Kugaluka kwa Kilungi kya Yesu
17
1 Nu gasilile bindi mutuba, Yesu atolile Petro, nu Yakobo, nu muto wage Yoana, nu abakamine nabo ku mwiduko mulazi bobenyene: 2 nu kilungi kyage kyabagalukide; nu malanga mage masanine anga kisongo kya busi, nu nsulu zage zabede zenga anga na kyengi nunse. 3 Nu babasidwe na Musa nu Elia bese batenda nage. 4 Nu Petro atendile Yesu bunee: “Mukota, buli busoga twikale gano: ndi watunda, nobake nusu isatu; lumozi lwobe, nu lumozi lwa Musa nu lumozi lwa Elia.” 5 Gaabezaga eki atenda, lutundutundu lwenga lwabakukide; iyuki lyatukila mu lulo lutundutundu lyatendile bunee: “Wono eli Mwana wane, u ngoli zane, natananinwa nage; mumungwililazi.” 6 Nu gongule beigisibwa bage ku iyuki lilino, bagwede bukukama gansi, bakule boba. 7 Nu Yesu avule eitubizie kubeli, abatendile bunee: “Emanukazi, tamukue boba.” 8 Nu gabalambwide meiso, tabamonine ku ungo, umpanga Yesu. 9 Nu gababezaga bese bagela mwiduko, Yesu abakakizizie bunee: “Tamusambalile ungo muntu bumwamona kubo, aaba gakayuka Mwana wa Muntu ku bakuzi.” 10 Nu beigisibwa bage bamubuzizie bunee: “Kubuni basozi ba mulembe bakutenda bunee: ‘Bwatunganana Elia kulinga kuvwa tanga?’” 11 Nu We abakwide bunee: “Lebelebe, Elia akuvwa tanga nu kukunga binsania; 12 tondo nkumubula buno, Elia avule kalazi, tabamumenyine, tondo bamukitile anga bubatundaga. Ububo Mwana wa Muntu nu We ababazibwe nabo.”
13 Beigisibwa bamenyine buno, akubasambalila musagu wa Yoana Mututiki.
Yesu Akonia Wabezaga na Lungu
14 Nu gababasile ku musanganano, muntu umozi avule kweli, amukomenne mazu, nu atendile bunee: 15 “Mukota, kwila mwana wane kyombo, eli na lusambo lwa lungu, akubabazibwa nunse; mambizi meingi akwitumba ga keiya nu mu mazi. 16 Namwekile ku beigisibwa bobe, tondo tabavwamine kumwonia.” 17 Nu abakwide bunee: “Inyuwe kibuti kinani, nu kitakatizia, nti nkeikalaga n'inyuwe kankanka? Gani gankakutilwa? Vwazi na mwana kundi.” 18 Nu Yesu azugide musumbu nu wozo musumbu atukile mu mwana: mu nkungu zezo mwana onine.
19 Beigisibwa bavule ku Yesu nu bamubuzizie bunee: “Kubuni iswe tatwavwamine kumutikya?” 20 Nu abakwide bunee: “Ku kabamba ka busosu bwa bukatizio bweinyu. Lebelebe, nkumubula bunee: Songo muli na bukatizio anga mbuto za bunyonyo, munabula mwiduko bunee: ‘Tuka kuko nu utingile kukuno,’ nu nti watinga, takuli kitanamukulunganina. 21 Tondo bubuno tabunaba tugu geteli kusega nu kwikanda kulia.”
Yesu Akulolesia Kukua nu Kuyuka Kwagei
22 Nu gababezaga beli mu Galilaya, Yesu abatendile bunee: “Bakagabula Mwana wa Muntu mu maboko ma bantu; 23 nu bakamwita nu akayuka ku bakuzi kusila kwa bindi bisatu. Nu babede na kabebe nunse.”
Yesu Abangamizie ku Kuliga Kodi
(Mk 9:33)
24 Nu gababasile mu Kapernaumu baligia ba kodi za numba za kukumbamina bavule ku Petro bamubuzizie bunee: “Musozi weinyu ndi ntakuliga kodi za numba za kukumbamina?” 25 Atendile bunee: “Ee, akuliga.” Nu eingide mu numba, Yesu alingile kumubuzia bunee: “Simoni, ukukengela buni? Ndi bakota ba kisi bakuligia bana babo aba ndi bageni?” 26 Nu akwide, “Bageni tugu.” Yesu ababwide bunee: “Bubo bana tabanaliga. 27 Tondo tunavwa kubongia; enda ku kitatenge, nu isa ndobani mukyo, nu tola kyena kyalinge kukatwa; gawasule mu kanua kakyo, nti wamone kinkulumba kya feza nu nti wakitikya, nu nti wakasa babo baligia, kobe nu kane.”