Yesu Akwenda Lingo ku Yudea
19
1 Gasilile Yesu kutenda bubo, atukile ku Galilaya, abasile ku myaga za Yudea lisilya lya Yordani; 2 nu misanganano mingi zamuyangile; nu abonezie. Yesu Akubula Bwakwita Isonga
3 Nu baFarisayo bavule kumulindika, nu bamubuzizie bunee: “Ndi bwakulungana ku mulembe muntu kutikya mukikulu wage ku musako na musako?” 4 Nu We abakwide bunee: “Ndi inyuwe tamwasomine tugu buno, mu kulinga Mubumbi abumbile wamulume nu mukikulu?” 5 Nu ababwide bunee: “Ku kabamba kako, muntu asige isi nu nina nu kulandana na mukazi wage, nu bobabili babe mubili umozi. a 6 Nu tabeli babili lingo, tondo beseli mubili umozi. Kubuno kyakulumanizie Kalaga, muntu ntanakilekanukya.” 7 Bamubuzizie bunee: “Kubuni Musa akakizizie buno nti ‘wamukasa mukanda wa kwita isonga, nu nti wamutikya?’” 8 Nu Yesu ababwide bunee: “Ku kabamba ka bubibu bwa mitima zeinyu, Musa amwitabizizie kutikya bakikulu byeinyu: tondo mu kulinga tabwabezaga bubo.” 9 Ababwide lingo bunee: “Tondo nkumubula buno wozo watikya mukikulu wage kuteli ku butazi nu kusonga ungo, nti eita meiga, nu wasonga lingo wozo watikibwa, nti eita meiga.” 10 Beigisibwa bage bamubwide bunee: “Ndi bitondo bya wamulume nu mukikulu bili bubo, kasi ta busoga kusonga.” 11 Tondo abakwide bunee: “Bantu bansania tabanavwama kukatizia bubuno, tondo babo bakasilwebo. 12 Kubuno kuli babutilwe mintembele, nu kuli bango bakubukitwa na bantu, nu bango batakusonga ku kabamba ka Bukota bwa meigulu. Ukutunda kukita bubo nti abukita.”
Yesu Akubogaboga na Bana Bato
13 Nu abavwilide Yesu na bana bato, buno ababike maboko, nu kubasegela: nu beigisibwa bage babazugide. 14 Tondo Yesu atendile bunee: “Sigazi bana bato bavwe kundi, tamubazugile: kubuno, beli anga babano, Bukota bwa meigulu buli bwabo.” 15 Nu ababikile maboko, nu atukile kuko.
Musikila Mugumi Akulonda Kalamo Katanakuzinda
16 Nu muntu umozi amuvwilide, nu amubuzizie bunee: “Musozi, musako musoga mukizi u nikita buno, nibe na kalamo katanakuzinda?” 17 Nu amutendile bunee: “Buni buukumbuzia buli busoga? Kuli tugu umozi musoga: tondo ndi ukutunda kwingila mu kalamo; anza makakizio.” 18 Abuzizie Yesu bunee: “Ikakizio ikizi?” Yesu amutendile bunee: “Ntwite muntu, ntwite meiga, ntwibe, ntweke munyobe buza; 19 wanze so nu nyoko; nu tunda munyobe anga buwitunda uwenyene.” 20 Wozo musikila amubwide bunee: “Nanzile mamo makakizio mansania kalazi; kikizi lingo kinikita?” 21 Yesu amubwide bunee: “Ndi watunda kusililizia binsania, enda, ukunzie binsania biguli nabyo, ubikase bazambi, bubo ukaba na bikulo mwigulu: nu uvwe, unyange.” 22 Tondo gongule wozo musikila ku bubo, endile na kabebe; kubuno abezaga na bikulo byingi.
23 Yesu abwide beigisibwa bage bunee: “Lebelebe, nkumubula buno, buli bubibu ku mugumi kwingila mu Bukota bwa mwigulu. 24 Nkumubula lingo buno, buli neibineibi ngamia kwingila mu itengu lya nsinge kutinga mugumi kwingila mu Bukota bwa Kalaga.” 25 Nu gongule beigisibwa bage ku bubuno, bangamine nunse, bamubuzizie bunee: “Nazi ukonibwa?” 26 Nu Yesu abalolile, abatendile bunee: “Bubuno tabunakulungana ku bantu: tondo bunakulungana ku Kalaga.”
27 Bubo Petro amubuzizie bunee: “Ungwilila, twasigile byeitu binsania nu twakuyangile, kikizi kitukamona?” 28 Nu Yesu abakwide bunee: “Lebelebe, nkumubula buno, mu nkiko za kugaluka kwa binsania, gakeikala Mwana wa Muntu ga kisumbi kyage kya lutanuno, nu inyuwe lingo baniyangaga mukeikala ga bisumbi ikumi nu bibili, nu mukasungia bikanga ikumi nu bibili bya baIsraeli. 29 Muntu unsania wasigile numba zage, aba mibuto zage, aba babitu bage, aba isi, aba nina, aba bana bage, aba masoa mage, ku kabamba k'izina lyane, akatalikilwa mambizi lukama, nu akapiena kalamo katanakuzinda. 30 Tondo babezaga batangi bakaba bazinda; nu babezaga bazinda bakaba batangi.”