Yesu Asubizie ku Mwino wa Kapernaumu
9
1 Nu Yesu eingide mu bwato, asokile lisilya lya kitatenge, abasile mu mwino wage. 2 Nu bavule na muntu wabezaga na lusambo lwa kuuma biganza, eiyombeka ga mugu: nu Yesu amenyine bukatizio bwabo, amubwide bunee: “Mwana wane, ba na kilemanizio; misako za bwagi bwobe zasigililwa.” 3 Nu bango basanzi ba mulembe bakengede bunee: “Muntu wono akulinga Kalaga.” 4 Yesu amenyine makengelo mabo atendile bunee: “Kubuni mukukengela makengelo mabi mu mitima zeinyu? 5 Buni buli busoga, kutenda bunee: ‘Misako za bwagi bwobe zasigililwa;’ aba kutenda bunee: ‘Emanuka, wende?’ 6 Tondo mumenye buno, Mwana wa Muntu eli na bwangato geikili ga kisi kusigilila misako za bwagi, (abwide wozo wabezaga na lusambo lwa kuuma biganza,) ‘Emanuka, nu weeke mugu wobe, nu wende kwobe ku numba.’” 7 Nu emanukile, nu endile kwage ku numba. 8 Tondo gamonine bantu ku bubo, bankamine boba, nu baganwine Kalaga wakasile bantu bwangato bubo.
Yesu Akumana Matayo
9 Nu gatukile Yesu gago, amonine ku muntu, wamanagwa Matayo, abezaga eikala ku mulimo wa kuligia kodi nu amubwide bunee: “Nyange.” Nu we emanukile, nu amuyangile.
Yesu Akubezia baFarisayo
10 Nu gaabezaga es'eikala mu numba kulia idia, baligia ba kodi beingi nu bagi bavule beikede na Yesu nu beigisibwa bage. 11 Nu gamonine baFarisayo ku bubo, babuzizie beigisibwa bage bunee: “Kubuni Musozi weinyu akulia na baligia ba kodi nu bagi?” 12 Tondo gongule Yesu ku bubo, ababwide bunee: “Beli babibu tabaneiyanina musakizi, tondo basambi. 13 Endazi mwiyigisie bwisulilwa bwa bubo, ‘Nkutunda kyombo, nsikutunda kayulo ka nyama.’ Kubuno nsyavule kumana beli beisanana, tondo beiya bwagi.”
14 Mu nkungu zezo beigisibwa ba Yoana bavule kweli, bamubuzizie bunee: “Iswe nu baFarisayo tukukandaga kulia mambizi meingi, tondo kubuni beigisibwa bobe tabakukandaga kulia?” 15 Yesu abakwide bunee: “Bilemba bya musongi ndi banavwama kulila, mu nkungu zibeli na musongi? Tondo bindi bikatukibwa musongi, u bakakanda kulia.”
Musumo wa Mukungio nu Tutembe
16 “Takuli muntu unalanda kibe kya nsulu nto ku nsulu za mukungio; kubuno zezo nto nti zata zezo nsulu za mukungio; nu itengu nti lyaba inene nunse. 17 Aba bantu tabakongolaga maku m'ituba mu tutembe tukulu; ndi bamongola mu tutembe tukulu nti twabuga; nu maku m'ituba nti makubuka, nu tutembe twabiga; tondo bantu bakongolaga maku m'ituba mu tutembe tuto, nubyo bibili bikale busoga.”
Mukikulu Wabezaga na Lusambo, nu Mwana wa Mukota
18 Gabezaga Yesu akubatenda bitondo bibino, Mukota umozi avule kweli, nu amukumbaminne, nu amubwide bunee: “Mwana wane wa mukazi es'alekana kalazi: tondo vwa, ubike kuboko kwobe gantata gage, nu alame.” 19 Nu Yesu emanukile, nu amuyangile, We gamozi na beigisibwa bage.
20 Nu mukikulu, wabezaga na lusambo lwa kubasa mikila myaka ikumi nu ibili, avule kumbusa kwage nu eitubizie ku mupimbo wa nsulu zage. 21 Wozo mukikulu akengede bunee: “Ndi nitubya ku nsulu zage, nti nonibwe.” 22 Tondo Yesu atimbukile, nu amumonineko, nu amubwide bunee: “Mwana wane, lindia mutima wobe, bukatizio bwobe bwakwonia.” Nu wozo mukikulu onezibwe mu zezo nkungu.
23 Geingide Yesu mu numba za wozo mukota, amonine ku beidi ba tupyelele, nu ku musanganano munene wakitaga kazege, 24 nu We atendile bunee: “Tukazi: mwana ntakua, tondo eiyombeka tugu.” Bamusekile. 25 Nu gaasilile kutukibwa musanganano, eingide mu numba, nu akatile mwana ga kuboko kwage, nu mwana emanukile. 26 Nu musagu wozo wakukile mu kikyo kilongo kinsania.
Yesu Onezie Byuku Bibili
27 Nu gabezaga Yesu es'atinga kuko, byuku bibili bya muyangile, byalalukile n'iyuki inene, byatendile bunee: “Mwana wa Davidi, tukue kyombo!” 28 Nu geingide mu numba, bibyo byuku byamuyangile: nu Yesu ababuzizie bunee: “Ndi mukukatizia buno ninavwama kukita bubo?” Bamwakwide bunee: “Ee, Mukota.” 29 Nu eitubizie ku meiso mabo, atendile bunee: “Ku bukatizio bweinyu ukinsa bubo bwaba.” 30 Nu meiso mabo mamonine. Yesu abalagile bunee: “Tamusambale bubuno ku ungo muntu.” 31 Tondo gabatukile gago basambede musagu wage mu kikyo kilongo kinsania.
Yesu Onezie Kaluma
32 Nu gabatukile, bavwilide Yesu na kaluma kabezaga na musumbu. 33 Nu gaasilile kutikya musumbu, kaluma katendile: nu musanganano wangamine, batendile bunee: “Tatumonaga ku bubuno lingo mu kisi kya baIsraeli.” 34 Tondo baFarisayo batendile bunee: “Wono akutikya basumbu ku magala ma mukota wa basumbu.”
Yesu Eli na Mponga ku Bantu Baziminne
35 Nu Yesu atabangile kunsania mu miino minene nu mikeke, nu eigisagia mu numba ningi zabo za misanganano, nu abasambalide musagu musoga wa Bukota, nu onezie nsambo insania za nkita na nkita, nu bagongole ba nkita na nkita. 36 Tondo gaamonine ku musanganano munene agukwilide kyombo, kubuno wabezaga na kabebe nu wabalangenne, anga mikoko ziteli na mulangi. 37 Nu abwide beigisibwa bage bunee: “Lebelebe matubulo meli meingi, tondo bakambi tabeli beingi. 38 Segazi ku Mukota wa matubulo, buno asinge bakambi mu matubulo mage.”