Yesu Abongezibwe Bulago na Maria
12
1 Bindi mutuba lwabusio lwa Kisagulo ky'Isuluko, Yesu abasile ku Betania, kuko kwikalaga Lazaro, wozo muntu waayukizie kutuka ku bakuzi. 2 Kuko bamuyikide idia, nu Marta abakasizie kulilusia, nu Lazaro abezaga umozi wa ku babo baliaga gamozi na Yesu. 3 Nu Maria atolile nkindi kya bulago bwa bukunza bukali, nu abubongezie ku magulu ma Yesu. Kumbusa anyonywede magulu ma Yesu na nzwili zage, nu numba insania ziyede na nsunu za bubo bulago. 4 Yuda Iskariota, umozi wa ku beigisibwa ba Yesu, u wozo wamugabule, akitile myango nu atendile bunee: 5 “Kubuni bulago bubuno tabunakunzibwa ku byindi nkama isatu bya feza nu kubikasana ku bazambi?” 6 Atendile bubo ta kubuno akutunda bazambi, tondo kubuno abezaga mwibi, nu buno abezaga na nsago zabo za bikulo, nu atolaga ku bibyo bibabikaga mu zo. 7 Tondo Yesu ababwide bunee: “Musigazi; abulangile ku busi bwa kuyikwa kwane. 8 Muli na bazambi bindi binsania, tondo tamwabe na Nne bindi binsania.” Lwango lwa Kwita Lazaro
9 Kibombo kinene kya baYuda bongule buno Yesu eli ku Betania, nu bendile ku mwino wozo. Ta ku kabamba ka Yesu tugu, tondo buno bamone lingo ku Lazaro, wozo wayukizibwe na Yesu kutuka ku bakuzi. 10 Basankoga banene bakalile lwango lwa kwita Lazaro nu we, 11 kubuno ku kabamba kage, baYuda beingi balekanukile nabo nu bakatizizie Yesu.
Yesu Eingide mu Yerusalema
12 Gakede busi, kibombo kinene kya bantu kyavule ku Kisagulo ky'Isuluko, bongule buno Yesu akuvwa ku Yerusalema. 13 Batolile nanga za bibila nu bendile bamukulumania. Balalukile bunee: “Hosana! Mbogimbogi ku wozo ukuvwa mu izina lya Mukota; mbogimbogi ku Mukota wa Israeli!” a 14 Yesu asangile mpunda nu eikede gantata gazo anga bwasanzilwe bunee:
15 “Uwe mukinga wa Sayuni, ntukue boba.
Lola, Mukota wobe akuvwa,
Eikala gantata ga kyana kya mpunda.” b
16 Beigisibwa bage tabalingile tanga kusongolola bubo, tondo gabede Yesu es'aganunwa, bakengede buno bitondo bibyo byasanzilwe ku kabamba kage nu bamukitidebyo.
17 Kibombo kya bantu bansania, babezaga na Yesu nkungu zamanaga Lazaro kutuka mu nsinda nu kumuyukya kutuka ku bakuzi, basambede bubamonine kubo. 18 Ku kabamba kako, bantu beingi bendile kumukulumania kubuno bongule buno akitile wono mugeleko. 19 BaFarisayo batendenne bwabobwabo bunee: “Tamukumona, tamunavwama kukita kampa. Lolazi, bantu bansania bakumuyanga.”
BaGriki Bamozi Balondile Yesu
20 Kwabezaga baGriki bamozi munkatini mwa babo babakamine ku Yerusalema kukumbamina ku nkungu za kisagulo. 21 Basigelede bwigi na Filipo (wabezaga wa ku Betesaida, ku Galilaya) nu bamutendile bunee: “Tateiswe, tukutunda kumona ku Yesu.” 22 Filipo endile kusolela Andrea bubo, kumbusa bobabili bendile kusolela Yesu bubo. 23 Yesu abakwide bunee: “Nkungu zakuka buno Mwana wa Bantu atanunwe. 24 Lebelebe nkumubula bunee: ‘Ndi kaguma kamozi ka ngano takakoloka gansi mu bisogo nu kukua, nti kasigala kokenyene; tondo ndi kakua, nti kakukolama mbuto ningi.’ 25 Wozo ukutunda kalamo kage akukazimizia, tondo wozo ukusomba kalamo kage mu kisi kikino, akukalanga ku kalamo katanakuzinda. 26 Ndi muntu akutunda kunkitila, nti atunganana kunyanga, nu gago ga nili, u gago nu go gabe mukiti wane. Ndi akunkitila, nti Tatane amukutye.
