Yesu Akwigisia Beigisibwa Bage Buno Banze
18
1 Mu nkungu zezo beigisibwa bavule ku Yesu, bamubuzizie bunee: “Nazi uli munene mu Bukota bwa Mwigulu?” 2 Yesu amanine mwana muto, nu amubikile munkatini mwabo, 3 nu atendile bunee: “Lebelebe, nkumubula buno, ndi tamwagaluka, nu kuba anga bana bakeke, tamukeingila mu bukota bwa mwigulu. 4 Muntu unsania wibotya anga wono mwana muto, akaba munene mu bukota bwa mwigulu. 5 Unsania wasekela mwana muto anga wono mu izina lyane nti ansekela: 6 Tondo ukakolokagia umozi wa ku babano bana bato bakunkatizia mu bwagi bwatananina akandwe ikozi lya kugoga mu ikosi lyage, nu kwiswa mu iziba lya kitatenge. 7 Kabebe ku kisi ku kabamba ka kukolokya bango mu bwagi! Lebelebe kukolokya bango mu bwagi kwatunganana kuba, tondo kabebe ku wozo muntu ukukolokya bango mu bwagi.
8 Ndi kuboko kwobe aba kugulu kwobe kwakukolokya mu bwagi nti wakusesa, nu nti wakwisa bulazi nobe; kilumba wingila kitunga mu kalamo, kuteli kwingila mu keiya katanakuzinda na maboko mabili nu magulu mabili. 9 Ndi liso lyobe lyakukolokya mu bwagi, nti walitikya, nu nti walyisa bulazi nobe; unulumba wingila mu kalamo na liso limozi, kuteli kwiswa mu kiziba kya keiya na meiso mabili. 10 Tamubenge mwana muto umozi wa ku babano, kubuno nkumubula buno, mwigulu bindi binsania banzelo babo bakulolaga ku meiso ma Tatane uli mwigulu. 11 Kubuno Mwana wa Muntu avule konia kikyo kyaziminne.
12 Mukukengela buni? Ndi muntu eli na lukama lwa mikoko, nu umozi wazimina, ndi ntanasiga zezo makumi mubula nu mubula, nu kwenda mu mwiduko kulonda wozo waziminne? 13 Nu gagumonine, lebelebe nkumubula buno, agubogedebogede, kutinga zezo makumi mubula nu mubula zitaziminne. 14 Ububo Soinyuwe uli mwigulu ntakutunda mwana umozi wa ku babano bana bato kuzimina.
Yesu akubula beigisibwa bage menge ma bantu bakwagila bango
(Lk 17:3)
15 Ndi mubuto wobe akwagila, enda, umulolesie bwagi bwage inyuwe babili: ndi akungwilila, nti wasila kuluta mubuto wobe. 16 Ndi anana nti wenda na muntu umozi aba bantu babili ububo, ‘bulongeki bunaswaga ku balongeki babili aba basatu.’ 17 Nu ndi abanana, nti walondola mulondo wozo ku kanisa; nu ndi anane ku kanisa nti abe kuguli anga wa baBilongo nu anga muligia wa kodi.
18 Lebelebe nkumubula buno, kinsania kimwakandage ku kisi, nti kyakandwe nukyo mwigulu, nu kinsania kimwakandulage ku kisi, nti kyakandulwe nukyo mwigulu.
19 Lebelebe nkumubula buno: ndi babili mumuli gano ga kisi bakala lwango lwa kusega kintu kinsania, Tatane uli mwigulu nti abakasekyo. 20 Ndi babili aba basatu bakundamana ku izina lyane, nti nili munkatini mwabo.”
Yesu Akubula Beigisibwa Bage Bubasigilila
Bango Bantu Bwagi Bwabo
21 Petro avule nu abuzizie Yesu bunee: “Mukota, ndi mubuto wane anagila nti namusigilila mambizi manga? Ndi mambizi mutubakamo?” 22 Yesu amubwide bunee: “Nsikukubula tugu mambizi mutubakamo; tondo makumi mutubakamo mambizi mutubakamo. 23 Ububo Bukota bwa meigulu bwalingimana na mukota umozi watundaga kuganza byage byabezaga na bakiti bage ba mulimo. 24 Nu gaalingile kuganza byage, bavule na umozi wabezaga na nsombi za bikulo bya mukota byingi. a 25 Muntu wozo ntabezaga na kena ka kuliga nsombi zage, ububo mukota wage akakizizie buno, bamukunzie ku bukobe, we nu mukazi wage nu bana bage nu byage binsania buno alige nsombi zage. 26 Mukiti wa mulimo agwede gansi amukumbaminne, nu amusegile bunee: ‘Mukota nkwile kyombo, nkakuliga bikulo byobe binsania.’ 27 Nu Mukota wage amukwilide kyombo, amumenkile, nu amusigilide na zezo nsombi.
28 Tondo gatukile mukiti wa mulimo akulumenne na munyage na mulimo wabezaga na nsombi zage za bikulo bikeke, b amukatide g'ikosi atendile bunee: ‘Ndige nsombi zane kano kaluma!’ 29 Mukiti munyage agwede gansi, amulakide bunee: ‘Nkwile kyombo, nakulige bikulo byobe!’ 30 Tondo we ananine, endile kumubika mu kikando, aaba nu gaakaliga nsombi. 31 Gamonine bango bakiti banyage ku bubo, mitima zabo zinine na bubo, bavule kusolela mukota wabo bunsania bwakitaga. 32 Mukota wage amumanine, amubwide bunee: ‘Uwe mukiti mubi, nakusigilide na bikulo byane binsania, kubuno wandakide: 33 ndi ntunavwama kukwila munyobe kyombo anga bunakukwilide kyombo?’ 34 Nu mukota wage ongilwe, amubikile mu maboko ma basungia aaba nu gaakaliga nsombi insania. 35 Ububo bwamukite Tatane uli mwigulu, ndi umozi wa kumuli ntakusigilila mubuto wage mu mutima wage.”