Yesu Akutikya Basumbu ba Nsese mu Muntu
5
1 Babasile ku lingo lisilya lya kitatenge, mu kisi kya baGerase. 2 Gatukile Yesu mu bwato, kazanga kongo, akulumenne na muntu watukaga ku nsinda. Muntu wono abezaga na musumbu wa nsese. 3 Muntu wozo abezaga akwikala ku nsinda nu takwabezaga muntu wampa wavwamaga kumukanda, aba na muyololo; 4 kubuno, akandagwa mambizi meingi ku magulu na mizigi za kyuma nu miyololo, tondo akalikagia miyololo nu kubungula mizigi za kyuma. Nu takwabezaga muntu wampa wavwamaga kumubotya. 5 Bindi binsania, musi nu kindi, eikalaga ku nsinda nu ku miduko, alalukaga nu eisumitaga na makozi. 6 Gaamonine ku Yesu bulazi, eitumine lubilo, nu amukumbaminne, 7 nu alalukile n'iyuki inene: atendile bunee: “Nili nobe buni, Yesu, Mwana wa Kalaga Wasakama Nunse? Nkukulumbizia ku Kalaga buno, ntumbabazie!” 8 Kubuno Yesu amutendile bunee: “Tuka mu muntu wono, uwe musumbu mubi!” 9 Nu amubuzizie bunee: “Izina lyobe nazi?” Amwakwide bunee: “Izina lyane ‘Legioni,’ bwisulilwa buli buno, tuli beingi.” 10 Nu amusegile bubibu buno: ntabatikye mu kisi kikino.
11 Kuko ku mwiduko, kwaliaga lusumba lunene lwa ngulube. 12 Nu basumbu bamusegile bunee: “Tusinge mu zezo ngulube, buno twiyingilile muzo.” 13 Abakasile bwangato. Nu basumbu ba nsese batukile nu beingide mu zezo ngulube: nu lusumba lwongo lunsania lwabezaga tununu tubili lwakumbile ku mpinga nu lwiyisile mu kitatenge.
14 Babo balangi bazo batinine, nu basambede musagu mu mwino nu ku babo babezaga bwigi na mwino. Bantu bendile kulola buni bwabede kuko. 15 Gababasile ku Yesu, bamonine ku wozo wabezaga na basumbu beingi, abezaga eikala, es'avwala nsulu, nu ese na menge, nu bakule boba. 16 Babo bamonine ku bubo basambede bubo bwabede ku wozo wabezaga na basumbu, nu musagu wa bwabede ngulube. 17 Nu balingile kusega Yesu buno, atuke mu myaga zabo.
18 Gabezaga Yesu es'eingila mu bwato, wozo wabezaga na basumbu amusegile buno eikale nage. 19 Yesu ntamuzigide, tondo amutendile tugu bunee: “Enda ku numba zobe, nu ku kikanga kyobe, nu kubasambalila bitondo bibino binene byakukitide Mukota, nu bwakukwilide kyombo.” 20 Endile, nu alingile kusambala ku kisi kya Dekapoli bitondo bibino byamukitide Yesu; nu bantu bansania bangamine.
Mukinga wa Yairo nu Mukikulu Witubizie ku Nsulu za Yesu
21 Gasokile Yesu lingo ku lisilya mu bwato, musanganano munene wamukundamanine; nu We abezaga mu ntungo mwa kitatenge. 22 Nu umozi wa ku babo bakota ba mu numba za musanganano, izina lyage Yairo, amuvwilide; nu gaamumonineko, edekede ku magulu mage. 23 Nu amusegile nunse bunee: “Mukinga wane mukeke ese bwigi na kukua; vwa, nu ubike maboko kweli, buno one nu alame!”
24 Endile nage, nu musanganano munene wamuyangile, bamulimbanizie. 25 Mwabezaga mukikulu umozi, wabezaga na lusambo lwa mikila myaka ikumi nu ibili. 26 Ababazizibwe bubibu ku minganga mingi, nu agabwide bikulo binsania byabezaga nabyo. Nu ntonine nunse, tondo lusambo lwage lwitide nunse. 27 Gongule ku musagu wa Yesu, avule kumbusa kwage mu musanganano, nu eitubizie ku nsulu zage. 28 Kubuno akengede bunee: “Ndi nitubya ku nsulu zage tugu, nti nonibwe.”
29 Kazanga kongo mikila zezo zakamine, nu amenyine mu mubili wage buno ona lusambo luluno. 30 Kazanga kongo Yesu amenyine wenyene buno, magala makokoka kweli; nu akebetukile munkatini mwa musanganano, atendile bunee: “Nazi witubya ku nsulu zane?” 31 Beigisibwa bage bamutendile bunee: “Ukumona ku musanganano wono wakukunda, nu ukubuzia bunee: ‘Nazi witubya kundi?’” 32 Nu alolile ndenge insania buno amone ku wozo wakitile bubo. 33 Tondo wozo mukikulu, akule boba, nu agiliminne, amenyine bwabede kweli; avule akomine mazu lwabusio lwage, nu amutendile bulili bunsania. 34 Nu Yesu amutendile bunee: “Mukinga wane, bukatizio bwobe bwakwonia; enda mu bubobelelo, nu lusambo lwobe lwasila.”
35 Nu gaatendaga lingo bubuno, bantu batukile ku numba za Yairo, mwangati wa numba za misanganano; batendile bunee: “Mukinga wobe alekana kalazi. Kubuni kuukukutia Musozi lingo?” 36 Tondo Yesu nteitabizizie bitondo bibyo byatendagwa, atendile ku mwangati wa numba za misanganano bunee: “Ntukue boba, katizia tugu.” 37 Nu ntazigile muntu kumuyanga, tugu, Petro, Yakobo, nu Yoana, mubuto wa Yakobo. 38 Babasile ku numba za wozo mwangati wa musanganano, nu Yesu ongule ku kazege keingi, nu bantu balilaga nu balalukaga bubibu. 39 Geingide nu abatendile bunee: “Kubuni kumukukita kazege, nu kulila? Wozo mukinga ntalekana, tondo eiyombeka tugu.” 40 Nu bamusekile nunse. Nu We, gaabasizie bantu bansania kumbuga, atolile isi nu nina wa mwana, nu babo beigisibwa baabezaga nabo, nu eingide mumo mwabezaga mwana. 41 Amukatile g'ikoko, nu amutendile bunee: “Talita koum,” bwisulilwa bwa bubo buli bunee: “Mukinga, nkukubula bunee: ‘Zanzuka!’” 42 Kazanga kongo mukinga azanzukile nu endile, kubuno abezaga na myaka ikumi nu ibili. Nu bangamine nunse. 43 Tondo Yesu abakakizizie buno muntu wampa ntamenye wono musagu; nu atendile bunee: “Mukasazi idia.”