Yesu Lwabusio lwa Pilato
15
1 Nu kazanga kongo mu nindunindu nunse, basankoga banene bakalile lwango gamozi na bakulu, nu basozi ba milembe nu bakazi ba lwango. Kusila bakandile Yesu na miyololo, nu bendile nage ku Pilato. 2 Pilato amubuzizie bunee: “Ndi uwe u mukota wa baYuda?” Yesu amwakwide bunee: “Bubo buwatenda.” 3 Basankoga banene bamusongede ku bitondo byingi bibi. 4 Pilato amubuzizie lingo bunee: “ndi ntwakule kyampa? Lola bitondo byingi bibakukusongela!” 5 Tondo Yesu ntakwide kyampa, ububo Pilato angamine nunse. Yesu Asungibwa Buno Akue
6 Ku Kisagulo na Kisagulo, abakandulilaga mukandwa umozi, wozo wasegwa na bantu. 7 Kwabezaga mukandwa umozi wamanagwa buno Baraba akandilwe gamozi na bantu babezaga na misona nu beitanaga mu misona. 8 Musanganano wavule balingile kumusega buno abakitile anga bwabakitilaga. 9 Pilato abakwide bunee: “Ndi mukutunda nimukandulile Mukota wa baYuda?” 10 Kubuno amenyine buno basankoga banene bamugabwide ku kabamba ka lugi. 11 Tondo basankoga banene basindikile musanganano buno Pilato abakandulile Baraba. 12 Pilato akwide lingo abatendile bunee: “Umpanga nikite buni na Wono u mukumana Mukota wa baYuda?” 13 Balalukile lingo bunee: “Atakwe ku musalaba!” 14 Pilato abatendile bunee: “Bubi bukizi bwakitile?” Nu balalukile lingo bubibu bunee: “Atakwe ku musalaba!” 15 Pilato atundile kubogiabogia musanganano abakandulide Baraba. Nu gaasilile kususula Yesu, amugabwide buno atakwe ku musalaba.
Bakoloboyo Bakwililika Yesu
16 Bakoloboyo bendile na Yesu ga numba za mukota (u ga Praitorio),a nu bamanine kingo kibombo kya bakoloboyo. 17 Bamuvwalikizie nsulu zakisimana, nu balukile nkumbu za bukota za mikele, bamuvwalikiziezo. 18 Nu balingile kumusambizia: “Samba, Mukota wa baYuda!” 19 Nu bamulibwide ku itoe na kati, bamuswilide matazi nu bamukomenne mazu nu bamukumbaminne. 20 Nu gabasilile kumwililika, bamutikizye nsulu zakisimana bamuvwalikizie nsulu zage nu bendile nage buno bamutake.
Yesu Atakilwe ku Musalaba
21 Basungizie muntu umozi watingaga, atukaga ku masoa, izina lyage Simoni muKurene, isi wa Alesanduro nu Rufu, buno eeke musalaba wa Yesu ku magala. 22 Nu bendile na Yesu ku kiziki kyamanagwa Golgota, bwisulilwa bwakyo bunee: “Kiziki kya lukungu.” 23 Bamukasile maku masambikwa na kansembia buno anue, tondo ntamanune. 24 Bamutakile ku musalaba nu babeganizie nsulu zage, bazesede mbale buno na muntu na muntu na utola kikizi. 25 Gabede buse nkungu isatu za nindunindu u nkungu zibamutakile ku musalaba. 26 Babikile ku musalaba masanzo masanzilwe ma katati ka lusungio lwage bunee: “Mukota wa baYuda.” 27 Bamutakile gamozi na banyagi babili ku musalaba, umozi ku kuboko kwage kwa seidume nu ungo ku kuboko kwage kwa seikazi. [ 28 Buno isanzo lizindilile lyatendile bunee: “Aganzilwe na bagi.”]
29 Nu babo batingaga bamulingaga nu batengezietengezie matoe mabo; nu batendile bunee: “Ee! Ee! Uwe wasambulaga numba za kukumbamina nu ku bindi bisatu nti wazobaka, 30 iyonie lino uwenyene, nu igezye ku muti wa musalaba!” 31 Ububo, basankoga banene gamozi na basozi ba milembe bamwililikile bwabobwabo nu batendile bunee: “Onezie bango, nu ntanavwama kwiyonia wenyene! 32 Kristo, Mukota wa baIsraeli eigezye ku muti wa musalaba! Bubo tumone, nu tukatizie.” Nu babo batakilwe gamozi nage nu bo bamulingile.
Lukuo lwa Yesu
(Mat 27:45-56; Lk 23:44-49; Yn 19:28-30)
33 Nu gakukile nkungu mutuba, kwabezaga kapilo ku kisi kinsania aaba nu ku nkungu mubula. 34 Nu ku nkungu mubula, Yesu alalukile n'iyuki inene bunee: “Eloi, Eloi, Lama Sabaktani?” Bwisulilwa bwa bubo: “Kalaga wane, Kalaga wane, kubuni kuwandekelela?” 35 Nu bango babezaga bemana gago gabongule ku bubo, batendile bunee: “Lolazi, akumana Elia!” 36 Nu umozi wa kubeli eitumine lubilo akatile lwata alwiyazizie na maku mabezaga ngigi nu abikile mo ku musumbo, amunusizie mo nu atendile bunee: “Musigazi tanga, tulole ndi Elia avwe kumukumbia!” 37 Tondo Yesu alilile n'iyuki inene nu eidekanizie.
38 Nsulu za numba za kukumbamina zatikile bibe bibili kutukila kwigulu aaba nu gansi. 39 Wozo mukota wa bakoloboyo, wabezaga walolelana na Yesu, gongule kulaluka kwage nu gaamonine edekania, atendile bunee: “Lebelebe Muntu Wono abezaga Mwana wa Kalaga!”
40 Nu kwabezaga bakikulu balolaga bulazi munkatini mwabo, kwabezaga Maria Magadala, Maria nina wa Yakobo muto nu wa Yose, nu Salome. 41 U babo bamuyangile nu kumukitila gaabezaga ku Galilaya. Nu bango beingi bendile gamozi nage ku Yerusalema.
Kubikwa kwa Yesu mu Nsinda
42 Gabwabede buse mwigolo, bubuno bwabezaga busi bwa kulongeka, u kutenda buno kwabezaga kuse kwasigala kindi kimozi lwabusio lwa Busi bwa Sabato. 43 Yosefu wa Arimatea, muntu munene wa lusu lwa nango, nu we wenyene alindilaga Bukota bwa Kalaga, avule, agelekile kwenda kwa Pilato kusega kitumba kya Yesu. 44 Pilato angamine gongule buno es'akua. Amanine mukota wa bakoloboyo nu amubuzizie buno ndi Yesu es'izizia alekana. 45 Gaasambalidwe na wozo mukota wa bakoloboyo, akasile Yosefu kikyo kitumba. 46 Nu Yosefu akunzile isanda, agezizie kitumba kya Yesu ku musalaba, akigondile na lilyo isanda nu akibikile mu nsinda zombilwe mu ikozi. Kusila akumbizie ikozi inene nu kuziba mwingilo wa nsinda. 47 Nu Maria wa Magadala nu Maria nina wa Yose balolile kuko kubamubikile.