Yesu nu Busi bwa Kumunwa
6
1 Mu Busi bumozi bwa Kumunwa, Yesu abezaga akutinga mu isoa lya ngano. Beigisibwa bage balingile kukala mikanda za ngano. Baziungwide na maboko mabo nu kulia tuguma. 2 BaFarisayo bamozi bababwide bunee: “Kubuni mukukita bubo bwakagilwe ku mulembe weitu mu Busi bwa Kumunwa, u Sabato?” 3 Yesu abakwide bunee: “Ndi tamwasomine bwakitile Davidi gaabezaga akungwa nzala, we nu bango babezaga gamozi nage. 4 Eingide mu numba za Kalaga, atolile tumpampa twakasenwe ku Kalaga, alide kuto nu akasile ku banyage babezaga nabo, aba mulembe weitu ukubula buno, basankoga umpanga u batunganana kutulia?” 5 Nu Yesu ababwide bunee: “Mwana wa Muntu u mukota lingo wa Busi bwa Kumunwa.” Yesu Akonia Muntu wa Kuboko kuoma r (Mt. 12:9-14; Mk. 3:1-6)
6 Bungo Busi bwa Kumunwa, u Sabato, Yesu eingide mu numba za misanganano nu kwigisia, nu mumo mwabezaga muntu umozi woma kuboko kwage kwa seidume. 7 Basozi ba milembe nu baFarisayo bapunganaga na Yesu balole buno, ndi anonia muntu mu Busi bwa Kumunwa, kubuno batundaga bamone kabamba ka kumusongela. 8 Tondo Yesu amenyine makengelo mabo, nu abwide wozo muntu wabezaga woma kuboko bunee: “Emanuka, nu wemane gago munkatini mwabo. Nu emanukile nu emanine kima.” 9 Nu Yesu ababwide bunee: “Nkumubuzia buno ndi kwakasanwa bwangato ku mulembe mu Busi bwa Kumunwa kukita busoga aba kukita bubi? Konia muntu aba kumwita?” 10 Nu alolile bansania kisozi, nu abwide wozo muntu bunee: “Lambya kuboko kwobe.” Akulambizie nu kuboko kwage konezibwe, kwabede anga kungo kuboko. 11 Nu bo beiyede na bongoa nunse; nu batendenne bwabobwabo buno bamenyinine buni bubanakita ku Yesu.
Yesu Akusombola Beigisibwa Ikumi nu Babili
12 Mu bindi bibyo, Yesu endile kusega gantata ga mwiduko nu akesizie ntende kindi kinsania akusega Kalaga. 13 Gakede busi, amanine beigisibwa bage kweli nu munkatini mwabo asombwede ikumi nu babili; abakasile izina lya basingwa: 14 Simoni, winikile Petro; Andrea, muto wage, nu Yakobo; Yoana; Filipo; Bartolomayo; 15 Matayo; Toma, Yakobo, mwana wa Alfayo; Simoni, wamanagwa Zelote; 16 Yuda, mwana wa Yakobo; nu Yuda Iskariota, wozo wagabwide Yesu.
Yesu Akwigisia Musanganano nu Konia Basambi
17 Yesu agelile gamozi nabo, nu emanine ga kiziki kyabota gabezaga kibombo kinene kya beigisibwa bage; nu bantu beingi nunse ba ku Yudea unsania, ba ku Yerusalema, nu ba ku ntungo za kitatenge, ku Tiro; nu ku Sidoni, bavule kumungwilila, nu konibwa nsambo zabo. 18 Babo babezaga bakuzangibwazangibwa na nsambo za basumbu bonezibwe. 19 Nu bantu bansania balondile kwitubya kweli, kubuno magala matukaga kweli nu monezie bansania.
Mbogimbogi nu Kabebe
20 Nu Yesu alolile beigisibwa bage, nu atendile bunee:
“Mbogimbogi kumuli inyuwe bazambi, kubuno Bukota bwa
Kalaga buli bweinyu!
21 Mbogimbogi kumuli inyuwe beli na nzala kano kaluma,
kubuno mwikute!
Mbogimbogi kumuli inyuwe bakulila kano kaluma,
kubuno mwaseke!
22 Mbogimbogi kumuli, inyuwe gamwasombwe na bantu, gamwimbibwe, gamwalingwe, nu gabigibwe meina meinyu ku kabamba ka Mwana wa Muntu! 23 Bogazibogazi busi bubo, nu mutumetume na mbogimbogi, kubuno lukalilo lweinyu lukaba lunene mwigulu. Kubuno bubo lingo u bwasungizie beisibo balengania.
24 Tondo, kabebe kumuli inyuwe bagumi, kubuno
mwasila kumona mutali weinyu!
25 Kabebe kumuli inyuwe beikuta kano kaluma,
kubuno mwakue na nzala!
