Yesu Asungwide baFarisayo nu Basanzi
15
1 BaFarisayo nu Basanzi batukile ku Yerusalema bavule ku Yesu; bamutendile bunee: 2 “Buni butakwanza beigisibwa bobe bumba bwa bakulu? Kubuno bakulia taboga ku maboko.” 3 Nu abakwide bunee: “Kubuni nu inyuwe mukubigia kukakizia kwa Kalaga ku kabamba ka nkita zeinyu? 4 Kubuno Kalaga atendile bunee: ‘Anza so nu nyoko: nu wozo waswilila isi aba nina nti akue.’ 5 Tondo inyuwe mukutenda bunee: ‘Muntu unsania ukutenda ku isi aba ku nina bunee: “Lukaso lunabezaga nalo kukukasa nalukasile Kalaga;” 6 nu we ntakwanza isi aba nina. Inyuwe mukubigia idagi lya Kalaga ku kabamba ka nkita zeinyu. 7 Inyuwe bengelezi, lebelebe, Isaya amulenganizizie bulili bunee: 8 “Bantu babano bakunanza na milomo zabo,
Tondo mitima zabo zili bulazi na nne.
9 Tondo bakunkumbamina buliabulia,
Bakwigisia meigisia ma malagi ma bantu.”’”
10 Yesu amanine musanganano nu abakwide bunee: “Ungwililazi nu mumenyinine: 11 Takikulia muntu mu kanua u kikumubika mubi; tondo kikutuka mu kanua kage, u kikumubigia.”
12 Nu beigisibwa bamwendede bamubwide bunee: “Ndi ntwizi buno baFarisayo beinine mitima gabongule ku moki mamano?” 13 Tondo abakwide bunee: “Kiyikanwa kinsania kitayikilwe na Tatane uli mwigulu kikayulwa. 14 Basigazi: beli basondelezia ba byuku. Ndi kyuku kikusondelezia kingo, nti bakoloke bobabili mu muzinga.” 15 Petro amwakwide bunee: “Twisulile wono musumo,” 16 Yesu abatendile bunee: “Ndi inyuwe tamuli na menge aaba nu kano kaluma? 17 Tamukumenya buno, kikwingila mu kanua kikutinga munda, nu kikwiswa mu mambwe? 18 Tondo bikutukaga mu kanua u bikutuka mu mutima; nubyo u bikubigagia muntu. 19 Kubuno mu mutima u mukutukaga makengelo mabi, nu bwiti, nu kwita meiga, nu butazi, nu bwibi, nu bulongeki bwa buza, nu bilingano. 20 Bibyo u bikubigia muntu, tondo kulia ntoga ku maboko takukubigia muntu.”
Yesu Akonia Mukinga wa Kanana
21 Yesu atukile kuko, nu endile mu ndenge za Tiro na Sidoni. 22 Nu mukikulu wa mu Kanana atukile mu lulenge lulo, alalukile n'iyuki inene bunee: “Mukota, Mwana wa Davidi, nkwile kyombo; mukinga wane akubabazibwa na musumbu.” 23 Tondo Yesu ntakwide iyuki kweli; beigisibwa bage bavule ku Yesu, bamusegile bunee: “Musubye kubuno atuyanga na kazege.” 24 Abakwide bunee: “Nasingilwe tugu ku mikoko zaziminne za numba za Israeli.” 25 Tondo mukikulu avule kumukumbamina, atendile bunee: “Mukota, nkasie!” 26 Yesu amwakwide bunee: “Tabusoga kwisa idia lya bana kuli mboa.” Tondo mukikulu amubwide bunee: 27 “Ee, Mukota: tondo mboa nuzo zikuliaga mbobu zikukolokaga kunsi kwa meza ma bakota babo.” 28 Yesu amwakwide bunee: “Uwe mukikulu, uli na magala mu bukatizio! Ukukitilwa bubo buukutunda.” Nu mukinga wage onezibwe mu nkungu zezo.
Yesu Akonia Muntu Waziba Matuzi nu Atetumaga
29 Yesu atukile kuko, nu endile bwigi na kitatenge kya Galilaya, nu abakamine ku mwiduko, nu eikede kuko. 30 Misanganano zavule kweli, bitunga, nu byuku, nu tuluma, nu baketuka makwa, nu ba ingo nsambo za nkita na nkita, nu bababikile ku magulu mage, nu abonezie: 31 nu lingo bantu bangamine gabamonine ku tuluma tuse twatenda, nu babeleka bese bemana, nu bitunga bise byenda kima, nu byuku bise byamona: nu baganwine Kalaga wa baIsraeli.
Yesu Akulisia Tununu Tunazi
(Mk 8:1-9)
32 Yesu amanine beigisibwa bage, nu ababwide bunee: “Nkukwila musanganano kyombo, kubuno beseli na nne bindi bisatu nu tabeli n'idia lingo; nsikutunda bende na nzala buno banavwa kukua mu nzala mu nzila.” 33 Nu beigisibwa bage bamubwide bunee: “Kikino kiziki kili lubanda, kuni kutunamona idia buno bantu begezia gano beikute?” 34 Nu Yesu abakwide bunee: “Tumpampa tunga tumuli nato?” Bakwide bunee: “Tuli na mutubakamo tugu nu byena bikeke tabyingi.” 35 Yesu abwide musanganano bunee: “Ikalazi gansi;” 36 nu akatile tumpampa mutubakamo nu byena; nu asegile, nu abibungwide, nu akasile ku beigisibwa, nu beigisibwa babikasenne ku musanganano. 37 Nu babo bansania balide, nu beikutile: nu basongezye mbobu zasigalaga zizazizie nzi mutubakamo. 38 Bantu bansania baliaga babezaga bamulume bakuka tununu tunazi, geteli kuganza bakikulu nu bana. 39 Gasilile Yesu kulagana na musanganano, eingide mu bwato, nu abasile mu ndenge za Magadani.