9
1 Abatendile lingo bunee: “Lebelebe nkumubula buno, bamozi ku beli gano tabakakua lwabusio tabemona ku Bukota bwa Kalaga bwavwe na magala.” Kugaluka kwa Kilungi kya Yesu
2 Kusila kwa bindi mutuba, Yesu atolile Petro, nu Yakobo, nu Yoana, nu endile nabo bobenyene gantata ga mwiduko mulazi. Kilungi kyage kyabagalukide. 3 Nsulu zage zakelimine, zabezaga zenga nunse nu butanamenya mukulumizi wa ga kisi kuzengia. 4 Elia nu Musa bababaside, batendile na Yesu. 5 Petro atendile ku Yesu bunee: “Rabbi, a buli busoga ndi twikala gano. Tobakazi nusu isatu, lumozi lwobe, lumozi lwa Musa, nu lumozi lwa Elia.” 6 Kubuno ntamenyaga bwa kutenda, kubuno bakule boba nunse. 7 Kimpa kyabakukide, nu iyuki lyatukile mu kimpa bunee: “Wono eli Mwana wane, Mutundwa wane, mungwililazi!”
Yesu Atabangile Gantata ga Mazi
8 Nu kazanga kongo, gabagebilegebile, tabamonine ku ungo muntu; umpanga Yesu tugu wenyene gamozi nabo.
9 Nu gabakumbaga mwiduko, Yesu abakakizizie bunee: “Tamusambalile muntu wampa ku bumwamonine kubo, aaba nu gakayuka Mwana wa Muntu kutuka ku bakuzi.” 10 Bakokomezizie idagi lilyo, babuzanizie bwabobwabo bunee: “Kuyuka kutuka ku bakuzi kuli buni?” 11 Beigisibwa bamubuzizie bunee: “Kubuni basanzi bakutenda buno Elia atunganana kulinga kuvwa?” 12 Abakwide bunee: “Elia akalinga kuvwa nu kukunga binsania. Nu kubuno bwasanzidwe Mwana wa Muntu buno atunganana kubabazibwa nu kubengwa? 13 Tondo nkumutenda buno, Elia avule kalazi, nu bamukitile anga bubatundaga, anga bwasanzilwe kweli.”
Yesu Akonia Musikila Wabezaga na Musumbu
14 Gababasile bwigi na bango beigisibwa, bamonine ku musanganano munene wabatimba nu basozi ba mulembe babuzanizie nabo. 15 Gamonine musanganano ku Yesu, baganineganine nunse, nu bavule lubilo kumusekela. 16 Ababuzizie bunee: “Buni bumukwenda myango nabo?” 17 Nu muntu umozi mu wozo musanganano amwakwide bunee: “Musozi, nakuvwilide na mwana wane wamulume, eli na musumbu ukinsa eli kaluma. 18 Kunsania kwamukatila, nti amugusia gansi, mwana nti es'abasa iyulo nu kukeketa meinyo, nu es'atintimana. Nasegile ku beigisibwa bobe buno bamutikye, tondo tabavwamine.” 19 Yesu abatendile bunee: “Inyuwe kibuti kikyo kiteli na bukatizio! Ndi nkeikalaga n'inyu kankanka? Gani gankakutilwa n'inyuwe? Vwazi nage kundi.” 20 Nu bavule nage kweli. Nu kazanga kongo gamonine mwana ku Yesu, musumbu amutengezietengezie bubibu; agwede nu eibulubutizie gansi, nu abasile iyulo. 21 Yesu abuzizie isi bunee: “Kutukila nkungu nkizi eli bubuno?” Amwakwide bunee: “Kutukila ku bwana bwage. 22 Nu mambizi meingi musumbu akumutumbaga ga keiya nu mu mazi buno amwite. Tondo ndi unavwama kukita kampa tukwile kyombo nu tukasie.” 23 Yesu amutendile bunee: “Bwisulilwa bukizi, ‘ndi unavwama,’ bunsania bwakulungana ku wozo wakatizia.” 24 Nu kazanga kongo, isi wa wozo mwana alalukile, atendile bunee: “Nakatizia, nkasie ku kutakatizia kwane!”
