Ngatu Bakugabula Yesu mu Maboko ma Pilato
27
1 Gabede buseli nindunindu, basankoga banene bansania nu bakulu ba bantu bamukalide lwango, buno beite Yesu. 2 Nu bamukandile, nu bendile nage, nu bamukasenne ku Pilato wozo wabezaga mukota. Yuda Abezaga na Mpipi Nnene nu Ikamine
3 Nu Yuda wamugabwide, gaamonine es'asungibwa, eibezizie nu asubizizie basankoga nu bakulu bibyo binkulumba makumi masatu bya feza. 4 Atendile bunee: “Nagile kubuno nagabwide mikila ziteli na bwagi!” Batendile bunee: “Ta kitondo kyeitu! Kili kitondo kyobe uwenyene!” 5 Eisile bibyo byindi bya feza gansi mu kiziki kyasililila, nu endile kwikama.
6 Nu basankoga banene basongezye bibyo byindi bya feza, batendile bunee: “Tabwakulungana ku mulembe kubika feza zeno gamozi na bingo bikulo mu isuku, kubuno bili bukunza bwa mikila.” 7 Nu bakalile lwango lwabo, nu bakunzile kiziki kyabezaga kya mubumbi wa nyungu, buno kibe kiziki kya nsinda za bageni. 8 Ku bubo bakumana kiziki kikyo bunee: “Isoa lya mikila,” aaba nu kano kaluma. 9 Buno buzindilile bwatendagwa na mulengania Yeremia bunee: “Babikile binkulumba makumi masatu bya feza, bubo buli bukunza bwa wozo wakunzilwe, anga bubakitile bukunza bwa bana ba Israeli; 10 nu bazikasenne ku kiziki kya mubumbi wa nyungu, anga bwakakizizie Mukota.”
Pilato Akubuzia Yesu
11 Yesu emenne lwabusio lwa mukota Pilato; nu wozo mukota amubuzizie bunee: “Ndi uwe u Mukota wa baYuda?” Yesu amwakwide bunee: “U bubo buwatenda.” 12 Nu gaakandikilwe na basankoga banene nu bakulu, ntatendile bwampa. 13 Ububo Pilato amubuzizie bunee: “Ndi ntukungwa ku bitondo byingi bibakukukandika?” 14 Nu ntamwakwide bwampa; nu ku bubo mukota angamine.
Yesu aba Baraba u wakandulwe?
15 Na busi na busi bubakitaga kisagulo, mukota abakandulilaga mukandwa umozi, wozo u batunda. 16 Nu babezaga na mukandwa umozi munene, amanagwa buno Baraba. 17 Nu gabakundamenne, Pilato ababuzizie bunee: “Mukutunda nimukandulile nazi? Baraba, aba Yesu ukumanwa buno Kristo?” 18 Kubuno abezaga eizi buno babo bamukandikile tugu ku kabamba ka lugi.
19 Nu gabezaga Pilato ek'eikala ga kisumbi kya lusungio, mukikulu wage amusingide mugenzi bunee: “Ntube na kitondo kyampa ku muntu wono wisanana, kubuno lelo nabezaga nkubabazibwa mu ndozi ku kabamba kage.”
20 Basankoga banene nu bakulu babwide musanganano buno basege Baraba nu kwita Yesu. 21 Tondo mukota ababuzizie bunee: “Ku babo babili, nazi u mukutunda nimukandulile?” Nu bo bakwide bunee: “Baraba!” 22 Pilato ababuzizie bunee: “Buni bunikita na Yesu ukumanwa Kristo?” Bansania beitabizizie bunee: “Atakwe ku musalaba!” 23 Ababuzizie bunee: “Bubi bukizi bwakitile?” Nu balalukile bubibu bunee: “Atakwe ku musalaba!” 24 Gamenyine Pilato buno bubo bwabatendaga tabwabaswagila, tondo kazege kitide, atolile mazi, nu ogile ku maboko lwabusio lwa musanganano, atendile bunee: “Nsili na katati lingo ka mikila za muntu wono wisanana! Kili kitondo kyeinyu!” 25 Nu bantu bansania bamwakwide bunee: “Mikila zage zibe gantata geitu nu gantata ga bana beitu!” 26 Ububo abakandulide Baraba; tondo akakizizie buno Yesu asusulwe, nu amukasenne buno atakwe ku musalaba.
Bakubika Yesu Nkumbu za Mikele ku Itoe.
Bakwenda Kumutaka ku Musalaba
27 Nu bakoloboyo ba mukota bendile na Yesu ku Praitorio, u numba za mukota, nu kibombo kinsania kya bakoloboyo kyamukonganinne. 28 Nu bamutikizye nsulu zage nu bamuvwalikizie nsulu zakisimana. 29 Nu bamulukide nkumbu za mikele nu bamubikilezo ku itoe
lyage, nu babikile musumbo mu kuboko kwage kwa seidume; nu bakomine mazu lwabusio lwage nu bamwililikile bunee: “Samba, Mukota wa baYuda!” 30 Nu bamuswilide matazi, nu bakatile musumbo nu bamulibwidego ku itoe lyage. 31 Nu gabasilile kumwililika, bamutikizye nsulu zakisimana, nu bamuvwalikizie nsulu zage lingo, nu bendile nage buno bamutake ku musalaba.
32 Nu gabatukile kuko, basangile muntu wa kisi kya Kurene, izina lyage Simoni, bamwekezie musalaba wa Yesu ku magala mabo.
