Yesu Akulisia Bantu Tununu Tunazi
8
1 Mu bindi bibyo, musanganano wabede munene lingo, nu ku kitondo kya buno tababezaga n'idia, Yesu amanine beigisibwa bage kweli, nu abatendile bunee: 2 “Nkukwila musanganano kyombo; kubuno lola nise nabo bindi bisatu, nu bo tabeli n'idia: 3 nu ndi nabasinga kwabo, tabalia, nti bakutwa mu nzila; kubuno bamozi kubeli batukile kulazi.” 4 Beigisibwa bage bamwakwide bunee: “Kiziki kikino kili kalula. Nazi muntu uneikutia babano na tumpampa twa kubalisia?” 5 Yesu ababuzizie bunee: “Tumpampa tunga tumuli nato?” Bamwakwide bunee: “Mutubakamo tugu.” 6 Akakizizie musanganano wikale gansi, atolile tumpampa mutubakamo, nu gaasilile kuganuna Kalaga, atubungwide, nu atukasenne ku beigisibwa bage, buno bababeganizie to; nu batubeganizizie musanganano. 7 Babezaga lingo na twabyena tukeke tatwingi. Nu Yesu aganwine Kalaga kubyo, nu abakakizizie buno babakase byo. 8 Balide nu beikutile, nu basongezye nzi mutubakamo zizile na mbobu zasigede. 9 Babo baliaga babezaga bakuka bantu tununu tunazi, nu Yesu alagenne nabo. 10 Kazanga kongo eingide mu bwato na beigisibwa bage, nu babasile mu ndenge za Dalmanuta. BaFarisayo Bakusega ku Yesu
11 BaFarisayo babasile nu balingile myango na Yesu, nu balondaga kumugeleka, bamusegile buno akite mugeleko wa kulolesia buno bwangato bwatukile ku Kalaga. 12 Yesu abede na kabebe kanene mu mutima wage, atendile bunee: “Kubuni kibuti kikino kikulonda mugeleko? Lebelebe nkumutenda buno, kibuti kikino takikalolesibwa kalolesio.” 13 Kusila abasigile, nu eingide lingo mu bwato, nu endile ku lisilya.
Mugago wa baFarisayo nu wa Herode
14 Beigisibwa beibilide kutola tumpampa, tondo babezaga tugu na kamozi mu bwato. 15 Yesu abakakizizie bunee: “Idangazi na mugago wa baFarisayo nu wa Herode.” 16 Beigisibwa batendenne bwabobwabo bunee: “Buligo kubuno tatuli na tumpampa.” 17 Yesu abumenyine, abatendile bunee: “Kikizi kimukwakanizania buno tamuli na tumpampa? Ndi tamumenya, aba tamusongolola? Kubuni mitima zeinyu zikili mibibu? 18 Muli na meiso, tamukumona? Muli na matuzi, tamukungwa? Aba tamukukengela? 19 Ganabungwide tumpampa tutano ku bantu bakuka tununu tutano, nzi inga ziyede na mbobu zimwasongezye?” Bamwakwide bunee: “Ikumi nu ibili.” 20 “Nu ganabungwide tumpampa mutubakamo kukasa bantu bakuka tununu tunazi, nzi inga ziyede na mbobu zimwasongezye?” Bamwakwide bunee: “Mutubakamo.” 21 Nu abatendile bunee: “Ndi tamumenyinina aaba nu kano kaluma?”
Yesu Akonia Kyuku ku Betesaida
22 Babasile ku Betesaida. Nu bavwilide Yesu na kyuku, bamusegile buno eitubye kweli. 23 Akatile kyuku g'ikoko, nu endile nage ku isula lya mwino; kusila amuswilide matazi ku meiso, nu abikile maboko gantata g'itoe lyage, nu amubuzizie bunee: “Ndi ukumona kena?” 24 Alolile kwigulu, nu atendile bunee: “Namona bantu, tondo nabamonako anga miti zikutabanga.” 25 Yesu amubikile lingo maboko ku meiso mage; nu galolile kyuku kizungululu, onezibwe, nu amonine binsania busoga. 26 Nu Yesu amusingile ku numba zage, amutendile bunee: “Ntwingile mu mwino.”
Petro Akutenda Buno Yesu Eli Masiya
27 Yesu endile na beigisibwa bage; mu miino za Kaisaria Filipi, nu abuzizie beigisibwa bage mu nzila bunee: “Bantu bakutenda buno, nili nazi?” 28 Bamwakwide bunee: “Bamozi bakutenda buno, Yoana Mututiki. Bango buno, Elia, bango buno, umozi wa balengania.” 29 Nu We ababuzizie bunee: “Tondo inyuwe mukutenda, nili nazi?” Petro amwakwide bunee: “Uwe u Kristo.” 30 Yesu abakakizizie nunse buno, tabasambalile muntu umozi musagu wage.
Yesu Akulengania bwa Lukuo Lwage
nu Kuyuka Kwage Kutuka ku Bakuzi
31 Nu alingile kubeigisia bunee: “Bwatunganana Mwana wa Muntu kubabazibwa bubibu nu kusombwa na bakulu, na basankoga nu na basozi ba mulembe; nu kwitwa nu kusila kwa bindi bisatu nti ayuka.” 32 Abatendile bubo bwasibwasi. Nu Petro eitundile nage ku kakungu, nu alingile kumuzugila. 33 Tondo Yesu agalukile, nu alolile beigisibwa bage azugide Petro: nu atendile bunee: “Enda kumbusa kwane, Satana, kubuno ntukukengela bitondo bya Kalaga tondo makengelo ma bantu.”
34 Kusila, amanine musanganano nu beigisibwa bage, abatendile bunee: “Ndi muntu akutunda kunyanga, eitune wenyene, eeke musalaba wage nu anyange. 35 Kubuno wozo ukutunda konia kalamo kage akakazimizia; tondo wozo ukakazimizia ku kabamba kane nu ku Musagu Musoga nti akakonia. 36 Kubuno mutali mukizi wa muntu ndi angata kisi kinsania, nu kumbusa kuzimizia kalamo kage? 37 Aba muntu anagulania kikizi na kalamo kage? 38 Kubuno muntu unsania ukankuaga nsoni nu malagi mane munkatini mwa kibuti kikino, kya butazi nu kya bubi, Mwana wa Muntu nti akamukua nu We nsoni, gaakavwa mu lutanuno lw'Isi, na banzelo bage basililila.”