Yesu Akusambala Kwendulwa kwa Numba za Kukumbamina
13
1 Gatukile Yesu mu numba za kukumbamina, umozi wa beigisibwa bage amutendile bunee: “Musozi, lola! Makozi nu kobaka kukuno!” 2 Yesu amwakwide bunee: Ndi ukumona ku kobaka kukuno buno kuli kunene? Tagakasigala ikozi gantata ga lingo litakwendulwa. Tubebe Twabase Lwabusio lwa Kusubya kwa Yesu
3 Yesu eikede gantata ga Mwiduko wa Mizeituni, walolelana na numba za kukumbamina. Nu Petro, Yakobo, Yoana nu Andrea, bamubuzizie ku lumbisombiso bunee: 4 “Tubule buni bukaba bitondo bibino? Nu ku kalolesio kakizi kabakamenyinina buno bitondo bibino bise byazindilila?”
5 Yesu alingile kubatenda bunee: “Idangazi buno muntu wampa ntamwengelele. 6 Kubuno beingi bakavwa mu izina lyane bakatenda bunee: ‘Nne u We!’ Nu bakengelela bantu beingi. 7 Gamukungwa ku bita nu misagu za bita, tamuzangezange; kubuno bitondo bibino byatunganana kuvwa, tondo kuzinda takwika. 8 Kilongo kikalwana na kingo kilongo, nu bukota bukalwana na bungo bukota; kukaba tuningini ku kisi ku lulenge na lulenge, kukaba munganda. Bubo u kulinga kwa lubabazio.
9 Idangazi mubenyene. Kubuno bakamubasia ku nusu za milondo; nu ku numba za musanganano mukalibulwa. Mukabasibwa lwabusio lwa bangati nu lwabusio lwa bakota ku kabamba kane, bukaba bulongeki ku beli. 10 Bwatunganana buno Musagu Musoga usambalwe tanga ku bantu bansania. 11 Gabamukate nu kumugabula ku nusu za milondo, tamuzangezange ku bitondo bimwatende; tondo, mutende bitondo bimwakaswe mu nkungu zezo, kubuno ta inyuwe u babitende, tondo Muuza Wasililila. 12 Mubuto wa muntu akagabula mubuto wage buno akue, nu isi akagabula mwana wage; nu bana babenge babuti babo nu babagabule buno beitwe. 13 Mwasombwe na bantu bansania ku kabamba k'izina lyane. Tondo wozo widindika aaba nu kuzinda nti akonibwa.”
Kabebe ka Kubigia
14 “Gamukamona ku ‘Lusombo lwa Kubiga’ lwemana ku kiziki kilutakulungana nakyo, (Wozo ukusoma amenye bwisulilwa!) nti babo bakaba mu Yudea batine ku miduko. 15 Wozo uli gantata numba ntagele nu nteingile kutola kili mu numba zage; 16 nu wozo ukaba mu isoa ntasubanie lumbusambusa kutola ikoti lyage. 17 Kabebe, ku bakikulu bakaba na meimi nu ku babo bakamomia ku bindi bibyo! 18 Musege buno bitondo bibino tabibase mu nkungu za mpego! 19 Kubuno, mu bindi bibyo, kukaba lubabazio lunene lutebezaga lingo kutukila ku kulinga kwa kisi kyabumbilwe na Kalaga, nu talukaba lingo. 20 Nu songo Mukota ntakegezie bindi bibyo, takunonine muntu wampa. Tondo abikegezie ku kabamba ka basombolwa basombwede.
21 “Ndi muntu amubula bunee: ‘Lolazi, Kristo eli gano!’ Aba ‘Eli kuko!’ tamubukatizie. 22 Kubuno kukavwa baKristo ba buza nu balengania ba buza; bakakita migeleko buno bengelele basombolwa, ndi bunakulungana. 23 Tondo inyuwe, idangazi! Namulolesizie binsania lwabusio tabiba.”
Kuvwa kwa Mwana wa Muntu
24 Tondo mu bindi bibyo, kusila kwa nkungu zezo za mbabazio, musi gukaba kapilo nu mwezi tagukasana lingo. 25 Nu nkeninkeni zikakoloka kutuka kwigulu, nu magala meli mwigulu makatengatenga. 26 Nu nkungu zezo bakamona Mwana wa Muntu akuvwa mu bimpa na magala manene nu lutanuno lwage lunene. 27 Nu nkungu zezo akasinga banzelo nu kukundamania basombolwa bage, ku ndenge inazi za kisi, kutukila kuzinda kwa kisi aaba nu ku kuzinda kwa meigulu.
Meigisia ku Muti wa Mutini
28 “Mwiyigisie musumo wa muti wa mutini: nkungu zalinga kwasa nsamba, nti mwamenya buno nkungu za kilimo ziseli bwigi. 29 Bubo, gamukamona ku bitondo bibino byavwa, mumenye buno Mwana wa Muntu eseli bwigi, nu nti es'emana ku lwibi. 30 Lebelebe, nkumubula buno: kibuti kikino takikatinga ndi bitondo bibino binsania tabibasa. 31 Igulu nu kisi bikatinga, tondo bitondo byane tabikatinga.”
Kalaga wenyene Eizi Nkungu za Kuzinda
32 “Ku busi bubo aba ku nkungu zezo takuli muntu umozi wizi, aba banzelo Mwigulu, aba Mwana; tondo Isi wenyene. 33 Idangazi, kesiazi ntende nu segazi, kubuno tamwizi gakavwila nkungu zezo. 34 Bubo buli anga muntu atuka nu kwenda lugendo: asigile numba zage nu asigile bwangato ku bakiti bage, buno muntu na muntu akite mulimo wage nu akakizizie mulangi wa lwibi buno akesie ntende. 35 Kesiazi ntende, kubuno tamwizi busi bwavwe Mukota wa numba: ndi mwigolo, aba ndi munkatini mwa kindi, aba ndi ku mukelo, aba mu nindunindu. 36 Kuazi boba buno, anavwa kumubasila kitangalabesi nu kusanga mwiyombeka. 37 Bubo bunamutenda, nabutenda ku bansania bunee: Mwidangazi!”