Kuvwa kwa Muuza Wasililila
2
1 Nkungu zakukile busi bwa Pentekoste, bakatizia bansania bakundamenne ga kiziki kimozi. 2 Kitangalabesi iyuki lyatukile kwigulu, anga lumpumpu lukali nu lwizazizie numba zibeikalaga muzo. 3 Bamonine ku ndami zasusania anga ndembelela za keiya; zidonganizie nu zikede gantata ga muntu na muntu wa kubeli. 4 Bansania beiyazizibwe na Muuza Wasililila nu balingile kutenda mu ingo mitendezi, anga bwabasondelezizie Muuza Wasililila. 5 Mu Yerusalema kwabezaga baYuda nu bantu basoga batukile ku bilongo bya kisi kinsania. 6 Gabongule ku iyuki lilyo, bakundamenne gamozi. Bansania baganineganine nunse kubuno na muntu na muntu wa kubeli abezaga akungwa bubakutenda mu mutendezi wage we wenyene. 7 Baganineganine nu bansania bangamine nunse nu batendile bunee: “Bantu babano bansania bakutenda ndi tabeli baGalilaya? 8 Kubuni na muntu na muntu kutuli akubongwa mu mutendezi wage wa kubutwa? 9 Kuli munkatini mweitu bamozi batukile ku kisi kya Parti, kya Medi, kya Elamu, kya Mesopotamia, kya Yudea nu Kapadokia ku Ponto nu kisi kya Asia, 10 kya Furigia ku Pamfilia, ku Misri nu ku kyindi kya Libya kili bwigi na Kurene, kuli bango batukile ku Roma, 11 (kuli babutilwe baYuda nu bango bagalukile kuyanga meigisia ma baYuda); bantu ba Krete, nu ba Arabia, nu lingo beiswe bansania tukungwa bubakutenda musagu wa milimo minene za Kalaga mu mitendezi zeitu.” 12 Bansania bangamine nunse nu tabamenyine bwabede. Babuzanizie bwabobwabo bunee: “Bubuno buli buni?” 13 Tondo bango basekile bakatizia, nu batendile bunee: “Bakua na maku.”
Meigisia ma Petro
14 Petro emanukile gamozi na babo beigisibwa ikumi n'umozi; nu atendile n'iyuki inene kubasambalila bunee: “Beinyuwe, baYuda nu bansania bakwikalaga mu Yerusalema, ungwililazi busoga bunsania bunkutenda. 15 Kubuno bantu babano tabakua na maku anga bumukukengela, kubuno zili tugu nkungu isatu za nindunindu. 16 Tondo kano kaluma lyazindilila iyuki lyatendilwe na mulengania Yoeli bunee:
17 ‘Kalaga atendile bunee: Lolazi bukaba mu bindi bya kuzinda
nkakubula Muuza wane ku bantu bansania,
nu basikila beinyu nu bakinga beinyu bakalengania,
nu bana bamulume bakakaswa tulolesio
nu bakungu beinyu bakakesia ndozi:
18 Lebelebe nkabalangania Muuza wane ku bakiti
bane bamulume nu bakikulu, mu bindi bibyo, bakalengania.
19 Nkazindilizia bitondo bya miganogano munda mwigulu
nu tulolesio gano ga kisi,
kukaba mikila, nu keiya, nu lutundutundu lwa muuki:
20 Musi ukagaluka kuba anga kapilo,
nu mwezi ukagaluka kuba anga mikila,
lwabusio lwa busi bubo bwa Mukota tabwika
u busi bubo bunene bwa miganogano.
21 Nu bukaba buno unsania ukusega ku izina lya
Mukota akonibwa.’
22 Bamulume ba Israeli, ungwililazi bunkumutenda buno, Kalaga amulolesizie bwangato mu Yesu wa Nazareti, kubuno mweli azindilizizie migeleko, miganogano, nu tulolesio munkatini mweinyu anga bumwizi mubenyene. 23 Muntu wono akasenwe kumuli ku lwango lwa Kalaga lwamenyininne kutukila wakalazi: inyuwe mwamukatile, mwamwitile mu nzila za kumutaka ku musalaba ku maboko ma bantu ba bwagi. 24 Tondo Kalaga amuyukizie kutuka ku bakuzi nu amukandwide ku lubaba lwa lukuo kubuno tabwabezaga bwakulungana buno lukuo lumukate mu bwangato bwage. 25 Kubuno Davidi atendile ku kabamba kage bunee:
‘Namonine ku Mukota bindi binsania lwabusio lwane
kubuno eli ku kuboko kwane kwa seidume buno nsitengetenge.
