Yesu Akusegela Beigisibwa Bage
17
1 Gaasilile kutenda bubo, Yesu agalamine kwigulu nu atendile bunee: “Tatane, nkungu zakuka. Tanuzia Mwana wobe, buno Mwana wobe alolesie nu We lutanuno lwobe. 2 Kubuno wamukasile bwangato bwa kwangata bantu bansania, buno Mwana akasane kalamo katanakuzinda ku bansania bawamukasile. 3 Nu kakano u kalamo katanakuzinda buno bakumenye buno uwe u Kalaga tugu wa lebelebe, nu kumenya Yesu Kristo u wasingile. 4 Nakuganwine ga kisi. Nasilile mulimo u wankasile buno nigukite. 5 Nu kano kaluma, Tatane, nkase gamozi nobe, lutanuno lunabezaga nalo kuguli gabezaga kisi takiba. 6 Namenyesizie izina lyobe ku bantu bawankasile mu kisi. Babezaga bobe, nu wankasilebo, nu banzile idagi lyobe. 7 Kano kaluma bese beizi nunse buno binsania biwankasile byatukile kuguli, 8 kubuno nabasolede moki mawankasile, nu bamakatizizie. Bamenyininne nunse buno lebelebe natukile kuguli, nu bakatizizie buno wansingile.
9 Nkubasegela kuguli. Nsikusegela ba kisi, tondo nkusegela babo bawankasile, kubuno beli bobe. 10 Binsania byane bili byobe, nu binsania byobe bili byane, nu lutanuno lwane lukumoneka mu beli. 11 Nne nsili lingo mu kisi, tondo babo beli mu kisi, nu nne nkuvwa kuguli. Tatane Wasililila, balange ku magala m'izina lyobe, lilyo liwankasile, buno babe umozi anga butuli umozi. 12 Ganabezaga gamozi nabo, nalangile babo bawankasile ku magala m'izina lyobe, nu nabalangile nu takuli wampa wa ku beli waziminne, umpanga wozo mwana wa buzimizi buno masanzo mazindilile. 13 Tondo kano kaluma navwa kuguli nu nkutenda bubo nkungu zinikili mu kisi, buno nu bo, babe na mbogimbogi zane, zizindilile mubeli. 14 Nabakasile idagi lyobe, nu kisi kyabasombile, kubuno tabeli ba kisi, anga nne bunsili wa kisi. 15 Nsikukusega buno ubatikye mu kisi, tondo buno ubalange na wozo mubi. 16 Tabeli ba mu kisi anga nne bunsili wa mu kisi.
17 Baswagie ku bulili. Idagi lyobe lili bulili. 18 Anga buwansingile mu kisi, u bubo nu nne lingo bunabasingile mu kisi. 19 Nu nne nkwiswagia nnenyene ku kabamba kabo buno bo nu bo baswagibwe mu bulili.
20 Ta babano tugu u bankusegela, tondo nu babo bango bakankatizia ku kabamba ka busambazi bwabo, 21 bubo bansania babe umozi; anga uwe Tatane, buguli mundi nu nne muguli, babe umozi mutuli, bubo ba kisi bakatizie buno uwe u wansingile. 22 Nu nne nabakasile lutanuno luwankasile, buno babe umozi anga butuli umozi: 23 Nne mubeli, nu uwe mundi buno babe nunse umozi buno ba kisi bamenye buno wansingile nu buno wabatundile anga buwantundile.
24 Tatane, nkutunda buno babo bawankasile babe gamozi na nne gago ganili buno bamone ku lutanuno lwane, lulo luwankasile kubuno wantundile lwabusio lwa kisi takikitwa. 25 Tatane Wisanana, ba kisi tabakumenyine, tondo nne nakumenyine, nu babano bamenyine buno wansingile. 26 Nabamenyesizie izina lyobe nu nitile nunse kubamenyesialyo, buno lutundo lulo luwantundile lube mubeli.”