Yesu Akwigisia Kitondo kya Kwita Isonga
10
1 Yesu atukile kuko, endile ku kisi kya Yudea, nu ku lisilya lya Yordani. Musanganano munene wamukundamanine lingo, nu abeigisizie lingo, anga bwabezaga lukita lwage. 2 BaFarisayo bamuvwilide nu kumulindika. Bamubuzizie bunee: “Ndi bwakulungana ku mulembe muntu kutikya mukikulu wage?” 3 Abakwide bunee: “Buni bwamukakizizie Musa?” 4 Bamutendile bunee: “Musa atukasile bwangato bwa kusanza mukanda wa kwita isonga nu kutikya wozo mukikulu.” 5 Nu Yesu abatendile bunee: “Ku bubibu bwa mitima zeinyu ukinsa Musa amusanzide kuko kukakizia. 6 Tondo kutukila kulinga kwa kubumbwa kwa kisi, Kalaga abumbile wamulume nu mukikulu. 7 ‘Ku kitondo kikino, muntu akasiga isi nu nina nu akalandana na mukikulu wage, 8 nu bobabili bakaba mubili umozi’ aba, tabeli babili lingo tondo beseli mubili umozi. 9 Umpanga kikyo kyakulumanizie Kalaga, muntu ntanakilekanukya.”
10 Gababezaga mu numba, beigisibwa bage bamubuzizie lingo kitondo kikyo. 11 Abatendile bunee: “Wozo watikya mukikulu wage nu kusonga ungo, nti amwitila meiga; 12 nu ndi mukikulu wenyene atuka ku iba wage, nu kusongwa na ungo wamulume nti eita meiga.”
Yesu Akukasana Mponga ku Bana Bakeke
13 Bamuvwilide na bana bakeke buno eitubye kubeli, tondo beigisibwa babazugide. 14 Gamonine Yesu ku bubo, ongilwe nu abatendile bunee: “Sigazi bana bakeke bavwe kundi, nu tamubazugile, kubuno Bukota bwa Kalaga buli bwa babo beli anga babano. 15 Lebelebe nkumubula bunee, muntu unsania uteitabizia Bukota bwa Kalaga anga mwana mukeke ntakeingila nunse mubo.” 16 Kusila, abalelile nu abikile maboko gantata gabo nu abakasile mponga.
Muntu Mugumi
(Lk 18:18-30; 10:25)
17 Nu gendaga Yesu mu nzila, wamulume umozi eitumine lubilo kweli, nu akomine mazu lwabusio lwage: “Musozi musoga,” amubuzizie bunee: “Buni bunikita nipiene kalamo katanakuzinda?” 18 Yesu amutendile bunee: “Kubuni ukummana musoga? Takuli umozi musoga, tugu Kalaga wenyene. 19 Wizi makakizio bunee: ‘Ntwite meiga; ntwite muntu; ntwibe; ntweke munyobe buza; ntwengelele muntu wampa; anza so nu nyoko.’” 20 Amwakwide bunee: “Musozi, nanzile mamano makakizio mansania kutukila bwana bwane.” 21 Yesu, gaamulolile, amutundile nu amutendile bunee: “Wida kimozi tugu, enda, ukunzie binsania biguli nabyo, bikase bazambi, nu wabe na bikulo mwigulu; kusila, nti wavwa nu unyange.” 22 Tondo gongule wamulume ku bubo, akandile malanga mage nu endile na kabebe kanene kubuno abezaga na bikulo byingi.
23 Yesu alolile ku ntungo insania nu atendile ku beigisibwa bage bunee: “Buli bubibu ku bagumi kwingila mu Bukota bwa Kalaga!” 24 Beigisibwa bangamine na bubo bwatendile Yesu. Nu ababwide lingo bunee: “Bana bane, kwingila kwa babo bakulemanina bikulo mu Bukota bwa Kalaga kuli kubibu! 25 Buli neibineibi ngamia kwingila mu itengu lya nsinge, kutinga mugumi kwingila mu Bukota bwa Kalaga.” 26 Beigisibwa bangamine nunse, nu babuzanizie bwabobwabo bunee: “Nu nazi unavwama konibwa?” 27 Yesu abalolile nu atendile bunee: “Bubuno butanakulungana ku bantu, tondo ku Kalaga nti bunakulungana. Kubuno binsania binakulungana ku Kalaga.”
