Yesu Eli Mukota wa Busi bwa Kumunwa
12
1 Nu nkungu zezo Yesu atingile busi bwa Sabato mu masoa ma ngano, nu beigisibwa bakule na nzala balingile kukala ngano nu kuzilia. 2 Tondo baFarisayo, gababamonineko, bamutendile bunee: “Lola, beigisibwa bobe bakukita buteli busoga ku mulembe ku Busi bwa Kumunwa, u Sabato.” 3 Tondo Yesu abatendile bunee: “Ndi tamwasomine bwakitile Davidi, gaakuaga na nzala, we nu babezaga gamozi nage. 4 Anga bwingide mu numba za Kalaga, alide kampampa kabikagwa ku kayulo katakulungana kulia ku mulembe, aba bango babezaga nage, tugu basankoga bobenyene? 5 Ndi tamwasomine mu Mulembe buno ku busi bwa Sabato basankoga mu numba nnene za kukumbamina bakukagula busi bwa Sabato nu tabeli na katati. a 6 Tondo nkumubula bunee: ‘Umozi munene watinga numba nnene za kukumbamina, eli gano.’ 7 Songo mwizi bwisulilwa bwa malagi mamano, ‘Nkutunda kyombo, nsikutunda kisansa,’ songo tamunasungizie beteli na katati. 8 Kubuno Mwana wa Muntu eli Mukota wa Sabato.” Muntu Wabezaga na Kuboko kuoma
9 Yesu atukile gago, nu eingide mu numba za misanganano wabo: 10 nu mwabezaga muntu woma kuboko. Nu babuzizie Yesu bunee: “Ndi bwakulungana ku mulembe konia muntu ku Busi bwa Kumunwa?” Buno bamugabule. 11 Nu ababuzizie bunee: “Nazi muntu kumuli uli na mukoko umozi, ndi wakoloka busi bwa Sabato mu muzinga, ndi ntanavwama kugukata nu kugutikya? 12 Bukunza bwa muntu bwatinga nunse bukunza bwa mukoko! Bwakulungana ku mulembe kukita busoga Busi bwa Kumunwa, u Sabato.” 13 Nu Yesu amubwide bunee: “Lambya kuboko kwobe,” nu akulambizie, nu kwabede kugimagima anga kuko kungo kuboko. 14 Tondo baFarisayo batukile, nu bamukalide lwango buno bamwite.
Yesu Atendile Bantu Bitondo bya Wakalazi
15 Nu gamenyine Yesu bubo, atukile kuko, nu beingi bamuyangile, nu abonezie bansania, 16 nu abakakizizie buno, tabasambale musagu wage: 17 buno isanzo lizindilile lyatendagwa na mulengania Isaya bunee:
18 “Ungwililazi mukiti wane u nasombwede;
Mutundwa wane u natananinwa nage nnenyene:
Nabike Muuza wane gantata gage;
Nu we akasambalila baBilongo lusungio.
19 Ntakalwana, aba ntakalaluka;
Aba muntu ntakongwa ku iyuki lyage mu nzila.
20 Lusolu lwabelilwe ntakalwata,
Aba nsulu zikususa muuki ntakazizimia,
Aaba nu gaakalusia lusungio lwage nu lukakinda.
21 Nu baBilongo bakalemanina izina lyage.” b
Yesu Atikizye Musumbu mu Muntu
22 Bavwilide Yesu na muntu wabezaga na musumbu, abezaga kyuku nu kaluma. Yesu amonezie, bubo alingile kutenda nu kumona. 23 Nu musanganano unsania wangamine, beibuzizie bunee: “Ndi wono ta Mwana wa Davidi?” 24 Tondo gongule baFarisayo ku iyuki lilino, batendile bunee: “Muntu wono akutikya basumbu tugu ku magala ma Belzebuli, mukota wa basumbu.” 25 Tondo Yesu amenyine bubakengelaga, abakwide bunee: “Bukota bunsania bukwidekanukia bukakua, nu mwino unsania nu numba insania zikwidekanukia, bukota bwazo bunemana buni? 26 Nu ndi Satana akutikya Satana nti akwidekanukya, bukota bwage bunemana buni? 27 Nu ndi nkutikya basumbu mu magala ma Belzebuli, nti bana beinyu bakubatikya ku magala ma nazi? Kubuno u babo bakaba ngatu zeinyu. 28 Tondo ndi Nne nkutikya basumbu mu Muuza wa Kalaga, kasi Bukota bwa Kalaga buse kumuli.
