Yesu Onezie Kitunga
2
1 Kusila kwa bindi bimozi, Yesu asubizie ku Kapernaumu, nu bantu bongule buno abezaga mu numba. 2 Nu bantu beingi nunse bakundamenne, nu ku lwibi takwakukagwa lingo. Abasambalide idagi. 3 Bantu bamuvwilide na muntu wabezaga na lusambo lwa kukoloka biganza, ekwa na bantu banazi. 4 Nu tabavwamaga kwika kweli, kubuno kwabezaga musanganano. Babuswide gantata numba gago gabezaga Yesu; nu bagezizie mugu wa wono wakoloka biganza. 5 Gamonine Yesu ku bukatizio bwabo, atendile ku wakoloka biganza bunee: “Mwana wane, bwagi bwobe bwasigililwa;” 6 Tondo basozi ba milembe babezaga kuko gansi, nu bakengelaga mu mitima zabo bunee: 7 “Kubuni muntu wono akutenda bubo? Akulinga Kalaga? Nazi unavwama kusigilila bwagi? Kalaga wenyene!” 8 Kazanga kongo, Yesu amenyine ku mutima wage bubakukengela nu abatendile bunee: “Kubuni mukukengela bubuno mu mitima zeinyu? 9 Buni bwatinga busoga kutenda ku wozo wakoloka biganza: ‘Bwagi bwobe bwasigililwa,’ aba kutenda bunee: ‘Zanzuka, tola mugu wobe nu wende ku numba zobe!’ 10 Tondo mumenye buno Mwana wa Muntu eli na bwangato mu kisi bwa kusigilila bwagi.”
Yesu atendile ku wozo wakoloka biganza: 11 “Nkukubula bunee: ‘Emanuka tola mugu wobe, nu wende ku numba zobe!’”
12 Kazanga kongo, azanzukile, atolile mugu wage, nu abasile gasamba bantu bansania, nu bansania bangamine, nu baganwine Kalaga, batendile bunee: “Iswe tatumonaga lingo ku bubuno!”
Yesu Amanine Lawi
13 Yesu atukile lingo nu endile bwigi na kitatenge.
Musanganano unsania wamwendede nu abeigisizie. 14 Nu gaatingile, amonine ku Lawi, mwana wa Alfayo, abezaga ku mulimo wa kuligia kodi. Nu amubwide bunee: “Nyange!” Nu Lawi azanzukile nu amuyangile.
15 Nu gaabezaga es'alia idia ku numba za Lawi, basanzi nu bagi beingi beikede na Yesu nu beigisibwa bage, kubuno babezaga beingi kuko nu bamuganzile. 16 Gamonine basozi ba mulembe nu baFarisayo buno akulia gamozi na basanzi nu bagi, babuzizie bunee: “Kubuni kwakulia nu kunua na baFarisayo?” 17 Nu gongule Yesu ku bubo, abatendile bunee: “Batakusamba tabaneiyanina musakizi, tondo basambi. Nsyavule kumana beisanana, tondo bagi.”
Lubuzio lwa Kugila Idia
18 Busi bumozi beigisibwa ba Yoana nu baFarisayo babezaga bakukanda idia. Bavule nu batendile Yesu bunee: “Kubuni beigisibwa ba Yoana nu babo ba baFarisayo bakukanda kulia tondo beigisibwa bobe tabakukanda?” 19 Yesu ababwide bunee: “Bilemba bya musongi ndi banavwama kukanda kulia ndi beikili na musongi? Nkungu zibeli na musongi, tabanavwama kukanda kulia. 20 Tondo bindi bikavwa gakatukibwa musongi kubeli, mu bindi bibyo bakakanda kulia.
21 Takuli muntu wampa unalanda kibe kya nsulu nto ku nsulu nkulu, kubuno kibe kya nsulu nto nti kyata nsulu nkulu. Nu itengu nti lyaba inene nunse. 22 Nu takuli muntu wampa unabika maku m'ituba mu tutembe tukulu; ndi akita bubo, nti maku m'ituba manabugia tuto tutembe, nu maku nu tutembe nti byazimina; tondo, kilo! Bwatunganana kubika maku m'ituba mu tungo tutembe tuto!”
Yesu Eli Mukota wa Busi bwa Kumunwa
23 Busi bumozi bwa Sabato, Yesu atingaga mu masoa ma ngano. Beigisibwa bage bakalile mintenga za ngano mu nzila. 24 BaFarisayo bamutendile bunee: “Lolazi, kubuni beigisibwa bobe bakukita butakutunganana ku Busi bwa Kumunwa, u Sabato?” 25 Yesu ababwide bunee: “Ndi tamusomaga bubo bwakitile Davidi gaabezaga akukua na nzala, we gamozi na banyage baabezaga nabo? 26 Bwingide mu numba za Kalaga, mu nkungu zabezaga Abiatari, sankoga munene nu alide tumpampa twakitagwa tulolesio, zitakulungana kulibwa na ungo, gantata na basankoga tugu, nu akasile banyage babezaga nage.” 27 Nu abatendile bunee: “Busi bwa Kumunwa bwakitilwe ku bantu; tondo bantu tabakitilwe ku kabamba ka Busi bwa Kumunwa, u Sabato. 28 Ku bubo, Mwana wa Muntu eli Mukota wa Busi bwa Kumunwa.”