Yesu Akusungula baFarisayo
16
1 BaFarisayo nu baSadukayo bavule kulindika Yesu, nu bamubwide bunee: “Tulolesie mugeleko ukutuka kwigulu.” Abakwide bunee: 2 “Kungwa buse mwigolo mukutendaga buno, ‘Kwabe bwange lubi; kubuno igulu lyakangukilwa.’ 3 Nu mu nindunindu mukutendaga buno, ‘Lelo kwete kisoa: kubuno igulu lyakisimana nu lina bupi.’ Inyuwe bengelezi, mukumenyinina igulu; tondo tamukumenyinina tulolesio twa nkiko! 4 Inyuwe kibuti kibi kitakukatizia Kalaga nu mukutunda kalolesio; tondo tamukalolesibwa kango kalolesio, umpanga ka Yona.” Nu Yesu abasigile, nu endile. Yesu Anine Beigisibwa Bage Kukenga Mugago wa baFarisayo
5 Nu beigisibwa basokile lisilya lya kitatenge, beibilide kweka tumpampa twa kulia. 6 Nu Yesu ababwide bunee: “Idangazi na mugago wa baFarisayo nu baSadukayo.” 7 Batendenne bwabobwabo bunee: “Tatwavule na tumpampa.” 8 Nu gamenyine Yesu bubakengelaga atendile bunee: “Inyuwe batamba mu bukatizio, kubuni bumukutendana bunee: ‘Tatwavule na tumpampa?’ 9 Inyuwe tamukumenyinina aba ndi tamukukengela ku tumpampa tutano nu bantu babezaga bakuka tununu tutano, nu nzi inga zimwasongezye? 10 Inyuwe ndi tamukukengela tumpampa mutubakamo nu bantu babezaga bakuka tununu tunazi, nu nzi inga zimwasongezye? 11 Ndi tamwizi buno nsyamubulaga kampampa ka kulia? Tondo namubulaga tugu buno mwidange na mugago wa baFarisayo nu baSadukayo.” 12 Ububo, bamenyine buno ntabatendile ku mugago wa tumpampa, tondo abatendile tugu ku meigisia ma baFarisayo nu baSadukayo.
Petro Eitabizia Buno, Yesu Eli Mwana wa Kalaga
13 Gavule Yesu mu ndenge za Kaisaria Filipi, abuzizie beigisibwa bage bunee: “Bantu bakubula buno Mwana wa Muntu eli nazi?” 14 Batendile bunee: “Bamozi bakutenda bunee: ‘Eli Yoana Mututiki;’ bango bunee: ‘Eli Elia;’ bango bunee: ‘Eli Yeremia,’ aba ‘eli umozi wa ku balengania.’” 15 Ababuzizie bunee: “Tondo inyuwe mukutenda buno nili nazi?” 16 Nu Simoni Petro amwakwide bunee: “Uwe u Kristo, Mwana wa Kalaga uli mulami.” 17 Yesu abakwide bunee: “Simoni mwana wa Yona: mbogimbogi kuguli; ta menge ma bantu u makumenyesia bubo, tugu Tatane uli mwigulu. 18 Nu nne, nkukubula bunee: ‘Uwe u Petro, a gantata ga lwanda luluno nkobaka kanisa kane; nu magala ma kiziki kya bakuzi Hadese tamakakeigula. 19 Nkakukasa mitandulwa za Bukota bwa meigulu; nu kinsania kiwakandage ga kisi, nti kyakandwa nukyo mwigulu; nu kinsania kiwakandulage ga kisi, nti kyakandulwa nukyo mwigulu.’”
20 Ku bubuno, Yesu akakizizie beigisibwa bage bubibu buno, tabasambalile muntu buno We u Kristo.
Yesu Akulolesia Kukua nu Kuyuka Kwage
21 Kutukila nkungu zezo Yesu alingile kulolesia beigisibwa bage buno, atunganana kwenda ku Yerusalema, nu kubabazibwa na bakulu nu na basankoga banene nu basozi, nu kwitwa nu kuyukibwa kusila kwa bindi bisatu. 22 Nu Petro amumanine nu amwakanizie bunee: “Tabwabe bubo, Mukota! Bitondo bibino tabyakubasile aba kakeke!” 23 Yesu atimbukile, abwide Petro bunee: “Enda kumbusa kwane, Satana, uli ikozi lya kukikitania, kubuno makengelo mobe tameli ma Kalaga, meli ma bantu.” 24 Yesu abwide beigisibwa bage bunee: “Ndi muntu atunda kunyanga, eitune, nu eeke musalaba wage, nu anyange. 25 Kubuno muntu unsania ukutunda konia kalamo kage akakazimizia: nu unsania ukukazimizia ku kabamba kane akakamona. 26 Mutali mukizi wa muntu ndi angata kisi kinsania, nu kuziminwa na kalamo kage? Aba muntu anagulania kikizi na kalamo kage? 27 Kubuno Mwana wa Muntu akavwa mu lutanuno lw'Isi nu gamozi na banzelo bage, nu busi bubo akaliga muntu na muntu anga bwakitaga. 28 Lebelebe, nkumubula bunee: ‘Bamozi bemana gano tabakue aaba nu gabamone ku Mwana wa Muntu akuvwa mu Bukota bwage.’”