Konibwa kwa Kitunga
3
1 Petro nu Yoana babezaga bakwenda ku numba za kukumbamina, ku nkungu za kusega u nkungu mubula. 2 Bwigi na lwibi lwa numba za kukumbamina, lulo lwamanagwa “Lusoga,” gabezaga muntu umozi kitunga kutukila kubutwa kwage. Busi na busi bamwekaga nu kumwikya bwigi na lwibi lulo buno asege bikulo ku babo bakwingila mu numba zongo. 3 Nu amonine ku Petro nu Yoana gabeingilaga mumo nu abasegile lukaso. 4 Petro nu Yoana bamulolile kisozi nu Petro amubwide bunee: “Tulole.” 5 Muntu wozo abalolile nunse, kubuno akengelaga buno banamukasa kimozi. 6 Petro amutendile bunee: “Nsili na feza aba olo za kukukasa, tondo kinili nakyo u kinkukukasa: ku izina lya Yesu Kristo wa Nazareti, emanuka nu utabange!” 7 Nu kusila amukatile ku kuboko kwa seidume nu amuzanzwide. Kazanga kongo masindi nu ngologoso za kikyo kitunga zalindile; 8 Nu asasizie kwemanuka nu kwenda kima. Eingide na basingwa mu numba za kukumbamina, endile atumatuma, nu kutoloka nu kuganuna Kalaga. 9 Bantu bansania bamumonineko akutabanga nu kuganuna Kalaga. 10 Gabamenyine buno u wozo muntu wikalaga gansi bwigi na Lwibi Lusoga nu kusega nkaso, bangamine nu baganineganine na bubo bwamubaside. Meigisia ma Petro mu Numba za Kukumbamina
11 Nu wozo muntu wonezibwe gaatazigile kulekanuka na Petro nu Yoana, bantu bansania bangamine, nu babakonganine mu lusu lwamanagwa bunee: “Lusu lwa Solomono.” 12 Gamonine Petro ku bubo, abwide babo bantu bunee: “Inyuwe bantu ba Israeli, kubuni kumukwangama na konibwa kukuno? Kubuni mukutulola anga iswe u batabangia wono muntu ku magala meitu aba ku busoga bweitu tubenyene? 13 Kalaga wa Abrahamu, wa Isaka nu wa Yakobo, Kalaga wa batateiswe, aganwine mukambi wage Yesu. Mubenyene mwamugabwide nu mwamutunine lwabusio lwa Pilato gaatundaga kumukandula. 14 Mwatunine wozo Wasililila nu Wisanana nu mwasegile Pilato kumukandulila mwiti. 15 Nu mwitile Mukota wa kalamo. Tondo Kalaga amuyukizie kutuka ku bakuzi nu iswe tuli balongeki ba bubo. 16 Mu magala m'izina lya Yesu, ku bukatizio mu izina lilino u bwonibwa muntu wono, u mukumonako nu u mwizi. Ku bukatizio mu izina lya Yesu u bwamukasile kona nunse anga bumwizi inyuwe banse.
17 Ku bubo, mibuto zane, nizi buno inyuwe nu bakota beinyu mwakitide Yesu bubo ku kutasongolola kweinyu. 18 Tondo Kalaga alongekile bubo bwasambedwe na balengania ba wakalazi bansania buno, Kristo wage ababazibwe, nu azindilizizie bubo. 19 Mwiyaniazi nu mugaluke ku Kalaga buno asigilile bwagi bweinyu. Nu bubo Mukota akamukasa nkungu za kyumuno, 20 nu kumusingila Mukota wamubikilaga lwabusio, u Yesu. 21 Nkungu zeno, Yesu Kristo atunganana kusigala kwigulu aaba nu nkungu za kukulumizibwa kwa binsania, anga bwasambede Kalaga wakalazi na balengania bage basililila. 22 Kubuno Musa atendile lebelebe bunee: ‘Mukota Kalaga akamusakikila mulengania umozi anga nne, akaba umozi wa mumuli. Mukongwilila binsania byakamubula. 23 Nu wozo utakungwilila wozo mulengania, nti akazimina bulazi na bantu bage.’ a 24 Nu bubuno u bwatendile balengania bansania, kutukila ku Samweli nu bamukatikania, bansania balenganizie bumozi nkungu zeno. 25 Nu inyuwe muli bana ba balengania nu b'idagano lyakitile Kalaga na basoinyuwe, atendile na Abrahamu bunee: ‘Mu kibuti kyobe, baBilongo bansania bakakaswa mponga.’ 26 Lingo Kalaga alolesizie mukiti wage kumuli tanga, amusingile buno, amukase mponga kugalukya muntu na muntu wa kumuli kusiga misako zage za bwagi.”