28 Petro alingile kumutenda bunee: “Lola, twasigile binsania nu twakuyangile.” 29 Yesu akwide bunee: “Lebelebe nkumubula bunee: Takuli muntu wasigile numba zage, aba bato bage, aba babitu bage, aba nina, aba isi, aba bana, aba masoa, ku kabamba kane nu ku kabamba ka musagu musoga, 30 atalikilwe mambizi lukama ku nkungu zeno: numba, mibuto, babitu, banina, bana nu masoa, gamozi na tubebe: nu mu nkiko zikavwa, kalamo katanakuzinda. 31 Tondo beingi balingaga bakaba bazinda, nu bazindaga bakaba batangi.”
Yesu Akusambala Limbizi lya Masatu Kukua Kwage
nu Kuyuka Kwage Kutuka ku Bakuzi
32 Nu babezaga mu nzila zenda ku Yerusalema. Nu Yesu endile lwabusio lwabo. Beigisibwa bangamine, nu babo bamuyangile babede na boba. Nu Yesu atolile lingo babo ikumi nu babili nu alingile kubasambalila bibyo byamubasile. 33 “Lolazi, twabakama ku Yerusalema, nu Mwana wa Muntu agabulwe ku basankoga banene nu ku basozi ba milembe, bamusungie buno akue nu bamugabule ku baBilongo. 34 Bamwililike, nu bamuswile matazi, bamususule nu bamwite. Nu, kusila kwa bindi bisatu, nti ayuke kutuka ku bakuzi.”
Isego lya Yakobo nu Yoana
35 Nu Yakobo nu Yoana, bana ba Zebedayo, bavwilide Yesu nu bamutendile bunee: “Musozi, tukutunda utukitile butukukusega.” 36 Abatendile bunee: “Mukutunda nimukitile buni?” 37 Bamutendile bunee: “Utwitabizie, umozi kwikala ku kuboko kwa seidume, nu ungo ku kuboko kwobe kwa seikazi, mu lutanuno lwobe.” 38 Yesu abakwide bunee: “Tamwizi kimukusega. Ndi munavwama kunua ku kituma kikyo kinkunua kukyo, aba kututikwa na lututiko lunatunganana kututikwa kulo?” 39 Bamwakwide bunee: “Tunavwama.” Nu Yesu abatendile bunee: “Mwanue ku kituma kinanue kukyo nu mwatutikwe ku lututiko lunatutikilwe kulo. 40 Tondo kwikala ku kuboko kwane kwa seidume aba ku kuboko kwane kwa seikazi, kikyo kitondo takili kyane, tondo kyakasanwe ku babo bakilongekedwe na Kalaga.”
41 Gongule babo ikumi nu babili ku bubo, bongedwe Yakobo nu Yoana. 42 Yesu abamanine nu abatendile bunee: “Mwizi buno bakota ba baBilongo bakubangata, nu bakota babo bakubakitia. 43 Tondo bubo tabube munkatini mweinyu. Tondo, unsania ukutunda kuba munene, abe mukiti wa banyage, 44 nu unsania ukutunda kuba mutangi gamusamba, abe mukobe wa bansania. 45 Kubuno Mwana wa Muntu ntavule kukitilwa, tondo kukita nu kukasana kalamo kage kuba bukuluzi bwa beingi.”
Yesu Akonia Kyuku Bartimayo
46 Babasile ku Yeriko, nu gabezaga Yesu es'atuka ku Yeriko gamozi na beigisibwa bage nu musanganano munene, mwana wa Timayo, izina lyage Bartimayo, wozo musegi kyuku, abezaga mu ntungo mwa nzila. 47 Gongule buno Yesu wa Nazareti es'avwa, alingile kulaluka: “Mwana wa Davidi, Yesu, nkwile kyombo!” 48 Beingi bamuzugide buno eikale kibibi, tondo itide kulaluka n'iyuki inene bunee: “Mwana wa Davidi, nkue kyombo!” 49 Yesu emanukile nu atendile bunee: “Mumanazi.” Bamanine wozo kyuku. Bamutendile bunee: “Kokomezia mutima, zanzuka akukumana.” 50 Kyuku atede nsulu zage, azanzukile nu avule ku Yesu. 51 Yesu, akwide, amutendile bunee: “Kikizi kyukutunda nikukitile?” Kyuku amwakwide bunee: “Mukota, nkutunda namona.” 52 Nu Yesu amutendile bunee: “Enda tugu, bukatizio bwobe bwakwonia.” Kazanga kongo, amonine, nu amuyangile mu nzila.