Petro nu Yoana Lwabusio lwa Bakota ku Mulondo
4
1 Petro nu Yoana gababezaga beki batenda na bantu, basankoga, nu mukota wa balangi ba numba za kukumbamina nu baSadukayo babavwilide. 2 Babezaga na kabebe nunse kubuno babo basingwa babezaga bakwigisia bantu nu kubasambalila buno, iyukilo lya bakuzi lili mu Yesu. 3 Bakatile Petro nu Yoana nu bababikile mu kikando aaba nu kukya kwa busi, kubuno nkungu zabezaga zise zatinga. 4 Tondo beingi babezaga bakungwa ku musagu wasambalagwa bakatizizie nu maganzo ma bakatizia mabezaga meseli bwigi na tununu tutano twa bamulume. 5 Nindunindu, bakota ba baYuda, bakulu nu basanzi ba milembe bakundamenne ku Yerusalema. 6 Kwabezaga tanga Ana sankoga munene, Kayafa, Yoana, Alesanduro nu bansania ba kikanga kya sankoga munene. 7 Gababikile beigisibwa lwabusio lwabo nu bababuzizie bunee: “Ku magala makizi aba ku izina lya nazi kumwamonezie?” 8 Petro eiyede na Muuza Wasililila, abakwide bunee: “Bakota ba bantu nu bakulu ba Israeli, 9 ku kitondo kya buno twabuzibwa lelo ku busoga bwakitidwe wono kitunga nu lukita lukizi lonezibwe, 10 mwatunganana kubumenya, beinyuwe bansania, nu kilongo kinsania kya Israeli kibumenye: muntu wono eli lwabusio lweinyu na magala masoga ku magala m'izina lya Yesu Kristo wa Nazareti, wozo u mwatakile ku musalaba tondo Kalaga amuyukizie kutuka ku bakuzi nu kumubika ku kalamo. 11 Wono u
‘Ikozi lyasombagwa na beinyuwe bobaki,
U lyabikilwe kuba ikozi inene lya kapindapinda.’
12 Nu takuli lonio mu ungo: kubuno takuli lingo izina kunsi kw'igulu, lyakasilwe munkatini mwa bantu, lyatunganana konibwa kulyo.”
13 Babo bakazi ba nango bangamine nunse, kubuno bamonaga ku bupuka bwa Petro nu Yoana nu bamenyine buno beli bantu bateigile kampa aba beteli na menge nunse, babamenyine buno babezaga gamozi na Yesu. 14 Tondo gabamonine ku muntu wozo wonezibwe abezaga eikile kima bwigi nabo nu tabamenyine bwa kwakula. 15 Gabasilile kubeimbia mu lusu lwa nango basigede bakutendana bwabobwabo. 16 Beibuzanizie bunee: “Buni butukita bantu babano? Kubuno bantu bansania ba mu Yerusalema beizi bwasibwasi buno mugeleko munene wakitilwe nabo nu tatunavwama kugutuna. 17 Tondo, musagu wa kitondo kikino tagubalangane ku bantu, tubazugile nu tubeitie boba buno tabatende ku muntu wampa ku izina lilino.” 18 Babamanine, babazugide nunse buno, tabatende, aba tabeigisie lingo ku izina lya Yesu.
19 Tondo Petro nu Yoana babakwide bunee: “Sombolazi, ndi bwisanana ku Kalaga kumwanza kutinga kwanza Kalaga. 20 Tondo iswe, tatunavwama kusiga kutenda butwamonineko nu butungule kubo.” 21 Kusila kwa kubeitia lingo boba, beiya lwango babazugide lingo nu kubamenka, kubuno tabamonine kitondo kya kubasungia kukyo, kubuno bansania baganunaga Kalaga ku bubo bubamonagako. 22 Kubuno muntu wozo wakitilwe iganogano lya konibwa abezaga muntu watinga myaka makumi manazi.
Masego ma Bakatizia
23 Gababede bakandulwa, Petro nu Yoana bendile ku bilemba byabo nu babasambalide bunsania bwatendaga bakota ba basankoga nu bakulu. 24 Gabongule ku bubuno bakatizia basegile ku Kalaga na mutima umozi: batendile bunee: “Mukota, uwe u wabumbile igulu, nu kisi, kitatenge nu binsania bili mukyo. 25 Uwe ku magala ma Muuza Wasililila watendile ku kanua ka Davidi mukiti wobe nu tateiswe bunee:
‘Kubuni baBilongo bakwikaka,
Kubuni bantu bakukita lwango lwa bulia?
26 Bakota ba kisi bemenne, nu bangati bakundamenne, ku
kwitana na Mukota nu Masiya wage.’ a
27 Lebelebe buligo kubuno Herode nu Pontio Pilato gamozi na baBilongo bakundamenne mu wono mwino na kikanga kya baIsraeli kwitana na mukambi wobe wasililila Yesu, u wabongezie makiti kuba Masiya. 28 Bazindilizizie bunsania buwalongekile lwabusio mu magala mobe nu mu lutundo lwobe. 29 Nu kano kaluma, Mukota, lola bubakutwitia boba, nu kasa bakiti bobe bupuka bwa kusambala idagi lyobe geteli boba. 30 Lambya kuboko kwobe buno nsambo zonibwe nu migeleko nu miganogano zikitwe ku izina lya mukiti wobe wasililila, Yesu.” 31 Gabasilile kusega, kiziki kibabezaga bakundamana gakyo kyatengiletengile. Bansania beiyede na Muuza Wasililila nu basambede musagu wa Kalaga na bupuka.
Bakatizia Bakubegania Bikulo Byabo gabasamba
32 Bakatizia babezaga na mutima umozi nu na makengelo mamozi. Aba umozi wa kubeli ntatendaga buno byeli nabyo bili byage wenyene, tondo babezaga bakubegana byabo binsania. 33 Basingwa babede balongeki ba kuyuka kwa Mukota Yesu nu babede na magala nunse, nu Kalaga abakasaga mponga ningi. 34 Takwabezaga muntu umozi widaga bwakwiyanina. Lebelebe babezaga na masoa aba numba bakunzizie binsania, nu bavule na bikulo bya bibyo bibakunzagia 35 nu kubikasa ku basingwa; kusila balonganizie bikulo bibyo ku muntu na muntu anga bwiyaninaga.