Bakulu Bakukala Lwango lwa Kukata Yesu
14
1 Kusila kwa bindi bibili kwabezaga Kisagulo ky'Isuluko nu tumpampa tutagaga. Basankoga banene nu basozi ba mulembe balondile bubakata Yesu mu lumbisombiso nu kumwita. 2 Kubuno batendile bunee: “Ta mu nkungu za Kisagulo, buno kunaba kazege munkatini mwa bantu.” Yesu Abongezibwe Bulago na Mukikulu
3 Gabezaga Yesu ku Betania, mu numba za Simoni mwiya bibali; gaaliaga, mukikulu umozi eingide nu abezaga na kabongelo ka alabasta keiyala na bulago bwa bukunza bubibu, nu abugizie kako kabongelo nu akubwide bulago gantata g'itoe lya Yesu. 4 Bantu bamozi bongilwe nu batendile bunee: “Buni bukuzimizia bulago bubuno? 5 Bunatunganenne kubukunzia ku feza nkama isatu a nu zinakasilwe bazambi!” Nu batekwide wozo mukikulu. 6 Tondo Yesu atendile bunee: “Musigazi. Buni bumukumuzangiazangia? Ankitila kitondo kisoga. 7 Kubuno bindi binsania mukubezaga na bazambi, nu munavwama kubakitila busoga ndi mwatunda; tondo tamuli na Nne bindi binsania. 8 Akitile bwavwamine; alinga kubongia mubili wane bulago ku kabamba ka kuyikwa kwane. 9 Lebelebe nkumubula bunee: kunsania kukasambalwa musagu musoga, mu kisi kinsania, bakasambala lingo bwankitila mukikulu wono, bukaba kabali kage.” 10 Yuda Iskariota, umozi w'ikumi nu babili, endile ku basankoga banene, buno agabule Yesu kubeli. 11 Nu babo, gabongule kubo, babogilebogile, nu bamulagile buno bamukase feza. Nu Yuda alondile nkungu nsoga za kumugabula.
Yuda Iskariota Akutunda Kugabula Yesu ku Basankoga
12 Busi butangi bwa tumpampa tutagaga gabasesile kyana kya mukoko ku idia lya Kisagulo ky'Isuluko, beigisibwa ba Yesu bamutendile bunee: “Kuni kuukutunda twende kukulongekela idia lya Kisagulo ky'Isuluko?” 13 Nu asingile babili ku beigisibwa bage nu abatendile bunee: “Endazi ku mwino, mwakulumane na wamulume eeka idega lya mazi. Muyangazi, 14 nu kunsania kumwingilage mutende nyene numba bunee: ‘Musozi akutenda bunee: “Kuni kuli busio bwane, kunalie ku Kisagulo ky'Isuluko, gamozi na beigisibwa bane?”’ 15 Nu amulolesie busio bunene buli kwigulu, bwalongekwa nu binsania bilimo kayikayika. Mumo u mumutulongekela idia lya Kisagulo ky'Isuluko.” 16 Beigisibwa bage bendile, babasile ku mwino; nu basangile binsania anga bwabatendaga, nu balongekile idia lya Kisagulo ky'Isuluko.b
17 Geidile busi, abasile gamozi na beigisibwa ikumi nu babili. 18 Gababezaga ku meza bakulia, Yesu atendile bunee: “Lebelebe, nkumutenda bunee: umozi wa kumuli, ukulia gamozi na Nne, angabule.” 19 Babede na kabebe, nu nawe nawe na wamutendile bunee: “Ndi nne?”
20 Abakwide bunee: “Umozi wa kumuli, inyuwe ikumi nu babili, wozo u nakatilage nage gamozi ga lupepe. 21 Mwana wa Muntu eiyendele anga bwasanzilwe kweli, tondo kabebe ku wozo muntu ukugabula Mwana wa Muntu! Bunabede busoga songo wozo muntu ntabutilwe!”
