Musumo wa bikumi ikumi
25
1 Nu atendile lingo bunee: “Ububo Bukota bwa meigulu bwalingimanibwa na bikumi ikumi, bakatile matala mabo, bendile kukulumania musongi. 2 Nu batano ku babo babezaga bikongolo nu bango batano babezaga na menge. 3 Babo bikongolo, bakatile matala mabo, tondo tabendile na makiti m'itala: 4 Tondo babo babezaga na menge bendile na matala, nu makiti mu bituma byabo. 5 Musongi eizizizie, nu bazenzede nu kwiyombeka. 6 Tondo munkatini mwa kindi mwalalukilwe n'iyuki bunee: ‘Wono u musongi! Vwazi kumukulumania!’ 7 Babo bansania bayukile, nu balongekile matala mabo. 8 Babo bikongolo babwide babo babezaga na menge bunee: ‘Tukasazi ku makiti kubuno matala meitu makuzimazima, tatuli na makiti.’ 9 Tondo babo babezaga na menge bakwide bunee: ‘Makiti tamakuka kutuli nu kumuli: endazi ku bakunzia mwikunzile meinyu.’ 10 Nu gabendile kukunza makiti musongi avule; babezaga kayikayika beingide nage mu kisagulo; nu lwibi lwigedwe. 11 Nu bo bango batano bavule batendile bunee: ‘Mukota, Mukota, twigulile!’ 12 Tondo abakwide bunee: ‘Lebelebe nkumubula buno, Nsimwizi.’ 13 Kesiazi ntende, kubuno tamwizi kindi aba nkungu.
Musumo wa Bikulo
14 Kubuno bwalingimana na muntu wendile ku kingo kisi, nu amanine bakiti bage, nu abakasile bikulo byage. 15 Akasile umozi byindi bya olo nkama itano, nu ungo byindi nkama ibili, nu ungo byindi lukama lumozi, na muntu na muntu geigezye menge mage: nu endile ku lugendo. 16 Kazanga kongo wozo wakasilwe byindi nkama itano, amonine mutali wa bingo nkama itano bya olo. 17 Bubo wozo wabezaga na byindi nkama ibili amonine mutali wa bingo nkama ibili. 18 Tondo wozo wabezaga na byindi lukama lumozi endile, nu ombile itengu mu bilongo, abisile byindi bya olo bya mukota wage.
19 Gasilile bindi byingi, mukota wa babo bakiti avule, aganzile nabo bikulo byage. 20 Nu wozo wakasilwe byindi nkama itano avule, atolile bingo byindi nkama itano, atendile bunee: ‘Mukota, wankasile byindi nkama itano, lola namona mutali wa ingo itano.’ 21 Mukota wage amubwide bunee: ‘Wakita busoga, uwe mukiti musoga nu mukatizia: wankatizizie ku bikulo biteli byingi, nkakubika mwangati wa bikulo byingi. Ingila mu mbogimbogi za mukota wobe.’ 22 Nu wozo ungo wakasilwe byindi nkama ibili avule, nu atendile bunee: ‘Mukota wankasile byindi nkama ibili. Lola namona mutali wa ingo nkama ibili.’ 23 Mukota wage amubwide bunee: ‘Wakita busoga, uwe mukiti musoga nu mukatizia wankatizizie ku bikulo bitebyingi, nkakubika mwangati wa bikulo byingi, ingila mu mbogimbogi za mukota wobe.’ 24 Nu wozo wakasilwe byindi lukama lumozi avule, atendile bunee: ‘Mukota, namenyine buno uli muntu mukali, ukutubulaga byutayikile, nu ukukundamanagia byutabeganizie, 25 nu nakule boba, nu nendile kubisa byindi byobe lukama mu bilongo: lola, bibino u byindi byobe lukama.’ 26 Tondo mukota wage amwakwide bunee: ‘Uli mukiti mubi nu musosu, wizi buno nkutubulaga bintayikile, nu nkukundamanagia bintabeganizie, 27 songo wabikile bikulo byane ku babo beli balangi basoga ba bikulo, gakusubya kwane, ninakasilwebyo gamozi na mutali.’ 28 Mutikyazi lukama lwage, nu mukaselo ku wozo uli na nkama ikumi za olo. 29 Kubuno wozo uli na kena akakaswa, nu kutalikilwa; tondo uteli na kena aba kako keli nako akatikibwako. 30 Mwisazi mukiti mubi mu kapilo kumbuga; u kukaba idilo nu kubuga meinyo.
Lusungio Luzinda
31 Gakavwa Mwana wa Muntu mu lutanuno lwage, nu banzelo bansania gamozi nage, akeikala ga kisumbi kyage kya lutanuno. 32 Nu baBilongo bansania bakakundamana kweli, nu akalekanukya anga bukulekanukagia mulangi mikoko nu mpene zage. 33 nu akabika mikoko ku kuboko kwage kwa seidume, nu mpene ku kuboko kwage kwa seikazi. 34 Bubo, Mukota akabula beli ku kuboko kwage kwa seidume bunee: ‘Vwazi, Inyuwe mwakasilwe mponga na Tatane, mupiene bukota bumwalongekedwe kutukila mu kulinga kwa kisi: 35 kubuno nabezaga na nzala, mwankasile idia; nabezaga na mpusia, mwankasile mazi; nabezaga mugeni mwansekede; 36 nabezaga na bwela, mwamvwalikizie; nabezaga musambi mwavule kundola; nabezaga mu kikando, nu mwavule kundola.’ 37 Nu beisanana bakamwakula bunee: ‘Mukota, busi bukizi butwakumonineko uli na nzala, nu twakukasile idia? Nu mpusia, nu twakukasile mazi? 38 Busi bukizi butwakumonineko uli mugeni, nu twakusekede? Nu uli na bwela, nu twakuvwalikizie? 39 Busi bukizi butwakumonineko uli musambi, aba mu kikando, nu twendile kukulola?’ 40 Nu Mukota akabakula bunee: ‘Lebelebe, nkumubula bunee: Bunsania bumwakitide umozi wa ku zezo mibuto zane mikeke, mwankitidebo nu nne.’
41 “Nu abwide lingo babo beli ku kuboko kwage kwa seikazi bunee: ‘Ntukilazi, mwaswilidwe, mwingile mu keiya katanakuzinda kalongekedwe Satana nu banzelo bage: 42 kubuno nabezaga na nzala, tamwankasile idia; nabezaga na mpusia tamwankasile mazi; 43 nabezaga mugeni, tamwansekede; nabezaga na bwela, tamwamvwalikizie; nabezaga musambi, nu mu kikando, tamwavule kundola?’ 44 Nu bo bakamwakula bunee: ‘Mukota, busi bukizi butwakumonineko uli na nzala, nu mpusia, nu mugeni, nu bwela, nu musambi, nu mu kikando, nu tatwakulangile?’ 45 Nu We akababula bunee: ‘Lebelebe nkumubula buno kubuno tamwakitide umozi wa ku zezo mibuto zane mikeke, tamwankitidebo nu nne.’ 46 Nu bantu babano bakenda mu lubabazio lutanakuzinda: tondo beisanana bakenda mu kalamo katanakuzinda.”