Meigisia ma Beisingulubo
7
1 BaFarisayo nu Basanzi bamozi ba mulembe batukile ku Yerusalema, bakundamanine ku Yesu. 2 Bamonine ku beigisibwa bamozi bakulia, taboga ku maboko. 3 (BaFarisayo nu baYuda bansania tabaliaga geteli koga ku maboko kubuno banzaga bumba bwa beisingulubo). 4 Nu lingo ndi batuka ku isoko, ndi taboga tabalie. Nu beli lingo na bitondo byingi, anga kusugula makopo, nyungu nu nyungu za nsubi. 5 Nu baFarisayo nu Basanzi bamubuzizie bunee: “Kubuni beigisibwa bobe tabakuyanga meigisia ma bantu ba wakalazi; tondo bakulia, taboga ku maboko?” 6 Yesu ababwide bunee: “Isaya alenganizie buligo ku kabamba keinyu, inyuwe bengelezi, anga bwasanzilwe bunee:
‘Bantu babano bakunanza na milomo zabo,
Tondo mitima zabo zili bulazi na nne.
7 Bakunkumbamina buliabulia,
Nu bakwigisia meigisia ma makakizio ma bantu.’ a
8 Nu inyuwe mukusiga makakizio ma Kalaga, nu mukwanza meigisia ma bantu.
9 Abatendile lingo bunee: “Lebelebe mukusomba makakizio ma Kalaga, buno mwanze meigisia meinyu. 10 Kubuno Musa atendile bunee: ‘Anza So nu Nyoko,’ nu ‘wozo waswilila isi aba nina atunganana kukua.’ 11 Tondo inyuwe, mukutenda bunee: ‘Ndi muntu atenda ku isi aba ku nina bunee: “Lukaso lunabezaga nalo kukukasa buno umone mutali u Korbane,”’ bwisulilwa buli bunee: ‘Lukaso lulo nalukasa ku Kalaga.’ 12 Aba tamukuziga lingo wono kukitila isi nu nina, 13 Ku lukita luluno, mukubigia idagi lya Kalaga ku kabamba ka bumba bweinyu, bubo bumwasila kukata ku bantu. Nu mukukita bingo bitondo byingi anga bubo.”
Bitondo Bikubigia Muntu
14 Nu gaamanine lingo musanganano, abatendile bunee: “Munungwilile, inyuwe bansania, nu menyininazi; 15 takuli kena keli gantata ga mubili wa muntu, kaningila mweli nu kanavwama kumubigia; tondo kikutuka mu muntu, u kikumubigia.” 16 (Ndi muntu eli na matuzi ma kungwilila, nti ongwilila!) 17 Geingide mu numba, asigile musanganano, beigisibwa bage bamubuzizie bunee: “Bwisulilwa bukizi bwa musumo wozo?” 18 Ndi tamwizi buno ko kansania keli gantata ga mubili wa muntu ndi keingila mweli nti takanamubigia; 19 kubuno kako takakwingila mu mutima wage, tugu munda zage, kumbusa kakutuka mu mubili wage kwenda ku mambwe, u kubula buno engezie idia linsania.
20 Atendile lingo bunee: “Kikutuka ku muntu, u kikumubigagia. 21 Kubuno munda mwa mitima za bantu, u mukutukaga makengelo mabi, butazi, bwiti, bwibi, kwita meiga, 22 lutundo lubi, mibi, bwengelezi, misako za butazi, liso ibi, bilingano, kabenga, bukongolo. 23 Bibino bitondo binsania bibi u bikutukaga mu mutima, nu bibyo u bikubigia muntu.”
Mukikulu Mugeni Akatizizie Yesu
24 Yesu atukile kuko, endile ku myaga za Tiro nu Sidoni. Eingide mu numba emozi, ntatundaga muntu umozi kubumenya, tondo tabwakulungenne kubiswa. 25 Kubuno mukikulu umozi abezaga na mwana wage wa mukazi wabezaga na musumbu, ongule ku misagu zage; nu avule kwiyisa ku magulu mage. 26 Wozo mukikulu abezaga muGriki, wa kilongo kya Foinike wa ku Suria. Amusegile buno atikye musumbu wa nsese mu mukinga wage. 27 Yesu amutendile bunee: “Siga bana beikute tanga; kubuno ta busoga kutola idia lya bana nu kulikasana ku mboa.” 28 Tondo amwakwide nu we bunee: “Ee, Mukota, tondo aba mboa zili munda mwa meza, zikuliaga mbobu za bana.” 29 Nu amutendile bunee: “Ku kabamba ka kutenda kwobe, enda, musumbu atuka mu mukinga wobe.” 30 Nu, gaasubizie ku numba zage, asangile mwana wage eiyombekibwa ga mugu; nu asangile musumbu atuka mweli.
Yesu Akonia Muntu Waziba Matuzi nu Ntatulaga Busoga
31 Yesu atukile lingo mu myaga za Tiro, nu atingile ku Sidoni, nu endile ku kitatenge kya Galilaya, mu myaga za Dekapoli. 32 Nu bamuvwilide na kimbula matuzi, nu atetumaga, bamusegile buno amonie. 33 Amulombwede mu musanganano ku lumbisombiso, amwingizizie minwe mu matuzi, aswide matazi, nu amutilile ku ntonga za lulami. 34 Kusila agalamine kwigulu, na kabebe kanene mu mutima wage, nu atendile bunee: “Efata,” bwisulilwa bwa bubo “Zibuka.” 35 Kazanga kongo matuzi mage mazibukile, kutetuma kwage kwasilile; nu atendile busoga. 36 Yesu abakakizizie bunee: “Tabasambalile ungo muntu,” tondo bubo bwabananagia, u bubasambede nunse. 37 Bangamine nunse, nu batendile bunee: “Asila kukita binsania busoga; akungusia bimbula matuzi nu tuluma tuse twatenda.”