30 Kano kaluma twamenya buno wizi binsania nu ntukwiyanina muntu kukubuzia. Ububo twakatizia buno watukile ku Kalaga.” 31 Yesu ababuzizie bunee: “Ndi mwakatizia kano kaluma? 32 Lolazi, nkungu zavwa, nu zise zakuka, gamwabalanganibwe na muntu na muntu ku numba zage nu mwansige nnenyene. Tondo nsili nnenyene, kubuno Tatane eli gamozi na nne. 33 Namusambalide bibino binsania buno mube na bubobelelo mundi. Mwasungibwe mu kisi, tondo mwikokomezie, nne nakindile kisi.”