Yesu Akumana Beigisibwa Bage Batangi
5
1 Nu gabede musanganano wamukunda nunse buno bongwilile idagi lya Kalaga, nu Yesu abezaga emana bwigi na kiziba kya Genezareti, 2 nu amonine ku maato mabili meli ku mutili wa kiziba, nu bazubi bakimine kutuka mumo buno basuge tukila twabo. 3 Yesu eingide mu bwato bumozi kumo, bubo bwabezaga bwa Simoni, nu amusegile buno abusigelezie kakeke bulazi na ku mutili. Kusila, eikede mu bwato nu mumo eigisizie musanganano. 4 Nu gaasilile kwigisia, abwide Simoni bunee: “Sigelezia bwato ku iziba nu mwise tukila tweinyu buno muzube byena.” 5 Nu Simoni amwakwide bunee: “Mukota twakitile mulimo munene mu kindi kinsania, tondo tatwitile kena; tondo ku iyuki lyobe, nkwisa tukila kuzuba lingo.”
6 Nu gabatulekede, beitile byena byingi nunse. Nu tukila twabo twatikile; 7 bamanine banyabo na maboko, babo babezaga mu bungo bwato, buno bavwe kubakasia. Nu bo bavule nu beizazizie mamo maato mabili. Numo mabezaga bwigi na kwinama. 8 Nu gamonine Simoni Petro ku bubo, akomine mazu lwabusio lwa Yesu, nu atendile bunee: “Mukota, Tuka kuno kubuno nne nili mwagi.” 9 Kubuno abede na boba, we nu babo babezaga gamozi nage, ku kitondo kya byena byingi bibeitile; 10 bubo lingo u bwabede Yakobo, nu Yoana, bana ba Zebedayo, banyage na Simoni. Nu Yesu atendile ku Simoni bunee: “Ntukue boba; kutukila kano kaluma, wabe muzubi wa bantu.” 11 Nu gababulutile maato ku muse, basigile binsania nu bamuyangile.
Yesu Akonia Mwiya Bibali
12 Gabezaga Yesu mu mwino umozi, muntu umozi wabezaga wiyala na bibali, gaamumonineko, agwede bukukama lwabusio lwage, nu amusegile nunse bunee: “Mukota ndi watunda, unavwama kunengia.” 13 Nu Yesu alambizie kuboko kwage, eitubizie kweli, nu amubwide bunee: “Nabutunda, wenge.” Nu kazanga kongo bibali byage byamutukile. 14 Nu amukakizizie bunee: “Ntusambalile muntu wampa bubo. Tondo enda widolesie ku Sankoga, nu ukasane kisansa ku kwengibwa kobe, anga bwakakizizie Musa buno, bubo bube bulongeki kubeli.” 15 Tondo lukumu lwage lwitide kukuka kunsania. Nu bantu beingi bakundamenne kumungwilila nu konibwa nsambo zabo. 16 Tondo Yesu eitikizye mubo, nu endile kusega ku biziki kuteli bantu.
Yesu Akonia Muntu Wabezaga Wakaka Biganza
17 Busi bumozi Yesu abezaga akwigisia. baFarisayo nu Basozi ba mulembe babezaga beikala bwigi nage; batukaga ku miino insania za ku Galilaya, za ku Yudea, nu za ku Yerusalema; nu magala ma Mukota mabezaga gamozi nage ku konia basambi. 18 Nu lola, bantu bavule beeka muntu umozi ga mugu, wabezaga na lusambo lwa kukaka biganza nu balondile nzila za bubanamwingizia mu numba nu kumubika lwabusio lwa Yesu. 19 Nu gabatavwamine kumenya nzila za kumwingiziamo, ku kitondo kya bantu beingi, babakamine nage gantata ga numba, babuswide itengu nu bamugezizie ga mugu wage munkatini mwa bantu lwabusio lwa Yesu. 20 Nu gamonine Yesu ku bukatizio bwabo, abwide wozo muntu bunee: “Ee, wamulume, bwagi bwobe bwasigililwa.” 21 Nu babo basanzi ba milembe nu baFarisayo balingile kukengela bunee: “Nazi wono ukulinga Kalaga? Nazi unavwama kusigilila bwagi uteli Kalaga wenyene?” 22 Tondo Yesu amenyine makengelo mabo nu abakwide bunee: “Makengelo makizi mamuli namo mu mitima zeinyu? 23 Buni buli busosu; kutenda bunee: ‘Bwagi bwobe bwasigililwa,’ aba kutenda bunee: ‘Emanuka nu wende?’ 24 Tondo buno inyuwe mumenye buno, Mwana wa Muntu eli na bwangato mu kisi bwa kusigilila bwagi,” akakizizie wozo musambi wakaka biganza nu amutendile bunee: “Emanuka, weeke mugu wobe, nu wende ku numba zobe.” 25 Nu kazanga kongo emanukile lwabusio lwabo, atolile mugu wage wiyombekaga gago, nu endile kwage ku numba, akuganuna Kalaga. 26 Bansania bangamine nunse, nu kuganuna Kalaga, babede na boba, nu batendile bunee: “Twamona lelo ku butemonekaga kubo lingo.”
Yesu Akumana Lawi (Matayo)
27 Kusila kwa bubo, Yesu atukile nu amonine ku musanzi ka kuligia kodi, wamanagwa Lawi, abezaga eikala mu numba za kuligia kodi. Yesu amubwide bunee: “Unyange!” 28 Lawi asigile binsania, emanukile nu amuyangile.
29 Lawi amukitide kisagulo kinene mwage mu numba, nu basanzi beingi bakuligia kodi nu bango bantu babezaga gamozi nabo balide nabo gamozi. 30 Tondo baFarisayo nu basanzi ba milembe babezaga na manungunungu nu batendile na beigisibwa bage bunee: “Kubuni mukulia nu mukunua gamozi na basanzi nu bagi?” 31 Yesu abakwide bunee: “Beteli basambi tabakwiyanina musakizi, umpanga babo beli basambi. 32 Nsyavule kumana beisanana, tondo beiya bwagi buno beiyanie.”
Lubuzio ku Kitondo kya Kugila Kulia
33 Nu bo bamubwide bunee: “Kubuni beigisibwa ba Yoana bakukanda kulia mambizi meingi, nu kusega, anga bukukitaga beigisibwa ba baFarisayo, tondo beigisibwa bobe bakulia nu bakunua?” 34 Nu Yesu abakwide bunee: “Ndi munavwama kugizia bilemba bya musongi kulia nkungu zibeli gamozi na musongi? 35 Tondo bindi byavwe, gatikibwe Musongi kubeli, nu nti bakande kulia mu bindi bibyo.” 36 Abeisile lingo ungo musumo bunee: “Takuli muntu wampa unata kibe kya nsulu nto, buno akilande ku nsulu nkulu, nu ndi akita bubo, nti abigia zezo nsulu nto, nu kikyo kilaka kya nsulu nto takinakulungana na zezo nsulu nkulu. 37 Nu takuli muntu wampa unabika maku m'ituba mu tutembe tukulu; ndi akita bubuno, mamo maku m'ituba nti manabugia tuto tutembe tukulu nu maku nti meta, nu tutembe tukulu nti twatika. 38 Tondo bwatunganana kubika maku m'ituba mu tutembe tuto. 39 Aba takuli muntu wampa ndi asila kunua masongo nu kutunda lingo kunua maku m'ituba, kubuno anatenda bunee: ‘Mamo ma masongo meli masoga.’”