26 Ku kabamba kako mutima wane wabogaboga nu lulami
luli na kyelele:
Lingo aba mubili wane, wikale na kilemanizio.
27 Kubuno ntukasiga mutima wane mu kiziki kya
bakuzi, aba ntukaziga Wasililila wobe kubola.
28 Wandolesizie nzila za kalamo, ukanizazia na
mbogimbogi nkungu zinkakumonako.’ a
29 Mibuto zane nsigazi tanga nimutende bwasibwasi ku kabamba ka Tateiswe Davidi, buno akule, ayikilwe mu nsinda nu nsinda zage zili lelo munkatini mweitu. 30 Tondo abezaga mulengania nu amenyine buno Kalaga alumbide kilumbilo buno, kutukila ku kikanga kyage, akasakika umozi, buno eikale mu kisumbi kya bukota bwage. 31 Davidi amenyine bwabe lwabusio nu atendile moki ma kuyuka kwa Kristo kutuka ku bakuzi mu nkungu zatendile bunee:
‘Ntasigilwe mu kiziki kya bakuzi,
Nu mubili wage tawabolile.’
32 Kalaga ayukizie wono Yesu kutuka ku bakuzi nu beiswe bansania tuli balongeki ba bubo. 33 Asakikilwe ku kuboko kwa seidume kwa Kalaga nu akatile ku Isi idagano lya Muuza Wasililila nu abalanganizie kutuli bubo bumukumonako nu bumukungwako kano kaluma. 34 Kubuno Davidi abezaga ntebasa kwigulu tondo atendile bunee:
‘Mukota atendile ku Mukota wane,
Ikala ku kuboko kwane kwa seidume,
35 Aaba nu ganabike beiti bobe kunsi kwa magulu mobe.’ b
36 Kikanga kinsania kya Israeli kimenye bulili buno, Yesu u mwatakile ku musalaba, u wozo wabikile Kalaga kuba Mukota nu Kristo!”
37 Gabongule ku moki mamo, bakutukile mitima nunse. Babuzizie Petro nu bango beigisibwa bunee: “Mibuto, buni butukita kano kaluma?” 38 Petro abakwide bunee: “Iyaniazi nu na muntu na muntu wa kumuli atutikwe mu izina lya Yesu Kristo ku kabamba k'isigililo lya bwagi bweinyu. Nu inyuwe mwakaswe lukaso lwa Muuza Wasililila na Kalaga. 39 Kubuno idagano lya Kalaga lili kumuli nu ku bana beinyu nu ku bansania beikile bulazi, bansania bakamanwa na Kalaga Mukota weitu.”
40 Petro abalolesizie lingo mango moki meingi ku kabamba ka kubana nu kubakasa magala, nu atendile bunee: “Itabiziazi lonio nu mulekanuke na babo bantu bazimina!” 41 Nu kibombo kinene kubo kitabizizie moki ma Petro nu kututikwa. Busi bubo bantu bakuka tununu tusatu batalikidwe ku kibombo kya bakatizia. 42 Babezaga bakulama mu meigisia ma basingwa nu kugomania nu babungwide kampampa nu kusega bansania gamozi.
Bwakitaga Bakatizia ba Kulinga
43 Na muntu na muntu na wakule boba kubuno basingwa babezaga bakukita miganogano mingi nu migeleko mingi. 44 Bakatizia bansania beikede gamozi nu babikile byabo binsania gamozi. 45 Bakunzizie byabo binsania nu bikulo byabo nu bibamonaga babeganizie byo ku muntu na muntu anga bweiyaninaga. 46 Busi na busi bakundamanaga mu numba za kukumbamina, baliaga idia lyabo gamozi ku numba zabo na mbogimbogi nu na mutima umozi. 47 Baganunaga Kalaga nu batananizagia bantu bansania. Nu Mukota atalikilaga busi na busi ku kibombo kyabo babo bonibagwa.