Bakutaka Yesu Musalaba
33 Nu gababasile ku kiziki kyamanagwa Golgota, bwisulilwa bunee: “lukungu,” 34 bamukasile maku masambikibwa na bili ngigi buno amanue, tondo gaasondile mo, asombile kumanua.
35 Nu gabasilile kumutaka ku musalaba, babeganizie nsulu zage, bazesede mbale, 36 nu beikede gansi kumulanga. 37 Nu babikile g'itoe lyage bitondo bibamukandikaga, byasanzilwe bunee: “WONO U YESU MUKOTA MUNENE WA BAYUDA.” 38 Nu kwabezaga banyagi babili batakilwe gamozi nage ku misalaba, umozi ku kuboko kwage kwa seidume, nu ungo ku kuboko kwage kwa seikazi.
39 Babo batingaga mu nzila bamulingile nu batengezietengezie matoe mabo, 40 nu batendile bunee: “Uwe mwenduzi wa numba za kukumbamina, nu kuzobaka mu bindi bisatu, iyonie lino uwenyene, ndi uwe u Mwana wa Kalaga, kasi igezye ku musalaba.” 41 Basankoga nu basanzi nu bakulu bamwililikile lingo, batendile bunee: 42 “Onezie bango, ndi ntanavwama kwiyonia wenyene? Ndi We eli Mukota wa Israeli, kasi igezye ku musalaba, nu iswe nti twamukatizie. 43 Akatizizie Kalaga; kasi Kalaga amwonie kano kaluma, ndi akumutunda; kubuno atendile bunee: ‘Nili Mwana wa Kalaga.’” 44 Nu babo banyagi batakilwe gamozi nage bamutendile nu bo bubo lingo.
Kukua kwa Yesu Kristo
45 Kutukila nkungu mutuba, kwabede kapilo ga kisi kinsania nu kwika ku nkungu mubula. 46 Nu mu nkungu mubula, Yesu alalukile n'iyuki inene, atendile bunee: “Eli, Eli, lama sabaktani?” Bwisulilwa buli bunee: “Kalaga wane, Kalaga wane, kubuni kuwansigilila?” 47 Bango babezaga bemana, gabongule ku bubo, batendile bunee: “Wono akumana Elia!” 48 Nu nkungu zongo, umozi wa kubeli endile lubilo, akatile lwata, nu alwiyazizie na maku mabezaga ngigi, nu aluswikile ku musumbo nu amunusizie mo. 49 Bango batendile bunee: “Siga tanga, tumone ndi Elia akuvwa kumwonia!” 50 Yesu alalukile n'iyuki inene lingo, nu eidekanizie.
51 Nu nsulu zabezaga zatendekwa mu numba nnene za kukumbamina zatikile bibe bibili kutukila kwigulu aaba nu gansi, nu kisi kyatengiletengile nu nanda zatikile; 52 nu nsinda zalimbukile; nu mibili mingi za bakuzi basililila zayukile kutuka ku bakuzi. 53 Nu bo batukile mu nsinda, nu kusila kwa kuyuka kwa Yesu kutuka ku bakuzi, beingide mu mwino wasililila nu bamonekileko na bantu beingi.
54 Mukota wa bakoloboyo lukama nu bango babezaga gamozi nage bakulanga Yesu, gabamonine buno kisi kise kyatengatenga nu binsania byakitilwe, babede na boba nunse, nu batendile bunee: “Lebelebe wono abezaga Mwana wa Kalaga!” 55 Nu bakikulu beingi babezaga gago balolelaga kulazikulazi, nu bo babezaga ba ku Galilaya, u babo bayangaga Yesu, nu kumukitila. 56 Nu mu babo, u mwabezaga Maria Magadala, nu Maria nina wa Yakobo nu Yose, nu nina wa bana ba Zebedayo.
Bakubika Yesu mu Nsinda
57 Nu gabwabede buse mwigolo, muntu umozi mugumi wa ku Arimatea avule, izina lyage Yosefu, wozo abezaga nu we mwigisibwa wa Yesu. 58 Nu muntu wono endile ku Pilato, asegile mubili wa Yesu. Ku bubo Pilato abakakizizie buno bamukasego. 59 Yosefu atolile kitumba, akivwalikizie nsulu zenga zabota, 60 nu akibikile mu nsinda zage nto, zabezaga zombwa mu lwanda nu akumbizie ikozi inene, alibikile ga mwingilo wa nsinda nu endile. 61 Nu Maria Magadala abezaga gago, nu ungo Maria, babezaga beikala lwabusio lwa nsinda.
Bulangi bwa Nsinda
62 Gatingile busi bwa kulongeka, babo basankoga banene nu baFarisayo bakundamenne gamozi ku Pilato, 63 batendile bunee: “Mukota, tuki twakengela iyuki lya wozo mwengelezi gaabezaga eikili na kalamo, atendile bunee: ‘Nayuke kutuka ku bakuzi kusila kwa bindi bisatu.’ 64 Umpanga kakizia buno nsinda zilangwe aaba nu kusila kwa bindi bisatu, kubuno beigisibwa bage banavwa kwiba kitumba kyage, nu kubula bantu bunee: ‘Ayukile kutuka ku bakuzi.’ Ndi bakita bubo, bwengelezi bubo buzinda bunatinga butangi.” 65 Pilato ababwide bunee: “Inyuwe muli na balangi, endazi muzilange anga bumwavwama.” 66 Beiyendede, balangile nsinda busoga, babikile kamenyikilo ku lilyo ikozi nu babikile bakoloboyo balangi bababezaga nabo.