Kulinga kwa Meza ma Mukota
22 Gababede bese balia, Yesu atolile kampampa, nu gaasilile kusega, akabungwide nu abakasile ko; atendile bunee: “Tolazi, wono guli mubili wane.” 23 Nu atolile kituma nu gaasilile kusega, abakasile kyo, nu bakinune bansania. 24 Nu abatendile bunee: “Kikino kili mikila zane, mikila z'idagano zakubuka ku kabamba ka beingi. 25 Lebelebe nkumubula buno, nsyanue lingo ku mazi ma biguma bya mizabibu, aaba nu busi bubo bunkamanua lingo mu Bukota bwa Kalaga.” 26 Gabasilile kwimba lwimbo, bendile ku mwiduko wa Mizeituni.
Yesu Alenganizie Buno Petro Amutune
27 Yesu abatendile bunee: “Inyuwe bansania mwantune, kubuno bwasanzilwe bunee: ‘Nkalibula Mulangi, nu mikoko zikabalangana.’ 28 Tondo ganabe nayuka, namutange kwenda ku Galilaya.” 29 Petro amutendile bunee: “Aba ndi bansania bakutune tondo Nne nsyakutune.” 30 Nu Yesu amutendile bunee: “Lebelebe nkukubula buno, uwe, lelo, mu kindi kikino, lwabusio mulume wa nkoko ntebika mambizi mabili, nti wantune mambizi masatu.” 31 Tondo Petro atendile lingo bubibu bunee: “Aba bunantunganana kukua gamozi nobe, nti nsyakutune.” Nu bansania batendile bubo.
Yesu Akusega ku Getesemane
32 Bavule ku kiziki kyamanagwa buno Getesemane, nu Yesu atendile ku beigisibwa bage bunee: “Ikalazi gagano, nkungu zinkusega.” 33 Atolile Petro, Yakobo nu Yoana gamozi nage nu alingile kukonkomana nu akonkedwe, 34 abatendile bunee: “Mutima wane guli na kabebe kanene aaba nu ku lukuo; sigalazi gano nu kesiazi ntende.” 35 Nu gendile lwabusio kakeke, agwede gansi nu asegile buno. “Ndi bunakulungana, zeno nkungu zintingile.” 36 Atendile bunee: “Abba, c Tatane binsania binakulungana kuguli; ntikizye kituma kikino, tondo ta anga bunkutunda, tondo anga buukutunda.”
37 Nu asubizie ku beigisibwa bage, asangile beiyombeka, nu atendile ku Petro bunee: “Simoni, ndi wiyombeka ku tulo? Ndi ntwavwamine kukesia ntende nkungu emozi? 38 Kesiazi ntende nu segazi, buno munavwa kwingila mu malindiko. Mutima ukutunda, tondo mubili watamba.”
39 Endile lingo nu asegile, atendile bubo lingo. 40 Asubizie lingo nu abasangile beiyombeka ku tulo; kubuno meiso mabo mabezaga mazitu. Nu tabamenyine bubamwakula.
41 Avule lingo limbizi lya masatu, nu abatendile bunee: “Iyombekazi lino, nu umunwazi! Bwakuka! Nkungu zika. Lolazi, Mwana wa Muntu agabulwe mu maboko ma bagi. 42 Zanzukazi, twendazi! Lolazi, wozo ukungabula ese bwigi!”
Kukatwa kwa Yesu
43 Nu kazanga kongo gaatendaga, Yuda, umozi wa babo ikumi nu babili, abasile gamozi na kibombo kinene kya bantu kyabezaga na myene nu nkoma. Basingilwe na basankoga banene, basozi ba mulembe nu bakulu. 44 Wozo wamugabulaga, abanine kakengelezio bunee: “Wozo u namumage u wozo u mwakate nu mwende nage bulonge bukata.” 45 Nu kazanga kongo gabasile Yuda, endile ku Yesu, atendile bunee: “Musozi!” Nu amumumine. 46 Nu babo bantu balambizie maboko ku Yesu nu bamukatile. 47 Umozi wa ku babo babezaga gago abasizie mwene, abangile mukiti wa sankoga munene nu amusesile kutuzi. 48 Yesu abatendile bunee: “Ndi mwavwa na myene nu nkoma kunkata, anga nili mwibi? 49 Bindi binsania nabezagile munkatini mweinyu, nigisagia mu numba za misanganano, nu tamwankatile. Tondo bubuno bunsania bwabede buno masanzo mazindilizibwe.” 50 Nu bansania bamusigile nu batinine.
