Musumo wa Bakiti ba Mulimo
20
1 Nu atendile lingo bunee: “Bukota bwa mwigulu bwalingimana na nyene isoa wendile nindunindu kulonda bakiti bakumukitila mu isoa lyage lya mizabibu. 2 Nu gaagomezie nabo buno alige muntu na muntu feza za busi bumozi, abasingile mu isoa lyage. 3 Nu gatingile nkungu isatu, endile, nu amonine ku bango bemana tugu g'isoko; 4 nu ababwide bunee: ‘Endazi mu isoa lyane namukase anga bwakulungana.’ Nu bendile. 5 Ku nkungu mutuba, nu nkungu mubula, endile lingo akitile bubo. 6 Nu gatingile nkungu ikumi n'umozi, endile, nu amonine ku bango bemana; ababuzizie bunee: ‘Kubuni inyuwe mwemana tugu nkungu insania?’ 7 Bamubwide bunee: ‘Takuli muntu ukutukasa mulimo.’ Nu ababwide bunee: ‘Endazi mu isoa lyane.’ 8 Nu gabwabede buse mwigolo, nyene isoa abwide mulangi wa byage bunee: ‘Mana bakiti, ubakase lukalilo lwabo, nti walingila ku bazinda nu kusila ku batangi.’ 9 Nu gavule babo ba ku nkungu ikumi n'umozi bakasilwe feza za busi bumozi. 10 Nu gavule babo batangi, bakengede buno, iswe tukutalikilwa ingo feza; tondo nu bo bakasilwe feza za busi bumozi. 11 Nu gabakasilwe lukalilo lwabo, babede na manungunungu ku nyene isoa bunee: 12 ‘Babano bazinda bakitile mulimo nkungu emozi tugu, nu watulingimania nabo nu iswe twakitile mulimo busi bunsania, nu twababazibwa na musi.’ 13 Tondo akwide umozi wa ku babo bunee: ‘Mubuto wane, nsyakwagila; kubuno twitabizanizie nobe ku feza za busi bumozi tugu. 14 Kata zobe, nu wiyendele; nkutunda kuliga wozo ungo muzinda anga uwe. 15 Ndi nsinamenya kukita na byane anga bunkutunda? Ndi uli na lugi kubuno nne nili musoga?’ 16 Bubo bazinda bakaba batangi, nu batangi bakaba bazinda.”
Yesu Akulolesia Kukua nu Kuyuka Kwage
(Mk 10:32-34; Lk 18:31-34; Mat 12:38-40; 16:21; 17:22,23)
17 Nu Yesu endaga ku Yerusalema na beigisibwa bage ikumi nu babili, nu gababede bese mu nzila bobenyene, ababwide bunee: 18 “Ungwililazi, tukwenda ku Yerusalema; nu Mwana wa Muntu agabulwe ku basankoga banene nu basozi ba mulembe, nu bo bamusungie buno akue, 19 nu bamugabule ku baBilongo buno bamwililike, nu bamulibule, nu bamwite ku musalaba, nu ayukibwe kutuka ku bakuzi kusila kwa bindi bisatu.”
Nina wa Yakobo nu Yoana Akubasegela ku Yesu
20 Nu nina wa bana ba Zebedayo avule na bana bage ku Yesu, amukumbaminne, amusegile lusego lumozi. 21 Nu Yesu amubuzizie bunee: “Ukutunda kikizi?” Amutendile bunee: “Bika bana bane babili beikale mu Bukota bwobe, umozi ku kuboko kwobe kwa seidume nu ungo ku kuboko kwobe kwa seikazi.” 22 Tondo akwide bunee: “Tamukumenya kimukusega. Ndi munavwama kunua ku kituma kinkunua kukyo?” Bamutendile bunee: “Tunavwama.” 23 Ababwide bunee: “Lebelebe, mwanue ku kituma kinanue kukyo: tondo kwikala ku kuboko kwane kwa seidume, nu kuboko kwane kwa seikazi, nsinavwama kumukasa; tondo kwikala kuko kuli ku bantu balongekedwe na Tatane.”
24 Nu gongule beigisibwa ikumi ku bubo, bongedwe zezo mibuto zabo ibili. 25 Tondo Yesu abamanine, ababwide bunee: “Mwizi buno bakota ba baBilongo bakubangata, nu bakota babo bakubakitia ku magala. 26 Tondo bubo tabube kumuli; tondo wozo ukutunda kuba munene kumuli abe mukiti wa banyage, 27 nu we ukutunda kuba mutangi kumuli abe mukiti wa banyage: 28 kubuno Mwana wa Muntu ntavule kukitilwa tondo kukita nu kukasana kalamo kage ku kabamba ka beingi buno bakululwe.”
Yesu Akuzibula Meiso ma Byuku Bibili
29 Gabatukile ku Yeriko, musanganano munene wamuyangile. 30 Nu bamulume babili byuku babezaga mu ntungo mwa nzila, gabongule buno, Yesu akutinga, balalukile n'iyuki inene bunee: “Mukota, Mwana wa Davidi, tukwile kyombo!” 31 Nu bantu babazugide bunee: “Ikalazi kibibi;” nu bitide kulaluka bunee: “Mukota, Mwana wa Davidi, tukwile kyombo!” 32 Nu Yesu emanine, nu abamanine, nu ababuzizie bunee: “Mukutunda nimukitile kikizi?” 33 Bamubwide bunee: “Mukota, tukutunda meiso meitu mazibulwe.” 34 Nu Yesu abakwilide kyombo, nu akatile ku meiso mabo; nu kazanga kongo, bamonine nu bamuyangile.