Bakikulu Bayangaga Yesu
8
1 Kusila kwa bubo, Yesu endile ku mwino na mwino nu ku kyumo na kyumo kwigisia nu kusambala Musagu Musoga wa bukota bwa Kalaga. Nu babo beigisibwa ba Yesu ikumi nu babili babezaga gamozi nage, 2 nu bakikulu bamozi batikizibwe basumbu nu konibwa nsambo: Maria wamanagwa Magadala, wozo watikizibwe basumbu mutubakamo, 3 nu Yoani, mukazi wa Kuza, mulangi wa bikulo bya Herode, nu Suzana, nu bango beingi bamukitilaga na bikulo byabo. Musumo wa Muyiki wa Mbuto
4 Gakundamenne musanganano munene, bantu batukaga ku mwino na mwino bamuvwilide, nu Yesu abeisile wono musumo:
5 “Muyiki wa mbuto atukile ku kuyika mbuto zage: gaabezaga akuziyika, nkindi zakolokile mu ntungo mwa nzila, zanyantilwe na magulu, nu tuzoni twa mu mpelela twazilile. 6 Engo nkindi zakolokile gantata ga lwanda: zasile nu zomine, kubuno zidile mazi. 7 Engo nkindi zakolokile munkatini mwa mikele: nu mikele zasile gamozi nazo, nuzo zazilimbanizie nunse. 8 Nu engo nkindi zakolokile gantata ga bisogo bisoga: mbuto zasile nu zakolamine biguma, nazo nazo na zatikizye lukama.” Nu gaasilile kutenda bitondo bibino, Yesu alalukile n'iyuki inene bunee: “Wozo uli na matuzi ma kungwa ongwilile!”
Yesu Akutunda Kubeigisia mu Misumo
9 Beigisibwa ba Yesu bamubuzizie bunee: “Bwisulilwa bukizi bwa wono musumo?” 10 Abakwide bunee: “Inyuwe mwakasilwe menge ma kumenya twinda twa bukota bwa Kalaga; tondo ku bango bantu bakutendwa bubo mu misumo bunee:
‘Balole, tondo tabamone,
bongwe, tondo tabamenyinine.’
Yesu Akusambala Bwisulilwa bwa Musumo wa Muyiki wa Mbuto
11 Nu bubuno u bwisulilwa bwa wono musumo: mbuto, u idagi lya Kalaga. 12 Babo beli mu ntungo mwa nzila, u babo bakungwa; kusila Satana nti avwa kutikya lilyo idagi mu mitima zabo, buno tabakatizie nu konibwa. 13 Nu babo beli gantata ga lwanda u babo bakungwa ku idagi nu nti bakulisekela na mbogimbogi, tondo tabeli na mizi. Bakukatizia mu nkungu nkeke, tondo bakukindwa mu nkungu za malindiko. 14 Nu zezo zakolokile mu mikele u babo bakungwa ku idagi, nu bakwiyendela, nu bakubabazibwa na tubebe, nu bugumi, nu mbogimbogi za kalamo kakano, nu bo tabakukolama biguma byakula. 15 Tondo zezo zakolokile mu bisogo bisoga, u babo bakungwa ku idagi na mitima za bulili nu misoga, nu nti bakulikokomezia nu bakukolama biguma na komanizia.
Musumo W'itala
16 Takuli muntu unabangia itala nu kulikukila na nyungu, aba kulibisa kunsi kwa mugu; tondo akulibika ga kiziki kyasakama, buno babo bakwingila mu numba bamone ku kyengi kyalyo. 17 Kubuno takuli kena kabisilwe katakabisulwa; aba takuli kakungu katakamenywa bwasibwasi.
18 Idangazi na bumukungwa kubo, kubuno wozo uli na kena, akakaswa, tondo wozo uteli na kena akatikibwa aba kako kaakukengela buno eli nako.”
Nina wa Yesu nu Mibuto Zage
19 Nina nu mibuto za Yesu bavule kweli; tondo tabavwamine kubasa bwigi na kweli kubuno kwabezaga musanganano munene. 20 Asambalidwe bunee: “Nyoko nu mibuto zobe bemana kumbuga nu bakutunda kukumonako.” 21 Tondo abakwide bunee: “Mmane nu mibuto zane u babano bakungwilila ku idagi lya Kalaga nu kukita nalyo.”
Yesu Akubotya Bimpumi
22 Busi bumozi, Yesu eingide mu bwato gamozi na beigisibwa bage: abatendile bunee: “Tusokazi lisilya lya kitatenge.” Nu bendile. 23 Tondo gababezaga bakusoka kitatenge, Yesu eiyombekile. Kisoa kikali kyavule mu kitatenge, nu bwato bwiyede na mazi, nu babezaga gabibu nunse. 24 Bamwendede, nu kumuyukya, nu batendile bunee: “Mukota, Mukota, twazika!”
Ayukile, nu azugide kisoa nu bimpumi bya mazi, nu byolile, nu kwabede kibibi. 25 Kusila, ababwide bunee: “Kuni kuli bukatizio bweinyu?”
Bakule boba nu bangamine nunse, babuzanizie bwabobwabo bunee: “Wono eli nazi, aba akuzugila kisoa nu mazi, nubyo nti bikumwanza?”
