Yesu Akonia Musambi Umozi Busi bwa Kumunwa
14
1 Busi bumozi bwa Kumunwa, geingide Yesu mu numba za mwangati umozi wa baFarisayo buno alie idia, baFarisayo bamulolile nunse. 2 Nu lola, lwabusio lwa Yesu, kwabezaga muntu umozi wabezaga na lusambo lw'iyimanda. 3 Yesu abuzizie basozi ba milembe nu baFarisayo bunee: “Ndi mulembe weitu ukukasana bwangato aba kilo, konia muntu mu Busi bwa Kumunwa, u Sabato?” 4 Tondo beikede kibibi nu Yesu akatile wozo musambi nu amonezie, nu amusingile buno ende. 5 Kusila ababuzizie bunee: “Nazi wa kumuli, ndi mpunda zage aba ngombe zage zakoloka mu muzinga Busi bwa Kumunwa, utanasasia kuzitikyamo?” 6 Nu tabavwamine kumwakula kampa ku bubo. Lukita lwa Kusombola Kiziki nu Lukita lwa Kumana Bantu
7 Nu gamonine Yesu babo bamaninwe bubakusombola bisumbi bitangi, abeisile musumo wono, nu ababwide bunee: 8 “Nkungu zakumane muntu ku kisagulo ky'isonga, ntwikale ga kisumbi kitangi, kubuno embe ungo muntu wakutinga amaninwe. 9 Nu wozo muntu wamumanine, uwe nu wozo ungo, nti avwe kukubula bunee: ‘Kasana kiziki kyobe ku muntu wono.’ Nu uwe nti wakue na nsoni kwenda kwikala ga kiziki kizinda. 10 Tondo nkungu ziwamanwa, enda wikale ku kiziki kizinda kubuno gavwe wozo wakumanine, akubule bunee: ‘Kilemba kyane, bakamina ku lwabusio.’ Nu bubo bwakukase lutanuno lwabusio lwa bansania bawaliaga gamozi nabo. 11 Kubuno na muntu unsania wisakika nti akasigulizibwa; nu na unsania wisigulizia nti akasakikwa.”
12 Nu Yesu abwide wozo wamumanaga bunee: “Nkungu ziukukita idia lya mu musi aba lya mwigolo, ntumane bilemba byobe, aba mibuto zobe, aba ba kikanga kyobe, aba banyobe ba bwigi beli bagumi, kubuno banavwa nu bo kukumana lingo, nu kuko kukasana nti kuse kwa kuliga. 13 Tondo gokukita kisagulo, mana bazambi, bitunga, bakukilila nu byuku. 14 Nu nti wabogeboge, kubuno tabeli na kampa ka kukuliga; kubuno waligwe gayukibwe beisanana.”
Musumo wa Kisagulo Kinene
15 Gongule muntu umozi wa ku babo babezaga na Yesu ga meza ku bubo, abwide Yesu bunee: “Mbogimbogi ku wozo ukalia idia mu bukota bwa Kalaga!” 16 Nu Yesu amwakwide bunee: “Muntu umozi akitile kisagulo kinene nu amanine bantu beingi. 17 Gakukile nkungu za kisagulo, asingile mukiti wage kumana babo bamaninwe buno, vwazi, kubuno binsania bise kayikayika. 18 Tondo babo bansania bananine kubasa. Mutangi amubwide bunee: ‘Nakunzile isoa kano kaluma nu natunganana kwenda kulilola. Nkukusega nunse buno unsigilile.’ 19 Nu ungo amubwide bunee: ‘Nakunzile ngombe ikumi nu nkwenda kuzigeleka; nsigilile nunsania.’ 20 Lingo ungo amubwide bunee: ‘Nasongile mukikulu, nu ku kabamba kakano nsinavwama kuvwa.’ 21 Wozo mukiti asubizie nu asambalide Mukota wage binsania. Kusila, mukota wa numba ongilwe, nu abwide mukiti wage bunee: ‘Tuka, enda lubilo mu nzila nnene nu nkeke za mwino nu nti wavwa gano na bazambi, bitunga, byuku nu bakukilila,’ 22 nu mukiti atendile bunee: ‘Mukota, bitondo biwakakizizie byakitilwe, tondo kukili lingo kiziki.’ 23 Nu mukota atendile ku wozo mukiti wage bunee: ‘Enda mu nzila za kumbuga kwa mwino nu ku myaga za masoa nu bantu bansania bawasangage bakakizie buno beingile mu numba zane nu bubo nti ziyale. 24 Nkukubula bunee: “Takuli umozi wa ku babano bantu bamaninwe wasonde ku idia lyane.”’”
Milembe Zatunganana kwa Kuba Mwigisibwa
25 Nu misanganano minene zendile gamozi na Yesu. Abakebetukile, nu kubatenda bunee: 26 “Ndi muntu unsania avwa kundi, nu ntasomba isi, nu nina, nu mukikulu wage nu bana bage, nu mibuto zage nu babitu bage, aba nu kalamo kage wenyene, ntanavwama kuba mwigisibwa wane. 27 Nu muntu unsania uteeka musalaba wage nu kunyanga, ntanavwama kuba mwigisibwa wane. 28 Kubuno nazi wa kumuli ndi akutunda kobaka numba zasakama nunse, nti eikala tanga gansi nu kuganza bukunza nu kulola ndi eli na bikulo byakuka kuzisililizia? 29 Kubuno ndi abika kalingilo nu ntavwama kusila kobaka nti bansania bakukamona kuko nu kumuseka. 30 Nu banatenda bunee: ‘Wono muntu alingile kobaka nu ntavwamine kusililizia!’ 31 Aba mukota mukizi, ukwenda ku lwana bita na ungo mukota ndi ntaneikala tanga gansi nu kukala lwango kwibuzia ndi anavwama kukinda na tununu ikumi (10.000) twa bantu ku wozo ukuvwa kumulwania gamozi na bantu tununu makumi mabili (20.000)? 32 Nu ndi amona buno ntanavwama, nu wozo mukota eikili bulazi, nti amusingila mugenzi kusega bubobelelo. 33 Ububo nu bo ndi muntu unsania wa kumuli ntasiga binsania byeli nabyo, ntanavwama kuba mwigisibwa wane.
Munkange Utaswaga