Kabebe kumuli inyuwe bakuseka kano kaluma,
kubuno mwalile nu kutogia bisozi!
26 Kabebe kumuli, inyuwe, nkungu zimwaganunwe na bantu
bansania, kubuno bubo u bwakitile beisibo ku balengania ba buza!”
Lutundo ku Basombi Bobe
27 “Tondo nkumubula inyuwe bakunnungwilila buno, tundazi beiti beinyu, kitazi busoga ku basombi beinyu, 28 kasazi mponga ku babo bakumuswilila, segelazi babo bakumukitila bubi. 29 Ndi muntu akulibula lugizi ku itama limozi, mugalukizye lingo itama. Nu ndi muntu akutikya ikoti lyobe, ntumunanie atole nu nsulu zobe za munda. 30 Kasana ku muntu unsania ukukusega, nu ntubuzie bikulo byobe ku wozo wakunyagabyo. 31 Nu anga bubo bumukutunda bantu kumukitila, u bubo nu inyuwe bumubakitila.
32 Ndi mwatunda babo bakumutunda, mponga nkizi zimuli nazo? Kubuno bagi nu bo bakutundaga babo bakubatunda. 33 Ndi mwakita busoga ku babo bakumukita busoga, mutali mukizi lingo u munatunda mwamona? Kubuno bagi bakukita nu bo bubo. 34 Nu, ndi mwambya bango bantu bamukukengela buno banamusubizia, mutali mukizi lingo u munatunda kumona? Bagi nu bo bakwambagia bango bagi buno basubizibwe. 35 Tondo tundazi beiti beinyu, bakitilazi busoga, nu kubambya geteli kulemanina kumona kampa. Nu nti mutali weinyu wabe munene, nu nti mwabe bana ba Wozo Wasakama Nunse, kubuno eli na kyombo nunse ku bantu batakuganuna busoga nu ku babo beli babi. 36 Mube beiya kyombo, anga buli Soinyuwe na kyombo.
Tamusungie Bango
37 Tamusungie, nu inyuwe tamukasungibwa; tamukande, nu inyuwe nti tamwakandwe. Sigililanazi, nu inyuwe nti mwasigililwe. 38 Kasanazi, nu inyuwe mwakaswe; kilindiko kisoga, kyatutubizibwe nu kyatengezibwetengezibwe, nu kiyede nunse, kyakubulwe ku bukuba bwa nsulu zeinyu, kubuno kilindiko kikyo kimukulindika nakyo u kimukalindikwa nakyo.”
39 Yesu abeisile lingo wono musumo: “Ndi kyuku kinavwama kusondelezia kingo kyuku? Ndi bobabili nti tabanakoloka mu muzinga? 40 Mwigisibwa ntatinga musozi wage; tondo mwigisibwa unsania wazindilizia busoga, nti akaba anga musozi wage.
41 Kubuni kuukulola kikolokolo kili mu liso lya mubuto wobe, nu ntukumona ku lwasa luli mu liso lyobe? 42 Aba buni buunavwama kutenda ku mubuto wobe bunee: ‘Mubuto wane, nsige nitikye kikolokolo kili mu liso lyobe,’ nu uwenyene ndi ntukumona ku lwasa luli mu liso lyobe? Uwe mwengelezi! Tikya tanga lwasa luli mu liso lyobe uwenyene nu nti wamone buni bugunatikya kikolokolo kili mu liso lya mubuto wobe.
Muti nu Biguma Byago
43 Kubuno takuli muti musoga ukukolama biguma bibi; aba muti mubi kukolama biguma bisoga. 44 Kubuno muti unsania ukumenywa ku biguma byago. Bantu tabanakola biguma bya mutini ku muti wa mikele, aba tabanakola biguma bya mizabibu ku muti wa mikele. 45 Muntu musoga akutikya bisoga ku busoga buli mu mutima wage, nu muntu mubi akutikya bibi ku bubi buli mu mutima wage; kubuno bibyo bizile mu mutima wa muntu u bikutenda kanua kage.
Bobaki Babili
46 Kubuni mukummana bunee: ‘Mukota, Mukota,’ nu tamukukita bubo bunkumutenda? 47 Muntu unsania ukuvwa kundi nu kungwa ku malagi mane, nu kumakita, namulolesie nazi walingimana nage. 48 Asusanania na muntu umozi wobakile numba zage, ombile gansi nunse nu abikile kibanza gantata ga lwanda, nu mwiyalo wavule, nu widibwide ku zezo numba, tondo tawavwamine kuzigusia, kubuno zabezaga zobakwa busoga. 49 Tondo wozo ukungwa ku bitondo byane nu ntakukita nabyo asusanania na muntu umozi wobakile numba zage gantata ga bilongo geteli kalingilo. Nu mwiyalo wazigubile na magala: nu kazanga kongo zagwede nu kwenduka kwa zezo numba kwabede kunene.”