Yesu Alenganizie Lukuo Lwage
27 Kano kaluma, mutima wane guli na kabebe. Nikite buni? Ndi nitende bunee: ‘Tatane, nnonie mu bubuno bukumbasila mu nkungu zeno’? Tondo ku kabamba kako u kunavule aaba nu kubasa ku nkungu zeno. 28 Tatane, tanuzia izina lyobe.” Iyuki lyatukile mwigulu bunee: “Nasila kulitanuzia nu nalitanuzie lingo.” 29 Musanganano wabezaga bwigi nu bongule ku iyuki lilyo, babwide bunee: “Kuli mukulumino.” Tondo bango batendile bunee: “Mwanzelo u watendaga nage.” 30 Tondo Yesu abatendile lingo bunee: “Iyuki lilyo talyatendilwe ku kabamba kane, tondo ku kabamba keinyu. 31 Kano kaluma ziseli nkungu za kusungia kisi kikino; kano kaluma mwangati wa kisi kikino akwiswa kumbuga. 32 Tondo nne, ndi nasakikwa ga kisi, nti nalute bantu bansania kundi.” 33 Atendile bubo buno alolesie lukita lwa bwakue. 34 Musanganano wa bantu beingi bamwakwide bunee: “Tungule ku mikanda za milembe zeitu buno Kristo akulamaga bindi binsania. Buni buukutenda buno Mwana wa Bantu atunganana kusakikwa? Nazi wozo Mwana wa Bantu?” 35 Yesu ababwide bunee: “Kyengi kikili munkatini mweinyu ku nkungu nkeke. Tabangazi nkungu zimuli na kyengi, buno kapilo kanavwa kumusanga, kubuno wozo ukutabanga mu kapilo, nti ntakumenya ku kiziki kwa kwenda. 36 Mukatizie kyengi nkungu zimuli nakyo, buno mube bantu ba kyengi.”
BaYuda Tabakatizizie Yesu
Yesu atendile bubo, kusila eiyendede nu abisamine bulazi nabo. 37 Aba buno akitile migeleko mingi lwabusio lwabo, tondo baYuda tabamukatizizie, 38 buno buzindilile bwatendaga mulengania Isaya bunee:
“Mukota Kalaga, nazi wakatizizie musagu weitu?
Mukota Kalaga alolesizie magala mage ku nazi?” c
39 Tabavwamine kukatizia, kubuno Isaya atendile lingo bunee:
40 “Kalaga akukide meiso mabo
Nu akandile makengelo mabo,
Buno banavwa kumona na meiso mabo, d
nu kumenyinina na mitima zabo, nu banagaluka buno nibonie.”
41 Bubo u bwatendile Isaya nkungu zamonine ku lutanuno nu zaatendaga ku kabamba kage.
42 Tondo, aba munkatini mwa bakota ba baYuda, bantu beingi bakatizizie Yesu, tondo ku kabamba ka baFarisayo tababusambede buno banavwa kutukibwa mu numba za misanganano, 43 kubuno batundile lutanuno lwa bantu kutinga lutanuno lwa Kalaga.
Lusungio ku Idagi lya Yesu
44 Yesu alalukile bunee: “Wozo wankatizia, ntankatizia nne nenyene tugu, tondo akatizia nu wozo wansingile, 45 nu wozo wammonako, nti asila kumona ku wozo wansingile. 46 Nne navule mu kisi anga kyengi, buno unsania wankatizia, ntasigale mu kapilo. 47 Ndi muntu akungwa ku malagi mane nu ntakumalanga, nti ta nne u ukumusungia, kubuno nne nsyavule kusungia kisi, tondo kukyonia. 48 Wozo ukunsomba nu utakwitabizia malagi mane, eli na umozi ukamusungia: Musagu wozo u nasambede u ukamusungia ku busi buzinda, 49 kubuno malagi mane tamakutuka kundi; tondo ku Tatane wozo wansingile, ankakizizie wenyene bubo bunatunganana kutenda nu kwigisia. 50 Nu nizi buno ikakizio lyage lili kalamo katanakuzinda. Ukinsa bubo bunkutenda, nkubutenda anga bwantendile Tatane.”