Musumo wa Mukoko Waziminne nu Wamonekile
15
1 Nu basanzi bansania ba kuligia kodi, nu bagi bavule bwigi na Yesu buno bamungwilile. 2 BaFarisayo nu basozi ba milembe, beizuzumine, nu batendile bunee: “Wono muntu akusekela bagi nu akulia gamozi nabo!” 3 Tondo abeisile wono musumo, bunee: 4 “Nazi wa kumuli, ndi eli na mikoko lukama nu ndi umozi wa kuzo wamuzimina, ndi ntanasiga zezo ingo mikoko makumi mubula nu mubula mu kalula, nu nti enda kulonda wozo waziminne, aaba nu gaagumone? 5 Nu nkungu zagumona, nti aweka ga matuli mage na mbogimbogi, 6 nu nti asubya ku numba zage. Kusila, nti amana bilemba byage nu banyage ba bwigi nage, kubatenda bunee: ‘Bogazibogazi gamozi na nne, kubuno namonine mukoko wane wabezagile wazimina!’ 7 Ububo bunkumubula buno kukaba mbogimbogi nnene mwigulu ku mwagi umozi wiyania, kutinga beisanana makumi mubula nu mubula batakwiyanina kwiyania. Musumo wa Kinkulumba kya Feza Kyaziminne nu Kyamonekile
8 Aba mukikulu mukizi, ndi eli na binkulumba ikumi bya feza, nu ndi aziminwa na kimozi ndi ntanabangia kasuku nu kuyagila mu numba, nu kulonda na komanizia aaba nu gaakimone? 9 Nu nkungu zakimona nti amana bilemba byage nu banyage ba bwigi nage nu nti atenda bunee: ‘Bogazibogazi gamozi na nne, kubuno namonine kinkulumba kya feza kinabezagile nazimizia.’ 10 Ububo, bunkumubula buno, kuli mbogimbogi lwabusio lwa banzelo ba Kalaga ku kabamba ka mwagi umozi wiyania.”
Musumo wa Mwana Waziminne nu Amonekile
11 Yesu atendile lingo bunee: “Muntu umozi abezaga na bana babili bamulume. 12 Mwana muto abwide isi bunee: ‘Tatane, nkase kyane kyindi kya bikulo,’ nu isibo ababeganizizie bikulo byage. 13 Gatingile bindi bikeke, wozo mwana muto akungikile byage binsania, nu endile mu kisi kya bulazi, kuko azimizizie bikulo byage binsania ku kabamba ka butazi. 14 Nu gaasilile kuzimizia binsania, nzala nnene zabede mu kikyo kisi, nu alingile kwida binsania. 15 Ububo, endile kusega mulimo ku muntu umozi wa mu kikyo kisi, nu wozo muntu amusingile ku masoa mage buno alisie ngulube. 16 Atundile kwembuka na bisugu byaliaga ngulube, tondo takuli muntu umozi wamukasaga kena. 17 Mu nkungu zabede es'eibezia, atendile bunee: ‘Bakiti banga ba mulimo ba tatane beli n'idia lingi nunse, nu nne nkukua na nzala gano! 18 Natuke gano nu nasubye kuli Tatane nu namubule bunee: “Tatane, nagide Kalaga nu nakwagide, 19 nsyatananina lingo kumanwa mwana wobe, nkite anga umozi wa ku bakiti bobe.”’ 20 Atukile, nu asubizie ku isi.
Tondo gaabezaga eikili bulazi, isi amumonineko. Nu amukwilide kyombo, eitumine lubilo, nu amukumbatide nu amumumine. 21 Wozo mwana amubwide bunee: ‘Tatane, nagide Kalaga nu nakwagide, nsyatananina lingo kumanwa mwana wobe.’ 22 Tondo isi abwide bakiti bage bunee: ‘Sasiazi kuvwa na nkanzu nsoga nunse, nu mumuvwalikye zo; mubikazi lupete ku munwe wage nu bisalapata ku magulu mage, 23 nu lusiazi kyana kya ngombe kyanona, nu mukisese. Tuliazi nu tubogeboge. 24 Kubuno wono mwana wane akule, nu we alama lingo. Aziminne nu amoneka lingo.’ Nu balingile kubogaboga.
25 Mu nkungu zezo, mwana wage wa nkula abezaga ku isoa. Gaasubizie bwigi na numba, ongule ku kwimbwa nu ku kuminwa. 26 Ububo amanine umozi wa ku bakiti, nu amubuzizie buni bwabede. 27 Wozo mukiti amubwide bunee: ‘Muto wobe asubizie, nu so asesile kyana kya ngombe kyanona, kubuno amumonako lingo bulonge bukata na kalamo.’ 28 Nu wozo nkula ongilwe, nu ntazigile kwingila. Ububo isi abasile kumbuga, nu amusegile nunse kwingila. 29 Tondo akwide isi bunee: ‘Ntukumona, kuseli myaka mingi nkukukitila mulimo kuteli kwaga mu milembe zobe, aba limbizi limozi, nu ntunkasaga mwana wampa wa mpene buno nibogeboge na bilemba byane. 30 Tondo gabasa wono mwana wobe, wozo wazikizye bikulo byobe gamozi na bakikulu bitazi, wamusesela kyana kya ngombe kyanona!’ 31 Nu isi amubwide bunee: ‘Mwana wane, ukubezaga gamozi na nne bindi binsania nu binsania binili nabyo bili byobe; 32 tondo bunatunganenne kusekela wono na kyelele nu kubogaboga nunse, kubuno wono muto wobe akule nu alama lingo, aziminne nu amoneka lingo.’”