Yesu Akonia Muntu Wabezaga na Basumbu
26 Babasile mu kisi kya baGerase kyabezaga lisilya lya kiziba, butunganana na Galilaya. 27 Gatukile Yesu mu bwato, muntu umozi wa wozo mwino wabezaga na basumbu beingi akulumenne nage. Ku bindi byingi, ntavwalaga nsulu, aba nteikalaga mu numba; umpanga ku nsinda. 28 Gaamonine ku Yesu, alalukile bubibu, eidekede ku magulu mage, nu atendile n'iyuki inene bunee: “Uli buni na nne, Yesu, Mwana wa Kalaga Wasakama Nunse? Nkukusega nunse buno ntunsungie!” 29 Kubuno Yesu akakizizie musumbu kutuka mu wozo muntu. Kubuno kutukila wakalazi, mambizi meingi akatagwa na musumbu wozo; nu akandagwa na makoki ma byuma ku maboko nu ku magulu, nu kulangwa na muntu, tondo amasesaga nu nti asindikwa na musumbu mu kalula. 30 Yesu amubuzizie bunee: “Izina lyobe nazi?” Amwakwide bunee: “Legioni” kubuno basumbu beingi babezaga beingila mweli. 31 Nu babo basumbu basegile nunse Yesu buno, ntabasinge buno bende mu muzinga munene.
32 Kwabezaga lusumba lunene lwa ngulube lwaliaga gantata ga mwiduko, nu basegile nunse Yesu buno abakakizie buno beingile mu zezo ngulube; nu We abakasile bwangato. 33 Nu basumbu batukile mu wozo muntu, beingide mu ngulube, nu lusumba lulo lwakumbile lubilo kunsi kwa mpembwe nu lwakule mu iziba lya kitatenge.
34 Gamonine balangi ba ngulube ku bitondo bibino, batinine, nu basambede musagu wozo mu mwino nu mu masoa. 35 Nu bantu bendile kumona ku bubo bwabede. Bavule ku Yesu, nu bamonine ku wozo muntu watukaga mu basumbu, eikala ku magulu ma Yesu, avwala nsulu nu eli na menge; nu bakule boba nunse. 36 Babo bamonine ku bubo bwabede, basambalide bantu buni bwonezibwe wozo wabezaga na basumbu. 37 Nu bantu bansania ba kisi kya baGerase nu ba bwigi nakyo bamubwide bunee: “Tuka mu kisi kyeitu,” kubuno bakatilwe nunse na boba, Yesu eingide mu bwato nu asubizie. 38 Nu wozo muntu watukaga mu basumbu amusegile buno ende nage. Tondo Yesu amusubizie nu atendile bunee: 39 “Subya ku numba zobe, nu sambala mu mwino unsania bunsania bwakukitide Kalaga.” Wozo muntu eiyendede nu asambede mu mwino unsania binsania byamukitide Yesu.
Mukinga wa Yairo nu Mukikulu Witubizie ku Nsulu za Yesu
40 Gasubizie Yesu, musanganano wamusekede kubuno bansania babezaga bakumulindila. 41 Nu lola, muntu umozi wamanagwa Yairo, abezaga mukota wa numba za musanganano, avule nu edekede ku magulu ma Yesu nu amusegile nunse buno eingile mu numba zage! 42 Kubuno abezaga na mukinga umozi wa ngomo, wa bwigi ku myaka ikumi nu ibili, abezaga ese bwigi na kukua.
Gabezaga Yesu es'enda kuko, bantu beingi bamutimbikanizie. 43 Tondo gago gabezaga mukikulu umozi wabezaga na lusambo lwa mikila kutukila myaka ikumi nu ibili, nu azimizizie bikulo byage binsania ku basakizi, nu takuli umozi wa kubeli wavwamine kumwonia. 44 Avule kumbusa kwa Yesu nu eitubizie ku mupimbo wa nsulu zage. Kazanga kongo, kubasa kwage kwa mikila kwasilile. 45 Yesu abuzizie bunee: “Nazi witubya kundi?” Bansania batunine, tondo Petro nu babo babezaga gamozi nage batendile bunee: “Mukota, bantu beingi batutimba nu batukunda.” 46 Tondo Yesu akwide bunee: “Kuli muntu umozi witubizie kundi, kubuno namenyine buno magala matuka kundi.” 47 Wozo mukikulu gaamonine buno amenywa, avule akugilimina nu kwiyisa ku magulu ma Yesu, asambede lwabusio lwa bansania babezaga gago bwitubizagia kweli, nu lukita lukizi lonezibwe mulo. 48 Yesu amubwide bunee: “Mukinga wane, bukatizio bwobe bwakwonia; enda na bubobelelo.”
49 Gabezaga Yesu eki atenda, muntu umozi avule kutukila ku numba za Yairo, mukota wa ku numba za musanganano nu kumutenda bunee: “Mukinga wobe akule, ntukutie lingo musozi.” 50 Tondo Yesu, gongule ku bubo, abwide Yairo bunee: “Ntukue boba, katizia tugu, nu we onibwe.” 51 Gabasile Yesu ku numba za Yairo, ntazigile muntu wampa kwingila gamozi nage, umpanga Petro, Yoana, nu Yakobo, nu isi nu nina wa wozo mwana. 52 Nkungu zezo, bantu bansania babezaga na kabebe nu balililaga wozo mwana. Tondo Yesu abwide bunee: “Tamulile, wono mwana ntakule, tondo eiyombeka!” 53 Nu bamusekile nunse, kubuno bamenyine buno akule. 54 Yesu amukatile g'ikoko, nu alalukile n'iyuki inene bunee: “Mukinga, emanuka!” 55 Muuza wage wamusubizizie lingo, nu kazanga kongo emanukile; nu Yesu abakakizizie buno bamukase idia. 56 Babuti bage bangamine nunse, tondo Yesu abakakizizie buno tabasambalile muntu wampa bubo bwabede.