Muntu Wabezaga Woma Kuboko
3
1 Yesu eingide lingo mu numba za misanganano; asangile muntu mumo, wabezaga woma kuboko. 2 Balolaga Yesu, ndi amonie Busi bwa Kumunwa, u Sabato, buno bamusongele. 3 Nu Yesu atendile ku muntu wabezaga woma kuboko bunee: “Zanzuka, munkatini mwa bantu.” 4 Nu abatendile bunee: “Ndi bwakulungana ku mulembe kukita busoga Busi bwa Kumunwa aba kukita bubi? Konia muntu aba kumwita?” Tondo beikede kibibi. 5 Nu abalolile na bongoa; nu abede na kabebe ku kabamba ka mitima zabo mibibu, atendile wozo muntu bunee: “Lambya kuboko kwobe.” Akulambizie nu kuboko kwage konine nunsania. 6 Kazanga kongo baFarisayo batukile nu bakalile lwango na ba Herode buni bubaneita Yesu. Musanganano Munene Wavwilide Yesu
7 Yesu endile na beigisibwa bage ku kitatenge nu musanganano munene wamuyangile kutuka ku Galilaya nu ku Yudea, 8 nu ku Yerusalema nu ku Idumea, nu ku bwigi na Tiro nu Sidoni. Musanganano munene, gabongule ku binsania byakitaga, bavule kweli. 9 Ku kabamba ka musanganano munene atendile ku beigisibwa bage buno, bamulongekele bwato bukeke buno musanganano unavwa kumukunda. 10 Kubuno anga bwonezie bantu beingi, babo bansania babezaga na nsambo bakundile kweli buno beitubye kweli. 11 Basumbu ba nsese, gabamumonineko, bagwede lwabusio lwage nu balalukile n'iyuki inene bunee: “Uwe uli Mwana wa Kalaga!” 12 Tondo abakakizizie nunse buno tabamumenyesie ku bantu.
Yesu Akusombola Beigisibwa Ikumi nu Babili
13 Nu abakamine ku mwiduko, amanine babo batundaga, nu bavule mu ntungo nage. 14 Asombwede ikumi nu babili buno babe nage nu abasinge buno basambale, 15 nu babe na bwangato bwa kutikya basumbu. 16 Babo ikumi nu babili basombwede: Simoni, amukasile izina buno, Petro, 17 nu Yakobo, mwana wa Zebedayo, nu Yoana, mubuto wa Yakobo, nu abakasile izina lya Boanerge, bwisulilwa bwalyo buli bana ba mukulumino. 18 Andrea, Filipo, Bartolomayo, Matayo, Toma, Yakobo, mwana wa Alfayo, Tadeo; Simoni wa Kanana, 19 nu Yuda Iskariota, wozo wagabwide Yesu.
Kikanga kya Yesu Kikutunda Kwenda Nage
20 Beingide mu numba nu musanganano wakundamenne lingo nu We nu beigisibwa tabamenyine buni bubanalia. 21 Gongule kikanga kya Yesu ku bubo, bendile kumutola kubuno batendile bunee: “Eseli musile.”
Yesu nu Belzebuli
22 Nu basanzi ba mulembe batukile ku Yerusalema, batendile bunee: “Eli na Belzebuli, Mukota wa basumbu, nu mu magala mage akutikya basumbu!” 23 Yesu abamanine, nu abatendile mu misumo bunee: “Buni bunavwama Satana kutikya ungo Satana? 24 Ndi bukota bwidekanukya bwobwenyene, kasi nti bubo bukota bwakua. 25 Nu ndi numba zalekanukibwa kuzo zozenyene, nti numba zezo zakua. 26 Umpanga ndi Satana eisakya wenyene, nu kwibegania ntanavwama kwemana lingo, kasi nti asila.
27 Takuli muntu unavwama kwingila mu numba za uli na magala nu kunyaga bikulo byage geteli lwabusio kukanda muntu wozo uli na magala, nu nti anyaga binsania bya mu numba zage.
28 Lebelebe nkumubula buno, bana ba bantu basigililwe bwagi bwabo bunsania nu bilingano bibakulingana. 29 Tondo wozo muntu walinga Muuza Wasililila ntakasigililwa nunse, kubuno eli na katati ka bwagi butanakuzinda.” 30 Yesu atendile bubo kubuno batendile bunee: “Eli na musumbu wa nsese.”
Nina wa Yesu nu Bato Bage
31 Nina nu bato bage bavule nu bemenne kumbuga, basingile muntu kumumana. 32 Musanganano munene wabezaga gansi wamutimbile, nu bamubwide bunee: “Lola, nyoko nu bato bobe beli kumbuga nu bakukubuzia.” 33 Nu abuzizie bunee: “Nazi mmane nu banazi bato bane?” 34 Nu alolile babo babezaga gansi bamutimba ababwide bunee: “Lolazi mmane nu bato bane. 35 Kubuno unsania ukukita kusombola kwa Kalaga, wozo nti eli muto wane, mubitu wane, nu mmane.”