29 Nazi muntu unavwama kwingila mu numba za wozo uli na magala, nu kunyaga bikulo byage, ndi ntalinga kukanda wozo uli na magala? Nu kusila nti anyage binsania bili mu numba zage.
30 Ndi muntu nteli gamozi na Nne nti akuntuna, nu wozo utakukundamania na nne gamozi nti akubalangania. 31 Kubuno nkumubula buno misako insania za bwagi nu bilingano binsania bikasigililwa, tondo babo bakulingaga Muuza Wasililila tabakasigililwa. 32 Muntu unsania ukatendaga bubi ku Mwana wa Muntu, akasigililwa; tondo muntu unsania ukatendaga bubi ku Muuza Wasililila, ntakasigililwa, mu nkiko zeno, aba mu nkiko zikavwa.
Moki Makutuka mu Kanua Meli Kitondo kya Magala
33 Mukubulaga buno muti guli musoga, nu biguma byago bili bisoga, aba mukubula buno muti guli mubi nu biguma byago bili bibi; kubuno muti gukumenywa ku biguma byago. 34 Inyuwe kikanga kya mpoma, mukubezaga babi nunsania, munatenda busoga bukizi? Kubuno bukukengela mutima nti u bukutenda kanua. 35 Muntu musoga akutenda bitondo bisoga ku makengelo mage masoga: nu muntu mubi akutenda bitondo bibi ku makengelo mage mabi. 36 Nu nkumubula bunee: ‘Iyuki n'iyuki likutenda bantu buliabulia bakasungibwa kulyo ku busi bwa lusungio. 37 Kubuno ku moki mobe wisanane nu ku moki mobe wasungibwe.’”
Kalolesio ka Yona
38 Nu bamozi ba basanzi ba mulembe nu baFarisayo bamwakwide bunee: “Musozi, tukutunda watukitila kalolesio.” 39 Tondo abakwide bunee: “Kibuti kibi nu batakatizia kikutunda kalolesio; tamukamona ku kango kalolesio gantata ga kalolesio ka mulengania Yona. 40 Kubuno bubo bwabezaga Yona munda mwa kyena kinene; bindi bisatu musi nu kindi bubo Mwana wa Muntu akeikala bindi bisatu musi nu kindi mu nsinda. 41 Bantu ba Ninawe bakemana mu kindi kya lusungio gamozi na bantu ba kibuti kikino, nu bo bakakisungia: kubuno beiyanizie ku kusambala kwa Yona; nu gano geli watinga Yona. 42 Mu busi bwa lusungio, mukikulu mukota wa ku lulenge lwa kwidume kwa kisi akemana gamozi na bantu ba kibuti kikino, nu we akakisungia; kubuno we atukile ku lulenge lwa kwidume kwa kisi buno amone ku menge ma Solomono; nu gano geli watinga Solomono!”
Kusubya kwa Musumbu
43 “Nkungu zikutuka musumbu mu muntu, ukutingatinga mu biziki biteli na mazi kulonda kiziki kya kumunwa, tondo taukumona kiziki kya kumunwa, 44 ukwibula bunee: ‘Nasubye ku numba zane, zinatukaga muzo.’ Gukusubya, ukusanga numba bwasi, zayagilwa nu kulongekwa busoga. 45 Ukwenda kutola bango basumbu mutubakamo beli babi kumutinga, nu bobansania bende kwikala muzo. Lukita lwa wozo muntu lukuba lubi kutinga lwa kulinga. Ububo bukaba bantu ba kibuti kikino kibi.”
Nina wa Yesu nu Mibuto za Yesu
46 Gabezaga Yesu akutenda na musanganano wa bantu, nina nu mibuto zage bemenne kumbuga, batundaga kutenda nage. 47 Nu muntu umozi amutendile bunee: “Nyoko nu mibuto zobe bemana kumbuga, bakutunda kutenda nobe.” 48 Tondo akwide wozo wamutendaga bunee: “Nazi mmane? nu banazi mibuto zane?” 49 Alambizie kuboko kwage ku beigisibwa bage, atendile bunee: “Lolazi, mmane nu mibuto zane! 50 Kubuno muntu unsania ukukita kusombola kwa Tatane uli mwigulu, we nti u mubuto, nu u mubitu wane, nu u mmane.”