25 Gamonine Yesu ku musanganano ukuvwa lubilo kukundamana nage, azugide wozo musumbu nu amutendile bunee: “Uwe musumbu wa kaluma nu wa kimbula matuzi, nakukakizia bunee: ‘Tuka mu wono mwana nu ntwingile mweli lingo!’” 26 Nu atukile, alalukile, nu amugilimizizie bubibu, nu atukile. Mwana abede anga mukuzi. Nu beingi batendile bunee: “Akua.” 27 Tondo Yesu amukatile g'ikoko nu amuzanzwide. Nu emanine.
28 Geingide Yesu mu numba beigisibwa bage bamubuzizie ku lumbisombiso: “Kubuni tatwavwamine kutikya wozo musumbu?” 29 Abatendile bunee: “Bubuno tabunavwama kutuka tugu kuteli masego.”
Yesu Akusambala Lingo Kukua Kwage
nu Kuyuka Kwage Kutuka ku Bakuzi
30 Batukile kuko nu batingile ku Galilaya. Yesu ntatundaga muntu kumenya bubo. 31 Kubuno eigisagia beigisibwa bage nu abatendile bunee: “Mwana wa Muntu akasanwe ku maboko ma bantu bamwite; nu, kusila kwa bindi bisatu nti ayuke kutuka ku bakuzi. 32 Tondo, beigisibwa tabamenyininne kitondo kikyo nu bakule boba kumubuzia.”
Nazi Uli Munene?
33 Babasile ku Kapernaumu, gababede bese mu numba, Yesu ababuzizie bunee: “Kikizi kimwakananizanagia mu nzila?” 34 Tondo beikede kibibi, kubuno babezaga bakwakanania mu nzila buno, nazi uli munene. 35 Nu eikede gansi, amanine babo ikumi nu babili, nu abatendile bunee: “Ndi muntu akutunda kuba mutangi, abe muzinda ku bansania nu mukiti wa bansania.” 36 Nu atolile mwana muto nu amubikile munkatini mwabo; nu amukatile mu maboko mage abatendile bunee: 37 “Na muntu na muntu wasekela umozi ku babano bana bato mu izina lyane, nti ansekela; nu wozo wansekela, nti ntansekela, tondo nti asekela wozo wansingile.”
Wozo Utatusomba Nti Eli ku Lulenge Lweitu
38 Yoana amutendile bunee: “Musozi, twamonine ku muntu umozi watikagia basumbu ku izina lyobe, nu twamuzugide, kubuno ntakutuyanga.” 39 Tondo Yesu abakwide bunee: “Tamumuzugile, kubuno takuli muntu unakita mugeleko ku izina lyane nu ku nkungu nkeke kuntenda bubi. 40 Kubuno wozo utakutusomba nti eli ku lulenge lweitu. 41 Nu unsania ukamukasaga kituma kya mazi ma kunua mu izina lyane, kubuno muli bantu ba Kristo, lebelebe nkumutenda bunee: ‘nti ntakazimizia lukalilo lwage lusoga.’
Bitondo Bikukikitania Muntu ku Bwagi
42 Tondo wozo unsania ukakikitanagia umozi wa ku babano bana bato bakunkatizia, bwatunganana muntu wozo akandwe ikozi inene mu ikosi lyage nu kwiswa mu kitatenge. 43 Ndi kuboko kwobe kukukwagia nti wakusesa; unulumba wingila kitunga mu kalamo kutinga kuba na maboko mabili nu kwenda ku kiziba kya keiya katakuzimaga. [ 44 Gago, ‘mikuso za kulia mibili tazikakua nu keiya takakazima.’] 45 Nu ndi kugulu kwobe kukukwagia, nti wakusesa; unulumba wingila kitunga mu kalamo kutinga kuba na magulu mabili nu kutumbwa mu kiziba kya keiya. [ 46 Gago, ‘mikuso za kulia mibili tazikakua nu keiya takakazima.’] 47 Nu ndi liso lyobe likukwagia, nti walitikya; unulumba wingila mu bukota bwa Kalaga na liso limozi kutinga kuba na meiso mabili nu kutumbwa mu kiziba kya keiya. 48 Gago, ‘mikuso za kulia mibili tazikakua nu keiya takakazima.’ 49 Kubuno na muntu na muntu na ukalungwa na keiya.
50 Munkange guli musoga; tondo munkange taguli na nse lingo, nti gunaswagibwa na kikizi? Mube na munkange mumuli, nu mube na bubobelelo bweinyubweinyu.”