Basankoga Bakwakania Bwangato bwa Yesu
20
1 Busi bumozi mu bindi bibyo, gabezaga Yesu akwigisia bantu mu numba za kukumbamina nu asambalaga Musagu Musoga, bakota ba basankoga banene nu basozi ba mulembe, gamozi na bakulu bamuvwilide. 2 Nu bamubwide bunee: “Tubule ku bwangato bukizi buukukitila bibino bitondo? Aba nazi wozo wakukasile bubuno bwangato?” 3 Abakwide bunee: “Nkumubuzia nu Nne lubuzio lumozi nu munakulazi. 4 Ndi lututiko lwa Yoana lwatukile kwigulu aba ku bantu?”
5 Tondo babuzanizie bwabobwabo bunee: “Ndi twakula bunee: ‘Lwatukile mwigulu,’ nti atende bunee: ‘kubuni tamwamukatizizie?’ 6 Tondo ndi twakula bunee: ‘lwatukile ku bantu,’ nti bantu bansania batulibule makozi, kubuno bakatizizie buno Yoana abezaga mulengania.”
7 Nu bamwakwide bunee: “Tatwamenyinina kuni kulwatukile.” 8 Nu Yesu abakwide bunee: “Aba nu Nne nsikumubula ku bwangato bukizi bunkukitila bitondo bibino.”
Musumo wa Balimi Babi
9 Alingile lingo kwisa bantu musumo wono bunee: “Muntu umozi ayikile isoa lya mizabibu. Nu alikasile ku balimi bage, nu endile mu kingo kisi, eikalile kuko nkungu ndazi. 10 Nu mu nkungu za matubulo, asingile mukiti umozi ku babo balimi buno bamukase nkindi za matubulo ma mizabibu. Balimi bamulibwide nu bamusubizie maboko bwasi. 11 Asingile lingo ungo mukiti; nu bamulibwide nu we, nu bamulingile nu bamusubizie maboko bwasi. 12 Nu asingile lingo ungo wa basatu: bamubabazizie nu bamwimbizie.
13 Nu Mukota w'isoa lya mizabibu abwide bunee: ‘Buni bunikita? Nasinge Mwana wane mutundwa, embe banamwanza.’
14 Tondo babo balimi, gabamumonineko, babuzanizie bwabobwabo nu batendile bunee: ‘Wono u mupieni, tumwitazi buno bupieni bube bweitu.’ 15 Nu bamutikizye mu isoa lya mizabibu nu bamwitile.
Buni lino bwabakite mukota w'isoa lya mizabibu?
16 Avwe kwita babo balimi nu nti akasane lilyo isoa lya mizabibu ku bango.” Nu gabongule ku bubo, babwide bunee: “Kilo, ta bubo aba nunse.”
17 Tondo Yesu abakakile meiso, nu ababwide bunee: “Bwisulilwa bukizi bwa bubuno bwasanzilwe bunee: ‘Ikozi lyasombilwe na bobaki u lyabede ikozi inene lya kapindapinda?’ a 18 Na muntu unsania wagoa g'ikozi lilino, abeleke; tondo unsania wakolokelwa nalyo, nti lyamubungule.”
Kitondo kya Kuliga Kodi
19 Basankoga banene nu basozi ba milembe balondile kumukata mu nkungu zezo, tondo bakule bantu boba, kubuno bamenyine buno kubeli u kwisaga Yesu wono musumo. 20 Bamulolile nu basingile bantu bongwilizi beibikile anga beisanana buno bamutegele nu bamukate ku bitondo bimozi, nu kumukasana ku mpumba nu ku bwangato bwa mukota. 21 Nu bantu babo bamubuzizie lubuzio luluno: “Musozi, twizi buno, ukutenda nu ukwigisia bitondo bya bulili, aba ntukulola ku bukuti bwa muntu, tondo ukwigisia nzila za Kalaga mu bulili. 22 Ndi bwakulungana kutuli kuliga kodi ku Kaisari aba kutaliga?”
23 Yesu amenyine bwengelezi bwabo. Nu abakwide bunee: 24 “Mundolesie kinkulumba kimozi. Kili na kisusania nu masanzo ma nazi?” Nu bo bakwide bunee: “Bya Kaisari.” b 25 Nu abatendile bunee: “Kasazi ku Kaisari bibyo bya Kaisari nu ku Kalaga bibyo bya Kalaga.” 26 Nu tabavwamine kumukata mu bitondo byatendaga lwabusio lwa bantu; tondo bangamine ku iyakulo lyage, nu beikede kibibi.
Lubuzio ku Kitondo kya Kuyuka Kutuka ku Bakuzi
27 Bamozi ku baSadukayo babo bakutendaga buno takuli nunse iyukilo, bavule bwigi na Yesu nu bamubuzizie lubuzio luluno: 28 “Musozi, Musa atusanzide buno, ndi mubuto wa muntu umozi akua nu asiga mukikulu, tondo ntasiga abuta bana, mubuto wage nti aneiyana wozo mukikulu musigala nu kumubutila bana. 29 Nu kwabezaga mibuto mutubakamo ba nda emozi: mutangi asongile mukikulu nu akule geteli kubuta nage bana. 30 Nu wa babili nu we amusongile. 31 Kusila wa basatu amusongile; nu bobansania mutubakamo bakule tabasiga babuta bana. 32 Kusila, wozo mukikulu akule nu we kumbusa kwabo. 33 Mu iyukilo, wozo mukikulu akaba wa nazi gabasamba? Kubuno asongilwe na babo bansania mutubakamo.” 34 Yesu abakwide bunee: “Bana ba nkiko zeno bakusonga nu bakusongwa. 35 Tondo babo bakaganzwa buno batananina kubasa ku nkiko zikavwa nu ku iyukilo lya kutuka ku bakuzi, tabakasonga aba tabakasongwa. 36 Kubuno tabakavwama kukua lingo, kubuno bakasusanania na banzelo, nu bakaba bana ba Kalaga, kubuno beli bana b'iyukilo. 37 Tondo bakuzi bayukibwe, u bwalolesizie Musa ku kiziki kya muti waguluminaga keiya, gaamana Mukota buno u Kalaga wa Abrahamu nu Kalaga wa Isaka nu Kalaga wa Yakobo. 38 Kubuno We nteli Kalaga wa bakuzi; tondo Kalaga wa balami; kubuno kweli, bansania beli balami.”
39 Bamozi ku basozi ba mulembe bakwide bunee: “Musozi, watendile busoga.” 40 Nu tabagelekile lingo kumubuzia lubuzio lwampa.
Masiya nu Davidi
41 Yesu ababwide bunee: “Buni bukubula bantu buno, Kristo eli Mwana wa Davidi? 42 Davidi wenyene atendile mu mukanda wa nimbo buno,
‘Mukota atendile ku Mukota wane bunee:
Ikala ku kuboko kwane kwa seidume,
43 Aaba nu ganabike beiti bobe kunsi
kwa magulu mobe. c
44 Ndi Davidi akumumana bunee: ‘Mukota!’ Buni lingo bwanaba mwana wage?”
Yesu Akusungula Basozi ba Milembe
45 Nu gamungwililaga bantu bansania, atendile ku beigisibwa bage bunee: 46 “Idangazi na basozi ba milembe bakutunda kutabanga na nsulu ndazi nu kusekelwa ku masoko, nu kwikala ga bisumbi bitangi mu numba za misanganano nu mu biziki bitangi ku bisagulo. 47 Bakunyagaga numba za misigala nu ku bwengelezi nti bakusega masego malazi. Bantu babano bakasungibwa bubibu nunsania.”