51 Musikila umozi amuyangile, abezaga tugu na kikwembe kimozi kya kitani ku mubili nu bamukatile, 52 tondo asigile nsulu zage nu atinine mundulu.
Yesu Lwabusio lwa Lusu Lunene
53 Bendile na Yesu ku sankoga munene, nu basankoga banene bansania bakundamenne, bakulu nu basozi ba mulembe. 54 Petro amuyangile bulazi, aaba nu ku lusu lwa sankoga munene. Eikede na bakiti nu ongwaga keiya.
55 Basankoga banene nu bakazi ba lwango balondile bulongeki bwa kwita Yesu, nu tababumonine. 56 Kubuno beingi, bamukandikile, tondo bulongeki bwabo tabwabede bumozi. 57 Bamozi bemanine nu bamukandikile, batendile bunee: 58 “Tungule kwatendaga bunee: ‘Nasambule numba zezo za kukumbamina zobakilwe na maboko ma bantu, nu mu bindi bisatu nobake engo zitobakilwe na maboko ma bantu.’” 59 Tondo bulongeki bwabo tabwabede bumozi.
60 Nu sankoga munene azanzukile munkatini mwa musanganano abuzizie Yesu nu atendile bunee: “Ndi ntukwakula bwampa? Bantu babano bakukulongekela buni?” 61 Tondo Yesu eikede kibibi nu ntakwide kampa. Sankoga munene amubuzizie lingo nu amutendile bunee: “Ndi uwe u Kristo, Mwana wa Kalaga mukiti wa mponga?” 62 Yesu akwide bunee: “Nne, u We, nu mukamona Mwana wa Muntu eikala ku kuboko kwa seidume ku magala ma Kalaga; nu akavwa mu bimpa by'igulu.” 63 Nu sankoga munene atile nsulu zage nu atendile bunee: “Kubuni lingo ukulindila bango balongeki! 64 Mungwa bwalinga Kalaga. Buni bumukukengela?” Nu bansania bamusungizie buno, atunganana kukua.
65 Nu bamozi balingile kumuswila matazi, nu kumuziba ku meiso, nu bamulibwide binkunya bamutendile bunee: “Lengania!” Nu balangi bamukatile nu bamulibwide ngizi.
Petro Akutuna Yesu
66 Gabezaga Petro eikile gansi ga mulungu, mukikulu umozi ku bakiti ba sankoga munene avule. 67 Amonine ku Petro akungwa keiya, amulolile nu amutendile bunee: “Nu uwe, wabezagile gamozi na Yesu wa Nazareti.” 68 Atunine, atendile bunee: “Nsizi, nsikusongolola buni buukutenda.” Kusila, atukile nu endile ku kabelabela, nu mulume wa nkoko abikile. 69 Nu wozo mukiti mukikulu amumonineko lingo alingile lingo kutenda ku babo babezaga gago bunee: “Wozo eli umozi wa ku babo!” 70 Tondo atunine lingo. Nu gatingile nkungu nkeke, babo babezaga bemana gago batendile lingo ku Petro bunee: “Lebelebe, uwe uli umozi wa ku babo, kubuno uli muntu wa ku Galilaya.” 71 Nu alingile kuswilila nu kulumbila bunee: “Nsizi wozo muntu u mukubula.” 72 Nu kazanga kongo mulume wa nkoko abikile limbizi lya mabili, nu Petro akengede kikyo kitondo kyamutendile Yesu bunee: “Lwabusio mulume wa nkoko ntebika mambizi mabili, wantune mambizi masatu.” Nu gaabukengede, alilile.